पहिरोले नुवाकोट र रसुवामा गरी तीनको मृत्यु, दुई जना बेपत्ता- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

पहिरोले नुवाकोट र रसुवामा गरी तीनको मृत्यु, दुई जना बेपत्ता

कृष्ण थापा

नुवाकोट — पहिरोले रसुवा र नुवाकोटमा गरी बिहीबार तीन जनाको मृत्यु भएको छ भने दुई जना बेपत्ता भएका छन् । रसुवाको नौकुण्डगाउँपालिका–५ कोलडाँडामा दुई तथा नुवाकोटको बेलकोट नगरपालिका–५ लामाचौरमा एक जनाको ज्यान गएको हो ।

नौकुण्ड गाउँपालिकामा पहिरोले घर पुर्दा ३२ वर्षीया कमला तामाङ र उनकी कान्छी छोरी ८ वर्षीया सुकमायाको मृत्यु भएको जिल्ला प्रहरी कार्यालय रसुवाले जनाएको छ । एक छोरा र एक छोरी बेपत्ता छन् । घरमा सुतिरहेकै बेला उनीहरूलाई पहिरोले छोपेको थियो ।

पहिरोमा घरमूली श्यामबहादुर ग्लान घाइते छन् । उनलाई उपचारका लागि काठमाडौं लगिएको छ । बेपत्ताको खोजी गर्न स्थानीय, प्रहरी र सेनाको टोली खटिएको छ । पहिरो गएको स्थान सदरमुकाम धुन्चेबाट ४० किमि दक्षिणपूर्वमा पर्छ ।

त्यस्तै बेलकोटगढी नगरपालिका–५ लामाचौरमा पहिरो जाँदा ४३ वर्षीय विष्णुप्रसाद लामिछानेको मृत्यु भएको छ ।

घरको करेसामा बिहीबार राति भल तर्काउने क्रममा पहिरोले पुरिएको उनको ज्यान गएको जिल्ला प्रहरी कार्यालयका एसपी तुलबहादुर कार्कीले बताए । शव पोस्टमार्टमका लागि जिल्ला अस्पताल त्रिशूलीमा लगिएको प्रहरीले जनाएको छ ।

प्रकाशित : भाद्र ३, २०७८ १३:०९
प्रतिक्रिया
पठाउनुहोस्

अवरुद्ध पासाङल्हामु सडक संचालनमा

कृष्ण थापा

नुवाकोट — अविरल वर्षात्‌का कारण अवरुद्ध बनेको पासाङल्हामु सडक शुक्रबारबाट संचालनमा आएको छ । बुधबार रातिको वर्षाका कारण विदुर नगरपालिका २ र ४ वडा बीचमा रहेको मैथली व्यारेक खोल्सामा वर्षाले सडक भासिएपछि सडक अवरुद्ध भएको थियो । सडक संचालनमा आइसकेको प्रमुख जिल्ला अधिकारी जीवनप्रसाद दुलालले जनाएका छन् । सडक १० मिटर तल भासिएको थियो ।

ग्राभेल हालेर अस्थायी रुपमा सडक संचालन ल्याएइए पनि स्थायी रुपमा सडक संचालनमा ल्याउनुपर्ने स्थानीयको माग छ । सरोकारवाला निकायको विदुर नगरपालिका, सडक डिभिजन र गल्छी–त्रिशूली–मैलुङ–स्याफ्रुबेंसी–रसुवागढी आयोजनाले बेवस्ताका कारण गत वर्षदेखि जोखिममा रहेको सडक बुधबार राति भत्केको हो ।

सडकको विदुर नगरपालिकाले आफू निकटका ठेकेदारलाई काम दिएर सडकको माथिल्लो भागमात्र कालोपत्र गरेर छाडेको कारण सडक भासिएको स्थानीयले बताए । यो रसुवा र नुवाकोट जोड्ने एकमात्रै बैकल्पिक सडक हो ।

प्रकाशित : श्रावण १५, २०७८ १६:३२
पूरा पढ्नुहोस्
प्रतिक्रिया
पठाउनुहोस्
×