जोखिमयुक्त क्षेत्रमै संरचना निर्माण- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

जोखिमयुक्त क्षेत्रमै संरचना निर्माण

टीकाप्रसाद भट्ट

रामेछाप — दुई वर्षअघि अति जोखिमयुक्त क्षेत्र मानिएको रणजोर खोलाको बगरमा घर निर्माण हुन थालेपछि मन्थली नगरपालिकाले रोक्यो । घर निर्माण गर्ने पक्ष अदालत पुग्यो, फैसला पक्षमा आएन, निर्माण रोकियो । अहिले त्यही स्थानमा थोरै–थोरै गरेर संरचना थप्ने काम भइरहेको छ ।

रामेछापको मन्थली नगरपालिका-१ मा पर्ने रणजोर खोला र किनारको बस्ती । तस्बिर : टीकाप्रसाद भट्ट/कान्तिपुर

अतिक्रमण पनि बढेको छ । पानी बग्ने क्षेत्रमा माटो थुपारेर खोला उकास गरी घडेरी किनबेच र बसोबासका लागि स्थायी संरचना निर्माण भइरहेका हुन् ।

मन्थली नगर प्रमुख रमेश बस्नेत भन्छन्, ‘जोखिमयुक्त क्षेत्र हो, घर नबनाउनुभन्दा हाम्राविरुद्ध अदालतमा मुद्दा हाल्छन्, नक्सापासबिनै घर बनाउँछन्,’ उनले नदी किनारमा घर बनाउन रोक्न खोज्दा धेरै दबाब आउने गरेको बताए ।

लेदोसहित बग्ने रणजोरको बाढीले हजारौं रोपनी खेत विनाश गरिसकेको छ, पटक–पटक बनाइएका तटबन्धहरू बगाएको छ । यसबारे जानकार हुँदाहुँदै पनि स्थानीय बगर उकासेर घडेरीको रूपमा किनबेच र बसोबास गर्दै आएका छन् । रणजोरको पुल २ स्पानको छ । स्थानीयले माटो पुरेर खोलाको बहाव परिवर्तन गर्दा एक स्पानमा बुझो लागेको छ । नगरको वडा १, २, ३, ४, ६, ७ र ८ बाढीको उच्च जोखिममा छन् । जुन क्षेत्रमा रणजोर र तामाकोसी नदीको कटान हुँदै आएको छ । तर नगरपालिकाले आगामी वर्षको बजेटमा विपद् व्यवस्थापन शीर्षकमा न्यून बजेट विनियोजन गरेको छ ।

केही दिनअघि सिन्धुपाल्चोकको मेलम्चीकैजस्तो अवस्था भए सदरमुकाम रहेको आकाशे क्षेत्रसमेत डुबानमा पर्ने जोखिम छ । ‘तिब्बतमा खोला थुनिएको सूचनाले २ दिनसम्म हाम्रो निद्रा खोसियो,’ स्थानीय मानबहादुर माझी भन्छन्, ‘बाढी आउँछ भनेपछि भाग्यौं, हल्ला शान्त भएपछि फेरि फर्केर घरमा बस्यौं । यो क्रम २ दिनसम्म चल्यो ।’

पछिल्लो वर्षदेखि सरकारले पनि यस्तै क्षेत्रमा करोडौंका संरचना निर्माण गरिरहेको छ । मन्थलीको भुत्याहा खोलामा तीनै सरकारको लगानीमा भवन निर्माण भइरहेका छन् । हिंसापीडित महिला र बालबालिकाहरूलाई आश्रय दिन बनाइएको सुरक्षित आवास गृह (सेफ हाउस) पनि खोलाको बगरमा छ । विगतमा खोला बग्ने गरेको स्थानमै प्रदेशको खानेपानी डिभिजन, कभर्डहल र प्राथमिक स्वास्थ्य केन्द्रका भवन बनाइएका छन् ।

प्रकाशित : असार १४, २०७८ १०:५३
प्रतिक्रिया
पठाउनुहोस्

जुवाखालबाट ५ जना पक्राउ

टीकाप्रसाद भट्ट

रामेछाप — रामेछापको सदरमुकाम मन्थलीबाट जुवा खेल्दै गरेका ५ जनालाई शुक्रबार मध्यराति प्रहरीले पक्राउ गरेको छ । जुवाखालबाट कौडासहित नगद समेत बरामद भएको प्रहरीले जनाएको छ ।

जिल्ला प्रहरी कार्यालय रामेछापका प्रहरी नायब उपरीक्षक नबराज ढुंगानाका अनुसार कोभिड संक्रमणका बेला लगाएको निषेधाज्ञा समेतलाई अवज्ञा गरी जुवा खेलिरहेको सूचनाका आधारमा मन्थली–१ घारीटोलका चन्दबहादुर माझीको घरमा प्रहरीले मध्यरात छापा मारेको थियो ।

छापा मार्ने क्रममा जुवा खेलिरहेको अवस्थामा घरधनी चन्द्रबहादुर माझी, मन्थली–६ हातिटारका तेजबहादुर माझी, मन्थली–८ गाईखुराका आइते माझी, मन्थली ९ पुरानागाउँका टिकाराज आरण र सिन्धुली जिल्ला सुनकोशी गाउँपालिका–१ का नरेन्द्र माझीलाई कौडा र नगदसहित पक्राउ गरीएको हो । पक्राउ गरीएकाको साथबाट १ लाख ९२ हजार ९ सय ५० रुपैयाँ नगद बरामद गरिएको छ ।

प्रहरीले पक्राउ परेका पाँचै जनाविरुद्ध जुवा ऐन अन्तर्गत मुद्दा दर्ता गरी अनुसन्धान अघि बढाउने भएको छ । निषेधज्ञाको अवज्ञा गरेकाले थप मुद्दामा समेत मुद्दा चलाउनेबारे प्रहरीले छलफल गरिरहेको छ ।

प्रकाशित : असार १२, २०७८ १३:२४
पूरा पढ्नुहोस्
प्रतिक्रिया
पठाउनुहोस्
×