राजनीतिक गतिविधिमा जुट्दै दल- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

राजनीतिक गतिविधिमा जुट्दै दल

दैनिक संक्रमित थपिने क्रम घटेको र तीनै तहको निर्वाचन नजिकिएका कारण दलहरु संगठन विस्तार, भेला र सभा गर्न अग्रसर
राजकुमार कार्की

सिन्धुली — जनता समाजवादी पार्टी नेपालका संघीय परिषद् अध्यक्ष बाबुराम भट्टराई गत मंगलबार सिन्धुलीमाडी आए । पार्टीको संगठन सुदृढीकरण तथा जनजागरण कार्यक्रममा आएका भट्टराईले बुधबारसम्म सिन्धुलीमाडीमै रहेर स्थानीय नेता–कार्यकर्तासँग भेटघाट गरे । उनी गोरखामा कार्यक्रम भ्याएर तराई हुँदै सिन्धुलीमाडी आइपुगेका हुन् । जसपाकै केन्द्रीय अध्यक्ष उपेन्द्र यादव पनि जिल्ला दौडाहाका क्रममा सिन्धुली आएका थिए ।


शनिबार मुख्यमन्त्री अष्टलक्ष्मी शाक्यले हरिहरपुरगढी गाउँपालिका–४ को महेन्द्रझ्याडी माविको नवनिर्मित भवनको उद्घाटन गरिन् । कार्यक्रमस्थल जाने क्रममा सिन्धुलीमाडीमा रहेको एमाले पार्टी कार्यालयमा कार्यक्रम राखेर स्थानीय नेता–कार्यकर्तामाझ आफ्नो धारणा राख्न भ्याइन् । माढी बजारमै रहेको जनसेवी पुस्तकालयको पनि अवलोकन गरिन् ।

एमालेमा रहँदै गठित माधव नेपाल समूहको समानान्तर जिल्ला कमिटीलाई नेकपा (एकीकृत समाजवादी) को जिल्ला कमिटीमा रूपान्तरण गर्न सिन्धुलीमाडी आएका नेताद्वय रामकुमारी झाँक्री र केदार न्यौपानेले कम्युनिस्ट पार्टीको मूल प्रवाह आफ्नो पार्टी रहेको दाबी गर्न भ्याए ।

पार्टीको वडा अधिवेशन सकेर माथिल्लो पदमा उम्मेदवारी घोषणा गरेका कांग्रेस उम्मेदवारहरूक्षेत्रीय प्रतिनिधिहरूसँग मत माग्न व्यस्त छन् । उनीहरू ९ वटै स्थानीय तहमा समूह बनाएर लागिपरेका छन् । कांग्रेसको असोज ९ मा पालिकाको अधिवेशन मिति तोकिएको छ ।

माओवादी केन्द्रले पनि यो समयलाई संगठन विस्तार गर्ने अवसरका रूपमा लिएको छ । शनिबार माओवादीनिकट शिक्षकहरूले ८ स्थानीय तहमा भेला गरे । मरिण क्षेत्रमा पार्टी प्रवेशको कार्यक्रम नै राखिएको थियो । माओवादीका स्थायी कमिटी सदस्य हरिबोल गजुरेल र केन्द्रीय सदस्य लेखनाथ दाहाल संगठन विस्तारमा जुटेका छन् ।

कोरोना संक्रमण जोखिमका कारण लामो समय गतिविधिहरू रोकेका दलहरूले यतिखेर दैनिक संक्रमित थपिने क्रम मत्थर भएसँगै संगठन विस्तार, भेला, सभा गरिरहेका छन् । महामारीको चपेटामा परेका स्थानीयसमेत यस्ता कार्यक्रममा उपस्थिति जनाइरहेका छन् ।

स्थानीय तहको निर्वाचन हुन ६ महिना मात्र बाँकी छ, संघ र प्रदेशको पनि धेरै टाढा छैन । यसअघिको स्थानीय निर्वाचनमा एमाले, कांग्रेस र माओवादीले ३/३ वटामा जित हात पारेका थिए । एमाले र माओवादीबीचको गठबन्धन भएपछि संघका दुई र प्रदेशका चारै क्षेत्रमा कब्जा जमाएको थियो । तीनै तहको निर्वाचन नजिएकाले पनि दलहरूले संक्रमण घटेको समयलाई उपयोग गर्ने नीति बनाएर गतिविधिलाई तीव्र बनाएका हुन् । जिल्लामा २ नगरपालिका, ७ गाउँपालिका र ७९ वडा छन् ।

प्रकाशित : आश्विन ४, २०७८ ११:५१
प्रतिक्रिया
पठाउनुहोस्

विदेशबाट फर्केर व्यवसायमा

तरकारी खेतीबाट महिनाको ३०/४० हजार आम्दानी
भवानी भट्ट

कञ्चनपुर — कञ्चनपुरको कृष्णपुर नगरपालिका—२ बाणीका कर्णबहादुर धामी १२ वर्षकै उमेरमा भारत पसे । घरघरेडीका लागि मात्रै जमिन भएका उनले भारतमै ज्यालामजदुरी गरेर परिवारको गुजारा चलाए । झन्डै ३० वर्ष भारतमा बिताएका उनी अहिले घरमै कुखुरा पालन व्यवसायमा संलग्न छन् । दिल्लीमा दिनभरि ज्यालादारी गरेर कमाइने मासिक ८/१० हजार अहिले उनी घरमै कमाइरहेका छन् । 

४५ वर्षीय धामीले घर आँगनमै स–साना कुखुराका खोर बनाएका छन् । तिनमा चल्लादेखि ठूला कुखुरा राखिएका छन् । स्थानीय जातका कुखुरा र अण्डा हुने गरेको छ । तिनै अण्डा र कुखुरा बिक्रीबाट महिनाना ७/८ हजार आम्दानी हुने गरेको धामी बताउँछन् । धामीले ठूलो लगानी र धेरै कुखुरापालन गरेका छैनन् । सीमित लगानीमा स्थानीय जातका सय/दुई सयको संख्यामा मात्रै कुखुरापालन गरेका छन् । सधैं बिक्री गर्न सकिने गरेर उनले उत्पादन गरिरहेका छन् । ‘यसैबाट घर खर्च चलेको छ,’ धामीले भने, ‘घरका सबैले घरमै बसेर सानोतिनो आम्दानी भएको छ ।’

दिल्लीमा लामो समय सेक्युरिटी गार्डको काम गरेका उनी कोरोना संक्रमण सुरु हुनुभन्दा एक/डेढ वर्षअघि मात्रै घर फर्केका हुन् । तीन दशकसम्म भारतमा काम गर्दा पनि घर खर्च चलाउनसमेत धौ–धौ भएपछि उनले घर फर्केर कुखुरा पालन सुरु गरेका हुन् । अहिले छोरा छोरीको पढाइदेखि घर खर्च सबै यही पेसाले धानेको उनी बताउँछन् ।

पुनर्वास नगरपालिका–९ बीचफाँटाका सूर्य बुढा पनि वैदेशिक रोजगारीबाट फर्केर तरकारी उत्पादनमा लागेका छन् । उनले बेमौसमी तरकारीदेखि मकैलगायतको उत्पादन गरिरहेका छन् । ३ वर्ष मलेसिया बसेका उनी यतिबेला पुनर्बास नगरपालिकाकै उत्कृष्ट कृषक बनेका छन् ।

बुढाले ६ बिघा जमिन भाडामा लिएर आलु, काउली, बन्दालगायत सिजनअनुसार तरकारी उतपादन गरिरहेका छन् । गत वर्ष उनले ३ बिघा जमिनमा १२५ क्विन्टल आलु उत्पादन गरे । जसमध्ये २५ क्विन्टर खेतबाट बिक्री गरेका थिए भने बाँकी कोल्डस्टोरमा राखेर बीउका लागि बिक्री गरे । उनले आधा बिघामा सिजनअनुसार तरकारी लगाउँछन् । जसबाट एक सिजनमा एक/डेढ लाखको तरकारी बिक्री गर्दै आएका छन् ।

मलेसियामा ओभर टाइम काम गर्दा पनि महिनामा १०/१२ हजार मात्रै बचत गर्न सकिन्थ्यो । तर अहिले उनी घरमै तरकारी खेतीबाट महिनाको ३०/४० हजार आम्दानी गरिरहेका छन् । उनले आफूसंॅगै गाउँलेहरूलाई पनि रोजगारी दिएका छन् । ३/४ जनालाई नियमित रोजगारी दिएको उनले बताए । बुढाले उत्पादन गरेको तरकारी बारीबाटै बिक्री हुन्छ । बढी उत्पादन भएका बेला नजिकैको हाटबजारमा लगेर बेचने गरेको उनले बताए । आलुको बीउ र मकै उत्पादनका लागि उनी जिल्लाको दक्षिणी क्षेत्रकै नमुना कृषकका रूपमा चिनिएका छन् । ‘अर्काको देशमा बोली भाषा पनि नजानिने, तल्लो स्तरको व्यवहार सहनुपर्ने, त्योभन्दा आफ्नै गाउँघरमा सानोतिनो काम गर्नु नै राम्रो,’उनले भने, ‘घर परिवारसॅंगै बसेर विदेशको भन्दा राम्रो आम्दानी गर्न सकिन्छ ।’


प्रकाशित : आश्विन ४, २०७८ ११:४९
पूरा पढ्नुहोस्
प्रतिक्रिया
पठाउनुहोस्
×