बाबुआमा जेलमा, छोराछोरीको बिचल्ली- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

बाबुआमा जेलमा, छोराछोरीको बिचल्ली

लागूऔषध ओसारपसारमा संलग्न भई अभिभावक जेल परेपछि छोराछोरी छिमेकी र मावलीको संरक्षकत्वमा बस्न बाध्य छन्
मकवानपुरमा लागूऔषध कारोबार बढ्दो, कैलाश र राक्सिराङका मात्रै ३ सयभन्दा बढी स्थानीय जेलमा
प्रताप विष्ट

हेटौंडा — गत पुसमा १२ केजी गाँजासहित राक्सिराङ गाउँपालिका सरिखेतका २५ वर्षीय मैनबहादुर चेपाङ र उनकी २३ वर्षीया श्रीमती माहिलीमाया चेपाङ नेवारपानीबाट पक्राउ परे । २ हजार रुपैयाँ ज्यालाको आसमा सरिखेत औलेबाट राति गाँजा बोकेर जंगलको बाटो हुँदै नेवारपानीतर्फ ल्याउने क्रममा उनीहरूलाई प्रहरीले बाटोमै पक्राउ गरेको थियो ।

अहिले माहिलीमाया भरतपुर कारागारमा र मैनबहादुर भीमफेदी कारागारमा छन् । तर उनीहरूका ९ महिनादेखि ८ वर्षसम्मका २/२ जना छोराछोरी अलपत्र परेपछि अहिले मावलीको रेखदेखमा छन् ।

मावलीको आर्थिक अवस्था पनि सबल छैन । जसका कारण उनीहरूको लालनपालनमै समस्या भइरहेको मामा कृष्णबहादुर चेपाङले बताए । ‘मेरा पनि ५ जना छोराछोरी छन् । भान्जाभान्जीसमेत गर्दा घरमा ९ जना त बालबच्चा मात्रै भए । यत्रो परिवारलाई सम्हाल्न गाह्रो भइरहेको छ,’ उनले भने, ‘त्यसैले ४ जनालाई मात्रै स्कुल पठाउन सकेको छु ।’ अन्य आफूसँगै ज्यालाबनी गर्न जाने गरेका उनले सुनाए ।

कैलाश गाउँपालिकाको कोथलीका मंगलबहादुर चेपाङ दम्पती गाँजासहित पक्राउ परेपछि उनीहरूका ५ जना छोराछोरी अलपत्र परे । अभिभावकत्व दिने कोही नभएपछि उनीहरूलाई छिमेकी र मावलीले संरक्षण दिएका छन् । छिमेकी सुरेन्द्र चेपाङले एक छोरीसहित ३ जनालाई आफूसँगै राखेका छन् । जसमध्ये २ जना पढ्न विद्यालय जान्छन् । ‘मेरो घरको अवस्था पनि बलियो होइन । ज्यालाबनी नगरी खान पुग्दैन,’ सुरेन्द्रले भने, ‘छिमेकका बालबच्चाको बिचल्ली देख्न नसकेर ल्याएर पालेको हुँ ।’ मंगलबहादुरका बाँकी २ जना छोराछोरीलाई मावलीले जसोतसो हुर्काइरहेको छ ।

मकवानपुरका विकट मानिने राक्सिराङ र कैलाश गाउँपालिकामा गाँजाको भरिया बन्दा पक्राउ पर्ने थुप्रै परिवारको अवस्था यस्तै छ । यहाँ गाँजा र अफिम खेतीसमेत गरिन्छ । छिमेकी धादिङको बेनीघाट रोराङ गाउँपालिकामा पनि गाँजा र अफिमको उत्पादन हुँदै आएको छ । उत्पादित गाँजा र अफिम व्यापारीहरूले विभिन्न बाटोबाट भारत निकासी गर्छन् । भरियाका रूपमा त्यसै क्षेत्रका विशेष गरी चेपाङ समुदायका युवायुवतीलाई राम्रो ज्याला दिने प्रलोभन दिएर गाँजा, अफिम ओसारपसारमा लगाउँछन् । तर ओसारपसारकै क्रममा उनीहरू प्रहरीको फन्दामा पर्ने गरेका छन् ।

लागूऔषध ओसारपसारका क्रममा बुबाआमा तथा अन्य अभिभावक पक्राउ परेपछि उनीहरूका सन्तान तथा भाइबहिनी अलपत्र पर्ने गरेका छन् । ‘गाँजा बोकेका कारणले आमाबाबु नै प्रहरीले समातेर जेलमा पठाएपछि उनीहरूका छोराछोरीको बिचल्ली भएको छ,’ राक्सिराङ अध्यक्ष राजकुमार मल्लले भने, ‘अभिभावक जेलमा र छोराछोरी बिचल्लीमा परेका परिवारको संख्या हाम्रो पालिकामा मात्रै ४० भन्दा बढी छ ।’ उनका अनुसार लागूऔषध ओसारपसारमा संलग्न आरोपमा राक्सिराङ र कैलाश गाउँपालिकाका तीन सय जनाभन्दा बढी स्थानीय अहिले जेलमा छन् । उनीहरूमध्ये अधिकांश चेपाङ समुदायका हुन् । मकवानपुर प्रहरीका अनुसार अधिकांश चेपाङ समुदायका युवायुवती भरिया मात्रै हुने गरेको विभिन्न अनुसन्धानबाट खुल्ने गरेको छ । भरियाहरूको खुट्टामा चप्पलसमेत हुँदैन । कतिसम्म भने उनीहरूलाई मुख्य कारोबारीबारे केही जानकारी हुँदैन । कारोबारीले भरिया पक्राउ परे पोल खुल्ने डरले नक्कली नाम, ठेगाना बताउने गरेका छन् ।

कैलाश गाउँपालिका भार्ताका २१ वर्षीया सरिता चेपाङ र उनका भाइ १८ वर्षीय सुरेश चेपाङलाई गत असोजमा मनहरी बजार नजिकैबाट दुई पोका गाँजासहित प्रहरीले पक्राउ गर्‍यो । ५/५ केजीको प्लास्टिकमा प्याक गरिएको गाँजा मनहरी बजारसम्म पुर्‍याए एक/एक हजार रुपैयाँ ज्याला पाउने आसमा उनीहरू भरिया बनेका थिए । कसको गाँजा, कहाँ लैजाने उनीहरूलाई केही अत्तोपत्तो थिएन ।

‘मनहरी पुलको मुखमा बसिरहनू, गाँजा लिन त्यहीं आउँछौं, ज्याला पनि दिन्छौं’ भनेका भरमा उनीहरू उक्त काममा संलग्न भएका थिए । गाँजा लिन आउने मानिसभन्दा पहिले नै प्रहरी आएर उनीहरूलाई समातेको हो । कमजोर आर्थिक अवस्थाका कारण आफूहरू लागूऔषध ओसारपसारमा संलग्न रहेको उनीहरूले बयानमा बताएका प्रहरीको भनाइ छ । लागूऔषध कारोबार मुद्दामा सरिता भरतपुर कारागार र सुरेश भीमफेदी कारागारमा जेल जीवन बिताइरहेका छन् ।

कोरोना नियन्त्रण र रोकथामका लागि लकडाउन र निषेधाज्ञा गरिए पनि मकवानपुरमा अघिल्लो आवभन्दा गत आवमा धेरै परिमाणमा लागूऔषध बरामद र कारोबारी पक्राउ परेका छन् । गत आवमा लागूऔषधसहित पक्राउ पर्नेमा ९ विदेशी र १ सय ३७ नेपाली छन् । तीमध्ये सय जना हाराहारी राक्सिराङ र कैलाशका मात्रै रहेका जिल्ला प्रहरी प्रवक्ता डीएसपी जयश्वर रिमालले बताए । उनका अनुसार यो अवधिमा १ हजार ७ सय ८ केजी गाँजा, २३ केजी चरेस, ४ केजी अफिम र १४ ग्राम खैरो हेरोइन बरामद भएको छ ।

सबैभन्दा बढी निषेधाज्ञा अवधिमा गाँजासहित कारोबारीहरू पक्राउ परेका छन् । गत असारमा मात्र प्रहरीले ६ सय ५२ केजी गाँजासहित ३१ जनालाई पक्रेको थियो । जिल्लामा आव २०७६/७७ मा १ हजार ४ सय २० केजी गाँजा र २२ केजी चरेससहित १ सय ३३ जना पक्राउ परेका थिए ।

प्रकाशित : श्रावण ५, २०७८ ०९:०७
प्रतिक्रिया
पठाउनुहोस्

आफ्नैबाट बलात्कार

गत आवमा ५–१६ वर्ष उमेर समूहका २१ बालिका बलात्कृत भएकोमा अधिकांश परिवारका सदस्य र आफन्तबाटै पीडित
प्रताप विष्ट

हेटौंडा — घरमा एक्लै भएको अवस्थामा आफ्नै फुपाजुबाट भीमफेदी गाउँपालिकाको इपापञ्चकन्याकी १४ वर्षीया बालिका बलात्कृत भइन् । गत भदौको यो घटनाका आरोपित २८ वर्षका सिंहबहादुर थिङलाई पक्राउ गरेर प्रहरीले कानुनी कारबाहीको प्रक्रिया अघि बढाएको छ ।

गत कात्तिकमा हेटौंडा उपमहानगरपालिका–८ की ४ वर्षकी छोरीलाई पटक–पटक बलात्कार गरेको आरोपमा बाबु पक्राउ परे । ती बालिकाले शिक्षकलाई बताएपछि घटना बाहिर आएको हो ।

बालबालिकाको संरक्षण, सहभागिता र विकासको क्षेत्रमा सरकारी तथा गैरसरकारी क्षेत्रबाट विभिन्न काम भइरहेको दाबी गरिए पनि परिवारका सदस्य र आफन्तबाटै बालिका बलात्कृत हुने क्रम बढ्दो छ । जिल्लामा गत आर्थिक वर्षमा ८१ वटा बलात्कारका घटना प्रहरीमा दर्ता भए । जसमध्ये १८ वर्षमुनिका ३३ बालिका छन् । ५–१६ वर्ष उमेर समूहका २१ जना बलात्कृत भएकोमा अधिकांश बालिका परिवारका सदस्य र आफन्तबाटै पीडित बनेको तथ्यांक छ । गत आवमा बलात्कृत हुनेको संख्या अघिल्लो वर्षको भन्दा दोब्बरले बढेको छ । अघिल्लो आवमा ४७ बलात्कारका घटना दर्ता भएकामा १६ वर्षमुनिका मात्रै १२ जना बालिका थिए ।

अनेक लोभलालच देखाएर छिमेकीबाटै अबोध बालिका बलात्कार हुने क्रम पनि बढेको देखिन्छ । हेटौंडा उपमहानगरपालिका–१५ का २८ वर्षीय जयराम रुम्बाले छिमेकीको घरमा आश्रय लिएर बसेकी ८ वर्षीया बालिकालाई कात्तिक १७ मा बलात्कार गरे । ती बालिका रुम्बाकै छोरीसँग खेल्न उनको घरमा आएकी थिइन् । भोगटे खान दिन्छु भनेर फकाएर उनले बालिकालाई कोठामा लगेर बलात्कार गरेको खुलेको प्रहरीले जनाएको छ । बलात्कारपछि उनले बालिकाको स्तन टोकेर घाउ बनाइदिएका थिए । पछि ती बालिका रगताम्य भई अचेत अवस्थामा भेटिएकी थिइन् । उनलाई तत्कालै हेटौंडा अस्पताल हुँदै भरतपुर लगेर उपचार गरियो । बालिका अहिले पुरुष देख्ने बित्तिकै डराउने गरेको माइती नेपाल हेटौंडाकी प्रमुख माया लामाले बताइन् । ‘उनी विक्षिप्त अवस्थामै छिन्,’ उनले भनिन् । आरोपित रुम्बालाई प्रहरीले पक्राउ गरेर कारबाही अघि बढाएको छ ।

त्यसैगरी, वाग्मती गाउँपालिका–१ राईगाउँका २२ वर्षीय रामबहादुर विकले रक्सीको उन्मादमा साढे ८ वर्षकी बालिकालाई बलात्कार गरे । हेटौंडा चुरियामाईका १८ वर्षीय सानुलाल गोलेले ११ वर्षीया बालिकालाई पैसा दिन्छु भनेर लोभ्याएर बलात्कार गरेको खुल्यो । चुरियामाईका २५ वर्षीय रामबहादुर स्याङ्बो ९ वर्षीया बालिकालाई मुख थुनेर र हटियाका शुक्र रिजाल १२ वर्षीया बालिकालाई ५ रुपैयाँ दिन्छु भन्दै फकाएर बलात्कार गरेको आरोपमा पक्राउ परे । ‘ग्रामीण क्षेत्रमा गरिबी, अशिक्षा र अभिभावकको संरक्षण अभावले बालिकाहरू बलात्कृत हुने गरेका छन्,’ जिल्ला प्रहरी कार्यालय महिला सेलकी प्रमुख चुडा खड्काले भनिन्, ‘सहरमा कुसंगत र आपराधिक मनोवृत्तिका कारण बालिकाहरू बलात्कृत भएका छन् ।’

अनुसन्धान प्रतिवेदन हेर्दा परिवारका सदस्य, छिमेकी, आफन्त तथा आपराधिक प्रवृत्तिका व्यक्तिले डर, धम्की तथा प्रलोभनमा पारेर धेरैजसो बालिका बलात्कार गर्ने गरेको पाइएको मकवानपुर प्रहरी प्रवक्ता जयश्वर रिमालले बताए । गत आवमा दर्ता भएका अधिकांश बलात्कार घटनाका आरोपितहरूलाई पक्राउ गरिएको उनले दाबी गरे । ‘अदालतले पनि कसुर ठहर गर्दै धेरेलाई हदैसम्मको दण्डसजाय गरेको छ,’ उनले भने । ‘बालिका बलात्कार गर्नेलाई समाजले दुत्कार्नुपर्छ र राज्यले कडाभन्दा कडा कारबाही गर्नुपर्छ,’ माइती नेपाल हेटौंडाकी प्रमुख लामाले भनिन्, ‘पीडितलाई गाउँ र परिवारमा पुनःस्थापना गराउन सबै पक्षले सकारात्मक सहयोग पुर्‍याउनुपर्छ ।’

प्रकाशित : श्रावण २, २०७८ ०८:३२
पूरा पढ्नुहोस्
प्रतिक्रिया
पठाउनुहोस्
×