३७ वर्षपछि भेटिन् चन्द्रमायाले सेतेलाई- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

३७ वर्षपछि भेटिन् चन्द्रमायाले सेतेलाई

राजकुमार कार्की

सिन्धुली — धेरै वर्ष पर्खिए तर छोरा फर्किएनन् । अनि परिवारले आस मारे । एक–दुई वर्ष होइन, पूरै ३७ वर्ष बित्यो । आमा बुढ्यौलीले अशक्त भइन् । छोराछोरी हुर्किएर ठूला भए ।

यस्तैमा दोलखा तामाकोसी गाउँपालिका जफेका कृष्णबहादुर रुम्बा टुप्लुक्क गाउँ आइपुगे । झन्डै चार दशकपछि फर्किएका उनलाई घर पत्ता लगाउनै मुस्किल पर्‍यो । कृष्णबहादुरले छोडेका तीन लालाबाला आफैं पौरख गर्न सक्ने भएर बाहिरिसकेका थिए । घरमा पत्नी सीता मात्र थिइन् । सुरुमा त उनले अनुहारमा बुढ्यौलीले मुजा हालिसकेका पतिलाई ठम्याउनै सकिनन् । शरीर कमजोरीले थलिएजस्तो देखिन्थ्यो ।

आमा भने बसाइँ सरेर माइलो छोरा श्यामसँग सिन्धुलीमा बस्न थालेकी थिइन् । उनी कृष्णबहादुरलाई सेते भनेर बोलाउँथिन् ।

कृष्णबहादुरले ९५ वर्षकी आमा चन्द्रमायालाई बुधबार सिन्धुलीको कमलामाई नगरपालिका–४ को रानीखोला ढाक्रेवासमै पुगेर भेट गरे । २०४१ साल माघयता आमाछोराको भेट थिएन । चन्द्रमायाले पनि सुरुमा छोरालाइ ठम्याउनै सकिनन् । कान कम सुन्ने भइसकेकी थिइन् । छेउमै बसेका माहिला छोराले आमालाई कृष्णबहादुरको पहिचान गराइदिए ।


दुवै हातमा लौरो टेकेर वरिपरि हिँडडुल गर्नुपर्ने अवस्थाकी चन्द्रमाया वर्षाैंपछि छोरालाई देख्दा भक्कानिइन् । अनि ‘सेते’ भन्दै सुमसुम्याउन थालिन् । कृष्णबहादुरले पनि मन थाम्न सकेनन् ।

लक्काजवान छँदा हिँडेका कृष्णबहादुर आफैं ७२ वर्ष पुगिसकेका छन् । छोराको कमजोर शरीर देखेर आमा सोधिरहेकी थिइन्, ‘के भयो, बिरामी भएको हो ?’ जफेबाट कान्छा भाइ हरिबहादुरको साथ लागेर आमा भेट्न आएका कृष्णबहादुरको बोली टड्कारो थिएन । आमालाई सन्चोबिसन्चो सोध्दा पनि कानेखुसी गर्दै थिए ।

हरिबहादुरका अनुसार नेपाली सेनामा १२ वर्ष जागिर खाएपछि बिरक्तिएर हिँडेका कृष्णबहादुरको अत्तोपत्तो थिएन । उनी दुई साताअगाडि मात्र घर आइपुगेका हुन् । रोगले जीर्ण देखिएका उनी धुलिखेल अस्पतालमा ६ दिन उपचार गरेपछि केही तंग्रिएका छन् ।

हरिबहादुरका अनुसार फर्कंदा दाजुका साथमा केही जोर कपडा र भारु १८ हजारजति पैसा थियो । कृष्णबहादुर यतिका वर्ष भारतको सिलोङमा कोइलाखानीमा चौकीदारी गरेको बताउँछन् । तर उनीसँगै कुनै कुनै फोटो, मोबाइल भने छैन् । ‘दाइको उता पनि घरजम छ कि भन्ने शंका छ तर केही भनेका छैनन्,’ हरिबहादुरले भने, ‘बिरामीले गर्दा होला, थिरका कुरा पनि गर्दैनन् । एकचोटि फेरि आसाम जानुपर्छ भन्छन् ।’

प्रकाशित : भाद्र ३०, २०७८ १०:३०
प्रतिक्रिया
पठाउनुहोस्

एमसीसीमा विवाद गर्नु दुर्भाग्यपूर्ण : भट्टराई

राजकुमार कार्की

सिन्धुली — जनता समाजवादी पार्टी नेपालका संघीय परिषद् अध्यक्ष बाबुराम भट्टराईले राष्ट्रिय सहमति जुटाएर एमसीसी पास गर्नुपर्ने बताएका छन् । जनता समाजवादीले सिन्धुलीमाढीमा मंगलबार आयोजना गरेको कार्यक्रममा भट्टराईले एमसीसी सहयोगको विरोध हुनु दुर्भाग्यपूर्ण भएको बताए ।

‘म नै प्रधानमन्त्री भएको बेलामा एमसीसी प्रक्रिया सुरु भएको थियो,’ उनले भने, ‘त्यसपछि बनेका सबै सरकारले यसलाई अगाडि बढाएका हुन् । अहिले आएर एमसीसीमा विवाद गर्नु बडो दुर्भाग्यपूर्ण भएको छ ।’ भट्टराईले प्रमुख दलहरुबीच छिटो राष्ट्रिय सहमति गरेर यो अनुदान सहयोग लिएर जाँदा नै नेपाललाई उपयुक्त हुन्छ भन्ने आफ्नो पार्टीको धारणा रहेको बताए ।

‘फेरि हामी कहाँ त जसले जे गरेपनि शंकैशंकाले लंका खान्छ भने जस्तो सबै थोकमा विरोध गर्ने चलन छ,’ उनले भने, ‘सुरुदेखि भएका सम्झौता यस्तै भएका छन् ।’ एमसीसीलाई लिएर यतिधेरै बहस र विवाद गर्नु आवश्यक नभएको चर्चा गदै नेता भट्टराईले भने,'हाम्रो संविधान अनुसार यस्ता जुन अनुदान सहयोग हुन्छन्, त्यस निम्ती संसद्बाट अनुमोदन गर्ने आवश्यकता थिएन । तर यो ठूलो सहयोग भएकाले हाम्रैतर्फबाट संसद्बाट अनुमोदन भन्ने राखिएकाले राष्ट्रिय सहमति आवश्यक भएको हो ।'

अहिलेसम्म विदेशी सहयोग पूरै बन्द गर्ने भन्ने नेपालको कुनै नीति र संविधानको मर्ममा पनि नभएको उनले बताए ।

प्रकाशित : भाद्र २९, २०७८ १६:४६
पूरा पढ्नुहोस्
प्रतिक्रिया
पठाउनुहोस्
×