चितवन निकुञ्जमा एकैदिन दुईवटा गैंडा मृत फेला
चितवन — चितवन राष्ट्रिय निकुञ्जको दुई फरक-फरक स्थानमा आइतबार दुईवटा मृत गैंडा भेटिएका छन् । एउटा बच्चा र अर्को अन्दाजी ३० वर्षको भाले गैंडा मृत अवस्थामा भेटिएको निकुञ्जले जनाएको छ ।
निकुञ्जका सहायक संरक्षण अधिकृत लोकेन्द्र अधिकारीले बच्चा गैंडालाई बाघले आक्रमण गरेको बताए । अन्दाजी दुई महिनाको सो भाले बच्चा गैंडा निकुञ्ज मुख्यालय कसरा नजिक जंगलमा मृत भेटिएको थियो ।
त्यस्तै, आइतबार नै निकुञ्जको पश्चिम क्षेत्र टेम्पल टाइगर रतनपुरीघाट पारी अमलटारी क्षेत्रको नारायणी नदी किनारमा अर्को गैंडा मृत भेटिएको हो । यो गैंडाको पनि खाग,खुर सुरक्षित भएकाले दुर्घटना वा अन्य केही कारणले मरेको हुन सक्ने अधिकारीले बताए ।
आर्थिक वर्ष ०७७/७८ मा निकुञ्ज र यस असपासको क्षेत्रमा ३२ वटा गैंडा मृत भेटिएको अधिकारीले जानकारी दिए । जसमध्ये चारवटा गैंडा चोरी सिकारीका लागि तस्करहरुले मारेका थिए । एक सिंगे गैंडा विश्वमा लोप हुने अवस्थामा पुगेको दुर्लभ वन्यजन्तु हो । नेपालमा रहेका ७५२ गैंडामध्ये चितवनमा मात्रै ६९४ वटा छन् ।
प्रकाशित : श्रावण ४, २०७८ १५:२३