वाग्मती प्रदेशका १३ वटै जिल्लामा शीतभण्डार बन्दै- वाग्मती - कान्तिपुर समाचार

वाग्मती प्रदेशका १३ वटै जिल्लामा शीतभण्डार बन्दै

प्रताप विष्ट

हेटौंडा — वाग्मती प्रदेशले प्रदेशका १३ वटै जिल्लामा शीतभण्डार (कोल्ड स्टोर) निर्माण गरिरहेको छ । स्थानीय सहकारी संस्था र निजी कम्पनीसँगको साझेदारीमा शीतभण्डार निर्माण कार्य अगाडि बढाइएको भूमि व्यवस्था, कृषि तथा सहकारी मन्त्रालयले छ ।

मकवानपुरको थाहा नगरमा वाग्मती प्रदेश सरकार र सहकारीको लगानीमा निर्माणाधीन शीतभण्डार । तस्बिर : प्रताप विष्ट/कान्तिपुर

मन्त्रालयका अनुसार अधिकांश शीतभण्डार निर्माणको अन्तिम चरणमा छन् । यसका लागि मन्त्रालय र साझेदार संस्थाहरूसमेतको गरी ९७ करोड ८३ लाख ६३ हजार रुपैयाँ लगानी भएको छ । किसानद्वारा उत्पादित तरकारी र फलफूललाई धेरै दिनसम्म ताजै राख्न शीतभण्डार निर्माण भइरहेको हो ।

प्रदेश सरकारले बजेटमा घोषणा गरेको ‘एक जिल्ला, एक शीतभण्डार’ कार्यक्रमअन्तर्गत मकवानपुरको थाहा नगरपालिकामा पनि शीतभण्डार निर्माण कार्य अन्तिम चरणमा पुगेको छ । प्रदेश सरकारको ७० प्रतिशत र सहकारीको ३० प्रतिशतको लगानीमा निर्माण भइरहेको कोल्ड स्टोर चालु आर्थिक वर्षबाट सञ्चालनमा आउने नगरपालिकाले जनाएको छ । नगरपालिकाको समन्वयमा थाहा–३ मा १० रोपनी क्षेत्रफलमा निर्माणाधीन शीतभण्डारको सञ्चालन सहकारीले गर्ने नगरप्रमुख लवशेर विष्टले बताए ।

११ करोड ४७ लाख रुपैयाँमा ठेक्का सम्झौता गरी २०७६ कात्तिक ९ बाट केन्द्रको निर्माण थालिएको थियो । १ हजार ७ सय मेट्रिक टन क्षमताको उक्त शीतभण्डार निर्माणका लागि प्रदेश सरकारले ८ करोड ३ लाख र उत्तरी क्षेत्रका २७ वटा सहकारीले ३ करोड ४४ लाख रुपैयाँ लगानी गरेका छन् । उक्त कोल्डस्टोरबाट तरकारीको पकेट क्षेत्रका रूपमा रहेको थाहा, इन्द्रसरोवर र कैलाश गाउँपालिकाका कृषकहरू लाभान्वित हुनेछन् ।

शीतभण्डार निर्माण भएपछि उत्तरी क्षेत्रका किसानले बढी मूल्य तिरेर अन्यत्र भण्डारण गर्नुपर्ने समस्याको अन्त्य हुने र कृषकको ठूलो रकमसमेत बचत हुने विष्टको भनाइ छ । जिल्लामा तरकारी उत्पादनमा अग्रणी थाहा नगरपालिकामा योसँगै सानाठूला ४ वटा शीतभण्डार हुने भएका छन् । थाहा–६ मा साना किसान कृषि सहकारी संस्थाले ३ वर्षअघिबाट शीतभण्डार सञ्चालन गर्दै आएको छ ।

नेपाल सरकारको २० लाख र सहकारीको करिब ६० लाख रुपैयाँ लागतमा शीतभण्डार सञ्चालनमा ल्याइएको हो । ५५ टन क्षमताको उक्त शीतभण्डारमा मुख्य गरी आलु राख्ने गरिएको छ । थाहा–२ मा निजी क्षेत्रको मैना कृषि सेवा प्रालिले पनि शीतभण्डार सञ्चालन गरेको छ ।

प्रकाशित : असार २१, २०७८ ११:३५
प्रतिक्रिया
पठाउनुहोस्

कुलेखानीमा पानीको सतह १० मिटर बढ्यो

प्रताप विष्ट

हेटौंडा — जलाधार क्षेत्रमा भारी वर्षा भएकाले कुलेखानी जलाशयमा तीन दिनमा करिब १० मिटर पानीको सतह बढेको छ । जलाधार क्षेत्रमा असार १५ देखि १८ गतेसम्म भारी वर्षा भएकाले पानी सतह ह्वात्तै वृद्धि भएको हो ।

गत वर्ष जलाधार क्षेत्रमा थोरै वर्षा भएकाले कुलेखानी भरिएको थिएन । ‘यो वर्ष असार मध्यमै वर्षा धेरै भएकाले जलाशय चाँडै भरिन सक्छ,’ कुलेखानी प्रथमका प्रमुख धीरेन्द्र चौधरीले भने, ‘दुई वर्षदेखि कुलेखानी भरिएको थिएन, यो वर्ष भरिन्छ ।’

नेपाल विद्युत् प्राधिकरण ‘ब्याकअप’ का रूपमा रहेको कुलेखानी जलाशयमा शुक्रबार दिउँसो तीन बजेसम्म १ हजार ५ सय ११.११ सेन्टिमिटर पानी संकलन भएको छ । यो वर्ष वर्षायाम सुरु हुनुअघि जलाशयमा १ हजार ५ सय २ मिटर पानीको सतह थियो । असार १५ मा जलाशयमा १ हजार ५ सय २.३३ सेन्टिमिटर पानी थियो । १५ देखि १८ गतेसम्म जलाधार क्षेत्रमा लगातार वर्षा भएकाले तीन दिनमै जलाशयमा करिब १० मिटर पानीको सतह बढेको हो । ‘यी तीन दिनमा दैनिक ३ मिटरभन्दा बढी पानीको सतह बढ्यो,’ आयोजना प्रमुख चौधरीले भने । जलाशयको पानी १ हजार ४ सय ८४ मिटरसम्म प्रयोग गर्न सकिन्छ । गत वर्षको यही अवधिमा १ हजार ५ सय ३ मिटर मात्र पानीको सतह थियो ।

इन्द्रसरोवर गाउँपालिकामा पर्ने जलाशयको क्षमता १ हजार ५ सय ३० मिटर पानी संकलन गर्ने छ । ‘कुलेखानी भरिन करिब २० मिटर मात्र बाँकी छ,’ कुलेखानी प्रथमका एक प्राविधिकले भने, ‘जलाधार क्षेत्रमा एक/दुई घण्टा भारी वर्षा भयो भने एक दिनमा दुई/तीन मिटर नै पानीको सतह बढ्छ ।’ जलाशयको पानीको खपत अहिले छैन । वर्षायाम भएका कारण कुलेखानी पिक समयमा पनि सञ्चालन गर्नुपरेको छैन ।

कुलेखानी पहिलोबाट ६०, दोस्रोबाट ३२ र तेस्रोवाट १४ गरी १ सय ६ मेगावाट बिजुली उत्पादन हुने गरेको छ ।

प्रकाशित : असार १८, २०७८ २०:१७
पूरा पढ्नुहोस्
प्रतिक्रिया
पठाउनुहोस्
×