९६ किलो गाँजासहित पाँच जना पक्राउ
मकवानपुर — मकवानपुर प्रहरीले लागुऔषध गाँजासहित पाँच जनालाई पक्राउ गरेको छ । प्रहरीले हेटौंडा–१० स्थित बजार क्षेत्रबाट ९६ किलो गाँजा बोकेको कन्टेनर नियन्त्रणमा लिएको हो ।
पक्राउ पर्नेमा गाडीका चालक मकवानपुर मनहरी–६ का २५ वर्षीय सन्तोष आलेमगर, सहचालक २१ वर्षीय मोसा घलान, कन्टेनरमा सवार कैलाश–८, भार्ताका २४ वर्षीय उमेश लामा रहेका छन् । उनीहरूकै सूचनाका आधारमा बुधबार चितवन राप्ती–२ का ३१ वर्षीय विष्णु लामा र मकवानपुरको कैलाश–८ का २९ वर्षीय रोशन मोक्तानलाई पनि पक्राउ गरिएको जिल्ला प्रहरी कार्यालयका प्रवक्ता एवम् प्रहरी नायब उपरीक्षक जयश्वर रिमालले जानकारी दिए ।
प्रहरीका अनुसार ना२ख ५५७९ नम्बरको कन्टेनरमा गाँजा ल्याइएको गोप्य सूचनाका आधारमा हेटौंडा–११ थानाभन्ज्याङमा रोक्न खोज्दा भागेपछि पिछा गर्दै हेटौंडा–१० भुटनदेवी मोडबाट गाडी नियन्त्रणमा लिइएको हो । चालक बस्ने सिटपछाडि फल्स बटम बनाई १२ वटा पोकामा ९६ किलो ४ सय ग्राम गाँजा बरामद भएको रिमालले जानकारी दिए ।