द्वन्द्वपीडितलाई डेढ करोड- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

द्वन्द्वपीडितलाई डेढ करोड

३० स्थानीय तहका द्वन्द्वपीडितले मात्र पाए रकम
प्रताप विष्ट

हेटौंडा — वाग्मती प्रदेश सरकारले द्वन्द्वपीडित वा उनका परिवारको औषधोपचार, स्वरोजगार र सीप विकास तालिमका लागि चालु आर्थिक वर्षमा डेढ करोड रुपैयाँ खर्चेको छ । द्वन्द्वपीडित आफैं वा परिवारका एक सदस्यलाई आन्तरिक मामिला तथा कानुन मन्त्रालयले औषधोउपचार, स्वरोजगार र सीप विकास तालिमका लागि प्रतिव्यक्ति बढीमा ३० हजार रुपैयाँ उपलब्ध गराएको हो । 

मन्त्रालयले प्रदेशका १ सय १९ वटा स्थानीय तहसँग द्वन्द्वपीडितको सूची माग गरेको थियो । द्वन्द्वपीडितलाई औषधि उपचार, सीप विकास तालिम र स्वरोजगार के लागि सहयोग आवश्यक परेको हो, सम्बन्धित स्थानीय तहमार्फत मन्त्रालयमा सिफारिस गर्नुपर्ने व्यवस्था गरिएको थियो । जसअनुसार चालु आवमा प्रदेशका ३० वटा स्थानीय तहले मात्र यस्तो सिफारिस पठाएका थिए । उक्त सिफारिसका आधारमा सम्बन्धित पालिकामा रकम निकासा गरिएको मन्त्रालयका सचिव मदन भुजेलले बताए ।

उनका अनुसार २ सय २७ जना द्वन्द्वपीडितलाई औषधोपचार खर्च, १७ जनालाई सीप विकास र ५७ जनालाई स्वरोजगारका निम्ति १ करोड ५१ हजार रुपैयाँ मन्त्रालयबाट निकासा भएको छ । द्वन्द्वपीडितका लागि सबैभन्दा बढी रकम नुवाकोटको बेलकोटगढी गाउँपालिकामा पुगेको छ । त्यहाँका ५७ जनालाई १७ लाख ३० हजार रुपैयाँ प्रदान गरिएको हो । प्रदेश सरकारले द्वन्द्वपीडितका लागि विगत वर्षदेखि नै बजेट विनियोजन गर्दै आएको थियो । तर स्थानीय तहहरूले द्वन्द्वपीडितको सहयोगका निम्ति नामसहित सिफारिस नगरिँदा विनियोजित रकम फ्रिज हुँदै आएको छ ।

द्वन्द्वपीडितहरूका लागि चालु आवमा साढे २ करोड रुपैयाँ बजेट छुट्याइएको थियो । तर अघिल्ला वर्षहरूमा जस्तै यसपटक पनि झन्डै एक करोड रुपैयाँ फ्रिज हुने देखिएको छ । स्थानीय तहको बेवास्ताले रकम फिर्ता हुने गरेको मन्त्रालयका एक अधिकृतले बताए । ‘कैयौं पालिकाले उक्त कार्यक्रमप्रति ध्यान नै दिएनन्,’ उनले भने ।


प्रकाशित : असार २७, २०७८ १०:२६
प्रतिक्रिया
पठाउनुहोस्

वाग्मती प्रदेशका १३ वटै जिल्लामा शीतभण्डार बन्दै

प्रताप विष्ट

हेटौंडा — वाग्मती प्रदेशले प्रदेशका १३ वटै जिल्लामा शीतभण्डार (कोल्ड स्टोर) निर्माण गरिरहेको छ । स्थानीय सहकारी संस्था र निजी कम्पनीसँगको साझेदारीमा शीतभण्डार निर्माण कार्य अगाडि बढाइएको भूमि व्यवस्था, कृषि तथा सहकारी मन्त्रालयले छ ।

मकवानपुरको थाहा नगरमा वाग्मती प्रदेश सरकार र सहकारीको लगानीमा निर्माणाधीन शीतभण्डार । तस्बिर : प्रताप विष्ट/कान्तिपुर

मन्त्रालयका अनुसार अधिकांश शीतभण्डार निर्माणको अन्तिम चरणमा छन् । यसका लागि मन्त्रालय र साझेदार संस्थाहरूसमेतको गरी ९७ करोड ८३ लाख ६३ हजार रुपैयाँ लगानी भएको छ । किसानद्वारा उत्पादित तरकारी र फलफूललाई धेरै दिनसम्म ताजै राख्न शीतभण्डार निर्माण भइरहेको हो ।

प्रदेश सरकारले बजेटमा घोषणा गरेको ‘एक जिल्ला, एक शीतभण्डार’ कार्यक्रमअन्तर्गत मकवानपुरको थाहा नगरपालिकामा पनि शीतभण्डार निर्माण कार्य अन्तिम चरणमा पुगेको छ । प्रदेश सरकारको ७० प्रतिशत र सहकारीको ३० प्रतिशतको लगानीमा निर्माण भइरहेको कोल्ड स्टोर चालु आर्थिक वर्षबाट सञ्चालनमा आउने नगरपालिकाले जनाएको छ । नगरपालिकाको समन्वयमा थाहा–३ मा १० रोपनी क्षेत्रफलमा निर्माणाधीन शीतभण्डारको सञ्चालन सहकारीले गर्ने नगरप्रमुख लवशेर विष्टले बताए ।

११ करोड ४७ लाख रुपैयाँमा ठेक्का सम्झौता गरी २०७६ कात्तिक ९ बाट केन्द्रको निर्माण थालिएको थियो । १ हजार ७ सय मेट्रिक टन क्षमताको उक्त शीतभण्डार निर्माणका लागि प्रदेश सरकारले ८ करोड ३ लाख र उत्तरी क्षेत्रका २७ वटा सहकारीले ३ करोड ४४ लाख रुपैयाँ लगानी गरेका छन् । उक्त कोल्डस्टोरबाट तरकारीको पकेट क्षेत्रका रूपमा रहेको थाहा, इन्द्रसरोवर र कैलाश गाउँपालिकाका कृषकहरू लाभान्वित हुनेछन् ।

शीतभण्डार निर्माण भएपछि उत्तरी क्षेत्रका किसानले बढी मूल्य तिरेर अन्यत्र भण्डारण गर्नुपर्ने समस्याको अन्त्य हुने र कृषकको ठूलो रकमसमेत बचत हुने विष्टको भनाइ छ । जिल्लामा तरकारी उत्पादनमा अग्रणी थाहा नगरपालिकामा योसँगै सानाठूला ४ वटा शीतभण्डार हुने भएका छन् । थाहा–६ मा साना किसान कृषि सहकारी संस्थाले ३ वर्षअघिबाट शीतभण्डार सञ्चालन गर्दै आएको छ ।

नेपाल सरकारको २० लाख र सहकारीको करिब ६० लाख रुपैयाँ लागतमा शीतभण्डार सञ्चालनमा ल्याइएको हो । ५५ टन क्षमताको उक्त शीतभण्डारमा मुख्य गरी आलु राख्ने गरिएको छ । थाहा–२ मा निजी क्षेत्रको मैना कृषि सेवा प्रालिले पनि शीतभण्डार सञ्चालन गरेको छ ।

प्रकाशित : असार २१, २०७८ ११:३५
पूरा पढ्नुहोस्
प्रतिक्रिया
पठाउनुहोस्
×