एकतर्फी सडकले समय र जोखिम दोब्बर- वाग्मती - कान्तिपुर समाचार

एकतर्फी सडकले समय र जोखिम दोब्बर

टीकाप्रसाद भट्ट

रामेछाप — रामेछाप जिल्ला सदरमुकाम जोड्ने मुख्य सडक मन्थली–खुर्कोट खण्डमा झरेको पहिरो महिनौंसम्म पन्छाइएको छैन । पहिरो नपन्छाउँदा सडकमा एकतर्फीमात्र यातायात सञ्चालनमा छ । 

‘एकतर्फी सडकका कारण यात्रामा दोब्बर समय र दुर्घटनाको जोखिम बढेको छ,’ सवारी चालक मीनबहादुर श्रेष्ठले बताए । श्रेष्ठका अनुसार मन्थलीदेखि खुर्कोटसम्मको १५ किलोमिटर सडक खण्डमा अधिकांश स्थानमा पहिरो छ । ‘सानो–ठूलो गरी १ सय २० स्थानमा पहिरो झरेको छ’ श्रेष्ठ भन्छन्, ‘कतिपय स्थानमा पहिरोले गर्दा सडकमा सवारी आएको देख्न सकिने अवस्था छैन ।दैन । आधा घण्टामा पूरा हुने यात्रा एक घण्टा लाग्ने गरेको छ ।’

मन्थलीदेखि खुर्कोटसम्मको खण्डमा सडक डिभिजन कार्यालय खुर्कोट र मन्थली नगरपालिकाले पहिरो पन्छाएर एकतर्फी यातायात खुलाएका हुन् । पानी परिरहेकाले बाँकी पहिरो पन्छाएर दुईतर्फी बनाउनका लागि अझै केही दिन पर्खनुपर्ने अवस्था रहेको डिभिजन सडक कार्यालय खुर्कोटका प्रमुख किरण कार्कीले बताए । पानी परिरहेकाले थप पहिरो झर्ने क्रमसमेत छ, कार्कीले भने ‘पहिरो झरिहालेमा तत्कालै एकतर्फी बाटो खोल्ने तयारी अवस्थामा छौं , सवै पन्छाउनचाँहि केही समय लाग्छ ।’

उनका अनुसार डिभिजन कार्यालयमा अख्तियारी नआएकोले थप मेसिन जुटाएर पहिरो पन्छाउन कठिनाइ भएको हो । ‘उधारो तेल हालेर एउटा मेसिन चलाउँदै आएका छौं,’ उनले भने, ‘पानी रोकिएपछि त्यसैलाई परिचालन गरेर आवागमन सहज बनाउँछौं ।’ यस वर्ष रामेछापमा विगतका वर्षहरूमा भन्दा बढी पानी परेकाले अधिकांश सडकमा पहिरो झर्ने र भासिएको भाग धेरै छ ।

मन्थलीदेखि खिम्ती र मन्थलीदेखि रामेछापतर्फको सडकमा समेत दर्जनौं स्थानमा पहिरो झरेकाले यातायात एकतर्फी मात्र सञ्चालन भएको स्थानीय नारायणप्रसाद घिमिरेले बताए । घिमिरेका अनुसार मन्थली रामेछाप १३ किलोमिटर खण्डमा समेत ३० भन्दा बढी स्थानमा सडक धसिएको छ ।

प्रकाशित : भाद्र ३१, २०७८ १२:२९
प्रतिक्रिया
पठाउनुहोस्

पुनर्निर्माणकाे काम हस्तान्तरण, सीईओ ज्ञवाली भन्छन् - ‘एकीकृत बस्तीको मोडल स्थापित गर्‍यौं’

कान्तिपुर संवाददाता

काठमाडौँ — राष्ट्रिय पुनर्निर्माण प्राधिकरणले बुधबारबाट आफ्नो काम हस्तान्तरण प्रक्रिया सुरु गरेको छ । २०७२ सालको भूकम्पमा भत्किएका घर, सांस्कृतिक एवं पुरातात्विक सम्पदा, स्वास्थ्यचौकी, विद्यालय लगायतको निर्माणका लागि २०७२ पुस ९ गते प्राधिकरण स्थापना भएको थियो । ५ वर्षे कार्यकाल तोकिएको यसको म्याद १ वर्ष थपिएको थियो ।

थपिएको १ वर्षको समयसीमा आगामी पुस ९ गते सकिँदैछ । तर, राष्ट्रिय पुनर्निर्माण प्राधिकरणले आफ्नो कामको हस्तान्तरणको चार महिनाअघि नै सुरु गरेको हो । प्राधिकरणको मूलभूत काम सकिएको प्राधिकरणको भनाइ छ । आगामी पुस ९ गतेसम्मको अवधिमा कामको जिम्मेवारी पाएका निकायलाई काममा सहजीकरण गर्नका लागि अहिलेदेखि नै हस्तान्तरणको काम थालिएको प्राधिकरणका अधिकारीले बताएका छन् । अब यो अवधिमा प्राधिकरणले प्रशासनिक र अर्थसम्बन्धी काममात्रै गर्ने भएको छ । यसका अलावा धरहरा, रानीपोखरी र सिंहदरबारस्थित प्रधानमन्त्री कार्यालयको पुनर्निर्माणको बाँकी काम मात्रै हेर्नेछ । त्यस्तै, मंसिरमा पुनर्निर्माणसम्बन्धी अन्तर्राष्ट्रिय सम्मेलन पनि हुने भएको छ ।

राष्ट्रिय पुनर्निर्माण प्राधिकरणले गरेका काम, आगामी दिनमा पुनर्निर्माणको काम कसरी अगाडि बढ्छ र भविष्यमा यस्ता संरचनाको आवश्यकताबारे दुई पटक प्राधिकरणको नेतृत्व गरेका प्रमुख कार्यकारी अधिकृत सुशील ज्ञवालीसँग जयसिंह महराले गरेको कुराकानीको पूरा अंश पढ्न र हेर्न : पुनर्निर्माणकाे काम हस्तान्तरण, सीईओ ज्ञवाली भन्छन् - ‘एकीकृत बस्तीको मोडल स्थापित गर्‍यौं’

प्रकाशित : भाद्र ३१, २०७८ १२:१४
पूरा पढ्नुहोस्
प्रतिक्रिया
पठाउनुहोस्
×