नुवाकोटमा ५९ जनाको जाँच गर्दा ५५ जनामा कोरोना पुष्टि
काठमाडौँ — नुवाकोटमा शनिबार कोरोना रोगको ५८ जना नयाँ संक्रमित थप भएका छन् । योसहित जिल्लामा सक्रिय संक्रमितको संख्या ७६ पुगेको छ । जिल्लाको विभिन्न स्थानबाट संकलन गरिएको स्वाबको त्रिशूली अस्पतालको आरडिटी, पीसीआर प्रयोगशालामा गरिएको परीक्षण र शंकास्पद लक्षणसहित उपचारका लागि सोही अस्पतालमा पुगेका बिरामीबाट संकलन गरिएको स्वाबको एन्टिजेन जाँचको नतिजामा ५८ जनामा कोरोना भाइरस पुष्टि भएको हो ।
स्वास्थ्य कार्यालयका सूचना अधिकारी उत्तमराज खनालका अनुसार पछिल्लो २४ घण्टामा नयाँ संक्रमित थप हुनेमा विदुर नगरपालिकामा ३६ जना, किस्पाङ गाउँपालिकामा सात जना, बेलकोटगढी नपामा चार जना, सूर्यगढी, ताँदी र म्यागङमा तीन/तीन जना र तारकेश्वर गाउँपालिकामा एक जना रहेका छन् ।
नुवाकोटमा कोरोना संक्रमितको संख्या क्रमशः घट्ने क्रममा रहेको र १२ मध्ये पाँच वटा पालिका संक्रमणमुक्त भएको तथा संक्रमित पहिचान १० प्रतिशतको हाराहारीमा रहेको थियो । शनिबार एकैदिन धेरै संख्या मा कोरोनाको नयाँ संक्रमित पहिचान भएको हो ।
प्रयोगशालामा ५९ जनाको जाँच गर्दा ५५ जना र बिरामी भएर अस्पतालमा उपचार गराउन गएका पाँच जनामा तीन जनासमेत गरेर ५८ जना व्यक्तिमा कोरोना भाइरस पुष्टि भएको छ । धेरै संख्या मा कोरोनाको भाइरस देखिएसँगै दोर्याएर गरिएको जाँचमा समेत सोहीअनुसारको नतिजा आएसँगै रोगको संक्रमण पुनःसमुदायमा व्यापकरुपमा फैलिएको स्वास्थ्य कार्यालयले जनाएको छ ।
कोरोना सक्रमित पुष्टि हुनेमा अधिकांश जिल्ला सदरमुकाम विदुरका बासिन्दा छन् । उनीहरूका स्वास्थ्यमा कोरोना रोगको लक्षणसहितको समस्या देखिएसँगै जाँच गराउने क्रममा भाइरस पुष्टि भएको हो । संक्रमितमध्ये एक जनाको अवस्था गम्भीर भएसँगै त्रिशूली अस्पतालमा भर्ना गरिएको छ भने बाँकी ७५ जनालाई स्वास्थ्यकर्मीको निगरानीमा घरकै एकान्तबासमा राखिएको छ ।
प्रकाशित : कार्तिक ६, २०७८ २१:२८
