सबै नागरिकलाई कोरोना खोपको व्यवस्था गर्न कांग्रेसको माग- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

सबै नागरिकलाई कोरोना खोपको व्यवस्था गर्न कांग्रेसको माग

सुवास विडारी

मकवानपुर — नेपाली कांग्रेस वाग्मती प्रदेश संसदीय दलले प्रधानमन्त्री शेरबहादुर देउवालाई तत्काल सबै नागरिकलाई कोरोना खोप लगाउने वातावरण निर्माण गर्न अनुरोध गरेको छ ।

प्रधानमन्त्री शेरबहादुर देउवाले विश्वासको मत लिएसँगै बुधबार बालुवाटार पुगेको संसदीय दलको टोलीले कोरोना संक्रमणका कारण देश नै आक्रान्त रहेकाले सबै नागरिकलाई कोरोनाविरुद्धको खोप लगाउने अनिवार्य व्यवस्था गर्न माग गर्दै अनुरोध पत्र बुझाएको हो । कोरोनाको सबैभन्दा बढी जोखिममा वाग्मती प्रदेश रहेकाले खोपबाट वञ्चित र पहिलो डोज लगाइसकेका जनतालाई यथाशिघ्र खोपको व्यवस्था गर्न संसदीय दलका नेता इन्द्रबहादुर बानियाँले प्रधानमन्त्री एवम् पार्टी सभापति देउवालाई अनुरोध गरेका थिए ।

कोरोनाका कारण दैनिक ज्यालादारी गर्ने मजदुर र खाद्यान्नको अभाव झेलिरहेका विपन्‍न वर्ग रोगसँगै भोकसँग समेत लडिरहेका जनतालाई स्थानीय सरकारको वडा तहबाट खाद्यान्न उपलब्ध गराउनका लागि संघीय सरकारको पुरक बजेटमार्फत् रकम उपलब्ध गराउन कांग्रेसले अनुरोध गरेको छ ।

प्रदेशको सिन्धुपाल्चोकको हेलम्बु र मेलम्चीलगायत विभिन्न जिल्लामा पछिल्लो समय गएका प्राकृतिक विपत्तिका कारण धनजनको क्षति भएको उल्लेख गर्दै विपद्‌का कारण घरबारविहीन भएका जनतालाई तत्काल घरबारको व्यवस्था र उचित राहातको व्यवस्थाका लागि अनुरोध गरिएको बानियाँले बताए ।

कोरोना अवधिको ब्याजदरलाई न्यून दरमा भुक्तानीको व्यवस्था, निक्षेपको ब्याज र ऋणको ब्याजबीचको संक्रमण दर घटाउने र ब्याजको सिमा निर्धारण गर्ने जस्ता उपाय अवलम्बन, विशेष राहत प्याकेजको व्यवस्था गरी आर्थिक क्षेत्रलाई प्रोत्साहन गर्दै पार्टीप्रतिको निजी क्षेत्रको विश्वास बढाउन आग्रह गरिएको हो । ‘नेपाल कृषि प्रधान देशका कृषकले रासायनिक मल, बिउबिजन, सिचाइँको समस्या झेलिरहनु परेको अवस्थामा नेपाली कांग्रेस नेतृत्वको सरकारबाट यी क्षेत्रमा उल्लेख्य सुधार हुने अपेक्षा जनतामा रहेको छ । यसतर्फ ध्यान दिन हामीले अनुरोध गरेका छौं,’ बानियाँले भने ।

प्रकाशित : श्रावण ६, २०७८ १८:३९
प्रतिक्रिया
पठाउनुहोस्

उपभोक्तावादी अर्थतन्त्रलाई उत्पादनमुखी पद्धतिमा बदल्नुपर्छ : अर्थमन्त्री शर्मा

कान्तिपुर संवाददाता

काठमाडौँ — अर्थमन्त्री जनार्दन शर्माले उपभोक्तावादी अर्थतन्त्रलाई उत्पादनमुखी पद्धतिमा बदल्नुपर्ने बताएका छन् । बुधबार नेपाल उद्योग परिसंघको १८ औा वार्षिक साधारणसभामा अर्थमन्त्री शर्माले उपभोक्तावादी अर्थतन्त्रलाई उत्पादनमुखी अर्थतन्त्रमा बदल्नका लागि नीतिगत  र योजनागत रुपमा नयाँ संकल्पको खाँचो रहेको बताएका हुन् ।

अर्थमन्त्री जनार्दन शर्मा । तस्बिर : रासस

अर्थमन्त्री शर्माले स्थानीय तथा प्रदेशस्तरमा साना उद्योगहरुको सञ्जाल निर्माण गर्दै ठूला उद्योगहरु स्थापना गर्नु आवश्यक रहेको पनि बताए । औद्योगिक क्षेत्रमा विशेष लगानी नगरीकन देशलाई आत्मनिर्भर बनाउन नसकिने उनको भनाइ छ । देशको व्यापार घाटालाई निराकरण गर्नका लागि मुख्य आधार नै औद्योगिकीकरण भएको उनले उल्लेख गरे ।

‘उपभोक्तावादी अर्थतन्त्रलाई उत्पादनमुखी अर्थतन्त्रमा बदल्ने हाम्रो चुनौती हो । यसलाई बदल्नका लागि नीतिगत, योजनागत रुपमा, कार्यान्वयनका दृष्टिकोणले र प्रतिबद्धताका दृष्टिकोणले एउटा नयाँ संकल्पको आवश्यकता छ, हामीले स्थानीयस्तरमा, प्रदेशस्तरमा साना उद्योगहरुको व्यापक सञ्जाल निर्माण गरेर ती उद्योगहरुको बीचमा फेरि ठूला उद्योगहरु स्थापना गर्नुपर्ने आवश्यकता छ,' उनले भने, 'औद्योगिक क्षेत्रमा विशेष लगानी, विशेष जोड नगरीकन हामी देशलाई आत्मनिर्भर बनाउन सक्दैनौं ।’

अर्थमन्त्री शर्माले अर्थ मन्त्रालयले कोभिड प्रभावित व्यवसायीलाई राहत तथा पुन:स्थापनाको प्याकेजसहितको कार्यक्रम छिट्टै ल्याउने पनि बताए ।

कार्यक्रममा उद्योगपति तथा सांसद विनोद चौधरीले देशलाई शिक्षा, स्वास्थ्य तथा आईटीको क्षेत्रमा विश्वको गन्तव्यस्थल बनाउनको निम्ति प्रधानमन्त्री र अर्थमन्त्री समक्ष आग्रह गरे।

नेपाल उद्योग परिसंघका वरिष्ठ उपाध्यक्ष विष्णुकुमार अग्रवालले नेपाली श्रमशक्तिलाई स्वदेशमै रोजगारीको अवसर सिर्जना गर्न ठोस नीति निर्माण गर्नुपर्ने आवश्यकता रहेको बताए ।

प्रकाशित : श्रावण ६, २०७८ १८:१२
पूरा पढ्नुहोस्
प्रतिक्रिया
पठाउनुहोस्
×