जसले दिइन् विद्यार्थीसँगै परीक्षा- वाग्मती - कान्तिपुर समाचार

जसले दिइन् विद्यार्थीसँगै परीक्षा

१९ वर्षदेखि जहाँ शिक्षक छिन्, ममताले त्यहींबाट आफ्ना विद्यार्थीसँगै बसेर कक्षा १२ को परीक्षा दिएकी हुन्
रमेशकुमार पौडेल

चितवन — उमेर ४९ वर्ष, पेसा शिक्षक तर ममताकुमारी गुरुङले कुनै बेला आफैंले सानो कक्षामा पढाएका विद्यार्थीसँगै बसेर कक्षा १२ को परीक्षा दिएकी छन् । आफू जुन विद्यालयमा १९ वर्षअघि पढाउन आएकी थिइन्, त्यहींबाट उनले शुक्रबार कक्षा १२ को परीक्षा सकेकी हुन् ।

‘मैले शिशु कक्षामा पढाएकै बालबच्चाहरूसँगै बसेर अघिल्लो वर्ष कक्षा ११ र यो वर्ष कक्षा १२ को जाँच दिएँ । कक्षा ११ पास भएँ । १२ को पनि परीक्षा राम्रै भएको छ । १२ पास हुने धोको थियो । ५० वर्ष नपुग्दै धोको पूरा हुने भयो,’ परीक्षा कोठाबाट बाहिरिएलगत्तै शुक्रबार उनले भनिन् ।

उनले भरतपुर–२९ जुगेडीस्थित कविलास माविबाट कक्षा १२ को परीक्षा दिएकी हुन् । उक्त विद्यालयमा उनी २०५९ देखि प्रावि तहको शिक्षकका रूपमा कार्यरत छिन् । त्यसअघि झन्डै ५ वर्षसम्म उनले जुगेडीआडको कुसुमटार प्राविमा पढाएकी थिइन् । २०७५ मा उनको जागिर स्थायी भयो । त्यसको अर्को वर्ष कविलास माविमै कक्षा ११ मा भर्ना भइन् । शिक्षा संकायअन्तर्गत नेपाली उनको मुख्य विषय हो । ‘सुरुमा त पास गर्नै सकिन्छ कि सकिन्न, आफैंले शिशुमा पढाएका भाइबैनासँग बसेर कसरी पढ्ने र परीक्षा दिने होला भन्ने संकोच थियो तर पढ्न थालेपछि यी सबै बिर्सिएँ,’ ममताले अनुभव सुनाइन् ।

उनको जन्म भारत बिहार राज्यको पूर्णिया जिल्ला गढबनैलीमा भएको हो । बाबुआमाको मूलघर धादिङ थियो । काम खोज्दै गढबनैली पुगेका बेला ममता उतै जन्मिएकी हुन् । ‘कक्षा १० सम्म त गढबनैलीमै पढें । २०४६ मा कक्षा १० पास गरेको थिएँ,’ उनले भनिन् । त्यही वर्षको हिउँदमा उनी बाबुआमासँगै नेपाल आइन् । यतै बिहेको मेसो मिल्यो । फागुन २२ मा जुगेडीका भक्तबहादुर गुरुङसँग उनको बिहे भयो । त्यसअघि नेपाल नआएकी उनी नेपाली बोल्न सक्दिन थिइन् । अझै पनि उनको बोलीमा हिन्दी लवज छुटेको छैन । ‘त्यतिबेला नेपाली सिक्नै ठूलो दुःख भयो । अहिले त नेपाली विषय लिएरै ११ र १२ कक्षा पढें । राम्रो गरेकी छु,’ उनले भनिन् । श्रीमान् भक्तबहादुर पनि शिक्षक नै थिए । १० वर्षअघि जनगणनामा खटिएका बेला बिरामी परे । त्यसपछि उनको निधन भयो । उनीहरूका दुई छोरा छन् ।

‘जीवनमा उतारचढावहरू आए । दुःखका क्षणहरू धेरै नै बेहोरियो । तर जागिर स्थायी भएपछि अलि सन्तोष भयो । अनि पढ्ने रहर जागेर आयो,’ ममताले भनिन् । कविलास माविकी शिक्षक सूर्यमाया सुवेदी ममताले पाको उमेर भए पनि पढ्ने रहर राखेर पूरा गरेको देख्दा खुसी लागेको बताउँछिन् । ममताका नेपाली शिक्षक बुद्धिमान केसी पाको उमेर भए पनि ममताले सिक्न, पढ्नमा राम्रो मिहिनेत गरेकाले परीक्षामा सफल हुने विश्वास व्यक्त गरे ।

कक्षा ११ उनले ‘सी प्लस’ ग्रेड ल्याएर पास गरेकी हुन् । परिस्थिति मिले क्याम्पस पनि पढ्ने चाहना राखेकी छन् । ‘सम्भव भए अझै पढ्न किन पछाडि पर्ने र ! तर नजिकमा क्याम्पस छैन । भरतपुर गएर पढ्न टाढा हुन्छ, भ्याइँदैन । हेरौं तैपनि के हुन्छ,’ उनले भनिन् ।

आफूले सानोमा पढाएकाहरू सँगै बसेर कक्षा ११ र १२ परीक्षा दिँदा रमाइलो लागेको उनले सुनाइन् । ‘मेरै विद्यार्थी कक्षाका साथी बने । उनीहरूले सहयोग गरे, हौसला दिए । पूरै समाजले सहयोग र हौसला दियो । त्यस्तो गाह्रो केही परेन,’ उनले भनिन् । पढ्नका लागि उमेरले छेकबार नलगाउने उनको भनाइ छ । त्यसैले मन मारेर यत्तिकै नबस्न उनले सुझाव दिइन् ।

प्रकाशित : आश्विन ९, २०७८ ०९:२५
प्रतिक्रिया
पठाउनुहोस्

युवती मृत फेला

आनन्द गौतम

ताप्लेजुङ — भानुजन माध्यमिक विद्यालयमा कक्षा ११ मा अध्ययनरत एक युवती मृत भेटिएकी छन् । फक्ताङलुङ गाउँपालिका–३ लिङखिम घर भई फुङलिङ नगरपालिका–६ बिहीबारे बस्दै आएकी १८ वर्षीया पुष्पा तबेबुङ लिम्बू शुक्रबार बिहान मृत भेटिएकी हुन् । 

दूध पुर्‍याउन दोखुबाट सदरमुकाम फुङलिङ आउँदै गरेका स्थानीयले युवती भीरमा लडेको देखेपछि प्रहरीलाई खबर गरेका थिए । जिल्ला प्रहरी कार्यालयका प्रहरी निरीक्षक राकेश यादवका अनुसार उनको शव फुङलिङ नगरपालिका–७ दोखु सिरानको भीरको फेदमा थियो । ‘करिब सय मिटरमाथि अग्लो पहरो भएको ठाउँबाट तल झरेको देखिएको छ,’ प्रहरी नायब उपरीक्षक बालनरसिंह राणाले भने, ‘उनको ज्याकेट पहरोमा अड्किएको र घटनास्थलमा मेटासिटको बोतल भेटिएको छ ।’

मेटासिटको गन्ध आएपछि अनुसन्धान गर्ने क्रममा प्रहरीले ज्याकेट र बोतल बरामद गरेको हो । झरेको ठाउँ कतै माडिएको अवस्थामा पनि भेटिएको प्रहरीले जनाएको छ । शरीरभरि चोटपटक रहेको उनी बिहीबार राति १२ बजेसम्म घरमै रहेको परिवारले बताएका छन् । दिदीहरूसँगै बस्दै आएकी उनको आत्महत्या हो या कर्तव्य भन्ने विषय अनुसन्धान भइरहेको यादव बताउँछन् ।

‘अब पोस्टमार्टम रिपोर्ट पनि आउँछ र हामी कल डिटेल पनि हेर्छौं,’ यादवले भने, ‘तीन/चार दिनमा विस्तृत विवरण प्राप्त हुन्छ ।’ उनको शव जिल्ला अस्पतालको शव गृहमा राखिएको छ ।

*यसअघिको शीर्षकमा युवती मृत फेला हुनुपर्नेमा दूध पुर्‍याउन हिँडेकी युवती मृत फेला भएकोमा सच्याइएको छ ।– सम्पादक

प्रकाशित : आश्विन ९, २०७८ ०८:५८
पूरा पढ्नुहोस्
प्रतिक्रिया
पठाउनुहोस्
×