चितवन — चितवन राष्ट्रिय निकुञ्जको निषेधित क्षेत्रभित्र प्रवेश गरेका स्थानीय युवकलाई कुटपिट गर्दा मृत्यु भएको घटनामा नेपाली सेनाका हुद्दा चिरणकुमार बुढालाई चितवन जिल्ला अदालतले दोषी ठहर गरेको छ ।

जिल्ला न्यायाधीश गायत्रीप्रसाद रेग्मीले सोमबार बुढालाई नौ महिना कैद र नौ हजार रुपैयाँ जरिवाना हुने फैसला गरेको अदालतका स्रेस्तेदार तथा सूचना अधिकारी ईश्वर आचार्यले जानकारी दिए ।

‘पीडित पक्षलाई दुई लाख रुपैयाँ क्षतिपूर्ति भराउने र पीडित राहत कोषमा दुई सय रुपैयाँ जम्मा गराउन पनि फैसलामा भनिएको छ,’ आचार्यले भने । कैद समय भुक्तान भइसकेका कारण हुद्दा चिरणकुमार बुढा सोमबारै कारागारबाट मुक्त भएका छन् । पूर्वी चितवन राप्ती नगरपालिका–२ पिप्ले मिलन चोकका २४ वर्षीय राजकुमार चेपाङलाई नियन्त्रणमा लिएर कुटपिट गर्दा मृत्यु भएपछि बुढाविरुद्ध मुद्दा दर्ता भएको थियो ।

राजकुमारसहित मिलनटोलका सात युवायुवती जंगलमा न्युरो, अमिलो र खोलाका घोगी टिप्न गत वर्ष साउन १ गते दिउँसो घरबाट हिँडेका थिए । राप्ती खोला तरेर चितवन राष्ट्रिय निकुञ्जको सिमानाभित्र रहेको ज्युँडी खोलामा घोगी टिप्दै गर्दा उनीहरूलाई सेनाले नियन्त्रणमा लिएको थियो । नियन्त्रणमा लिएपछि बुढाले राजकुमार र अन्य युवालाई कुटपिट गरेको स्थानीयले बताएका थिए ।

त्यसपछि बिरामी भएका राजकुमारको हप्ता दिनपछि उपचारका लागि भरतपुर अस्पताल लैजाँदा निधन भएको थियो । राजकुमारका बाबु विष्णुलालले कुटपिटमा संलग्नलाई कारबाही गर्न गत वर्षको भदौ २५ गते चितवन जिल्ला प्रहरी कार्यालयमा किटानी जाहेरी दिएका थिए ।

विष्णुलालले दिएको किटानी जाहेरीमा वटुक दल गणको अप्रेसनल अन्डर कमान्ड सिद्धिबक्स गणको प्यारीधाप गुल्मको लिगलिग पोस्टमा कार्यरत हुद्दा वर्ष ४० का चिरणकुमार बुढाले छोरालाई कुटपिट गरेको उल्लेख छ । किटानी जाहेरी परेको १० दिनपछि असोज ४ मा प्रहरीले बुढालाई पक्राउ गरेको थियो ।