गेग्रान र लेदोले राजमार्गमा सधैं समस्या

पृथ्वी राजमार्गसमेत कार्यक्षेत्र रहेको डिभिजन सडक कार्यालय चितवनले समेत राजमार्ग अवरुद्ध हुने मुख्य कारण पहिरो र लेदो रहेको जनाएको छ ।

गत शुक्रबार राजमार्ग सुरक्षा समितिका अध्यक्षसमेत रहेका प्रमुख जिल्ला अधिकारी ज्ञानप्रसाद ढकाल र जिल्ला समन्वय समितिका संयोजक जगन्नाथ नेपाललाई राजमार्गको स्थलगत अध्ययन गराउँदै गजुरीस्थित सडक विभागको साइट क्याम्पले राजमार्गसँग जोड्न मापदण्डविपरीत जथाभावी निर्माण गरिएका शाखा सडक, अवैध र मापदण्डविपरीतका बालुवा तथा ढुंगाखानीलाई तत्काल रोक्न आग्रह गरेको छ ।

तीमध्ये १३ वटा शाखा सडक राजमार्गलाई प्रत्यक्ष असर गर्ने गरी जोखिमयुक्त रहेको गजुरीस्थित डिभिजन सडक कार्यालयको सहायक क्याम्पका इन्जिनियर कृष्णबहादुर खड्काले बताए ।

पृथ्वी राजमार्गसँग जोड्नकै लागि मात्र ५ स्थानीय तहले कुल ८४ किलोमिटर लम्बाइ भएका ७४ वटा सडक खनेका छन् । कतिपय सडक ढुंगा र बालुवा खानीबाट निर्माण सामग्री ढुवानीका लागि बनाइएका छन् । यस्ता सडक व्यापारीले आफ्नै खर्चमा खनेका छन् । राजमार्गमा पहिरो आएर सबैभन्दा बढी सडक अवरुद्ध हुने बेनीघाट क्षेत्र हो । बालुवा र रातोमाटोको लेदोले अवरुद्ध हुने गजुरी र गल्छी हो । हेटौंडा सिमेन्ट उद्योगले बेनीघाटको जोगीमारा क्षेत्रमा २०३० सालदेखि सञ्चालनमा ल्याएको चुनढुंगा खानी र जवाङ खोलाको हिमाल सिमेन्टको खानीले प्रयोग गर्ने विस्फोटक पदार्थ, पहरा फुटाउन प्रयोग हुने डोजरका ब्रेकरहरूले थिलथिलो पहाड नै हाल पहिरो आउने मुख्य कारण रहेको सडक विभागको निष्कर्ष छ ।

विगत ४८ वर्षदेखि देशका विभिन्न सिमेन्ट उद्योगहरूलाई चुनढुंगा बेच्ने यी २ वटा खानी सञ्चालकले वातावरणीय सर्त पालना नगरेको विभागको आरोप छ । राजमार्गदेखि माथिल्लो भागमा रहेका खानीबाट निस्केको ग्रेगानको व्यवस्थापन गर्नुको साटो राजमार्गतिरै जथाभावी मिल्काइदिँदा वर्षा भयो कि सिधै राजमार्गमा आएर यातायात अवरुद्ध र सवारीसाधनहरू पुरिने गरेका छन् ।

ग्रेगान व्यवस्थापन गर्न नसक्दा खानी सञ्चालक आफैंलाई पनि घाटा पुगेको छ । गत साउन ५ मा जवाङ खोलास्थित खानी सञ्चालक अन्नपूर्ण क्वेरिजका १० वटा टिपर र ४ वटा डोजरलगायतका उपकरण, अस्थायी प्रहरी चौकीको कार्यालयसमेत ग्रेगानले पुरेको थियो ।

२०४६ मंसिरमा जोगीमाराको पहिरोले एउटा बस त्रिशूलीमा बगाएर बेपत्ता पारेको थियो । त्यतिबेला बंगलादेशबाट बोलाइएका गोताखोरले समेत उक्त बस फेला पार्न सकेका थिएनन् । त्यही पहिरो गएको स्थानमा पर्खाल लगाएर रोकथाम गरिए पनि ३१ वर्षपछि गत वर्षदेखि पुनः सोही स्थानमा पहिरो जान सुरु भएको छ । ‘सडक विभागको सहयोगमा हामी गत वैशाखदेखि नै दिनरात बेनीघाटदेखि गल्छीसम्मका पहिरो र बालुवा लेदो पन्छाउनमै व्यस्त छौं,’ गजुरीस्थित जिल्ला ट्राफिक प्रहरी निरीक्षक सुदर्शन जोशीले भने ।