सालकको खपटासहित एक पक्राउ
सिन्धुली — प्रहरीले सालकको खपटासहित एकजनालाई सोमबार नियन्त्रणमा लिएको छ । सिन्धुलीको कमलामाई नगरपालिका २ खट्टारका ३० वर्षीय मदनसिङ बम्जन दुई वटा सालकका खपटासहित प्रहरीले पक्राउ गरेको हो ।
बीपी राजमार्ग अन्तर्गत पिपलभन्ज्याङ नजिक हिँडिरहेका बम्जनको साथबाट सालकको शरीरको पुरै भाग भएको २ फिट ५ इन्च र १ फिट ९ इन्चको दुईवटा खपटा प्रहरीले बरामद गरेको हो ।
अवैध कारोबारका लागि काठमाडौंतर्फ लैजान राजमार्गमा गाडी चढ्न आएको बेला बम्जनलाई नियन्त्रणमा लिइएको डीएसपी मनोजकुमार लामाले जानकारी दिए । बम्जनलाई खपेटासहित आवश्यक कारबाहीका लागि डिभिजन वन कार्यालयमा बुझाइएको प्रहरीले जनाएको छ ।