चितवनमा असार ३ गतेसम्म निषेधाज्ञा- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

चितवनमा असार ३ गतेसम्म निषेधाज्ञा

रमेशकुमार पौडेल

चितवन — कोरोना संक्रमण तीव्र भएसँगै वैशाख १६ गते मध्यरातबाट चितवनमा लागेको निषेधाज्ञा असार ३ गतेसम्म कायम रहने छ । तर अघिल्ला दिनहरुमा भन्दा आउँदो शुक्रबारबाट निषेधाज्ञा केही खुकुलो हुने भएको छ । चितवनका प्रमुख जिल्ला अधिकारी प्रेमलाल लामिछानेले बुधबार जारी गरेको सूचनामा होटल तथा रेष्टुरेन्टबाट टेक अवे सेवा सञ्चालन गर्न पाइने उल्लेख छ । 

निषेधाज्ञाका बेला मंगलबार दिउँसो भरतपुर गोन्द्राङ क्षेत्रमा देखिएको दृश्य । केही दिनयता चितवनमा चहल पहल बढ्दो छ । तस्बिर : रमेशकुमार पौडेल/कान्तिपुर ।

पुस्तक पसलबाट विद्यालयसम्म पाठ्य पुस्तक पुर्‍याने गाडी पनि चल्न छुट हुने भएको छ । खाद्यन्न, तरकारी, माछा मासु, दाना, अण्डा, एग्रोभेट पसलहरु बिहान ६ बजेदेखि १० बजेसम्म खोल्न पाइने छ । यसअघि खाद्यन्न पसल हप्तामा तीन दिन बिहान ९ बजेसम्म मात्रै खुल्दथे । जनस्वास्थ्य मापदण्ड पालना गरी पाठ्य पुस्तक बेच्ने पसलहरु खोल्न पनि छुट भएको छ । अत्यावश्यक कामका लागि बैंकहरु पनि खुल्ने छन् ।

सुरुमा वैशाख मसान्त मध्यरातसम्म निषेधाज्ञा लागेको थियो । तर कोरोना नियन्त्रणमा नआएपछि समय थप हुँदै गएको हो । सरकारी विवरण अनुसार पछिल्लो समय चितवनमा संक्रमणमा केही कमी आएको देखिन्छ । चितवन स्वास्थ्य कार्यालयले बुधबार जारी गरेको विवरण अनुसार चितवनमा निको हुन बाँकी सक्रिय संक्रमितको संख्या एक हजार ७२९ छ । जेठ १४ मा सक्रिय संक्रमितको संख्या सर्वाधिक चार हजार ९३५ थियो ।

त्यसै गरी बुधबार चितवनमा जिल्लाका दुईजनासहित पाँचजनाको मृत्यु भएको छ । पछिल्लो समय चितवनमा जिल्लाका आठजनासहित उपचार गराउन भरतपुरका अस्पतालमा आएका संक्रमितहरुसमेत गर्दा एकै दिन २० जनासम्म संक्रमितको ज्यान गएको थियो । बुधबार भरतपुरका विभिन्न अस्पतालहरुमा ३१२ जना संक्रमितको उपचार भइरहेको छ । जेठ ४ मा सबैभन्दा धेरै अस्पतालमा ५३७ जना संक्रमित थिए । संक्रमणका कारण हालसम्म चितवनका २३३ जनाले ज्यान गुमाएको स्वास्थ्य कार्यालयले जनाएको छ ।

प्रकाशित : जेष्ठ २६, २०७८ १६:५२
प्रतिक्रिया
पठाउनुहोस्

नेप्से दोहोरो अंकले घट्यो, झण्डै १७ अर्बको सेयर कारोबार

कान्तिपुर संवाददाता

काठमाडौँ — सेयर कारोबार मापक नेप्से परिसूचक बुधबार दोहोरो अंकले घटेको छ । अघिल्लो दिनको तुलनामा १३.५६ अंकले घटेपछि समग्र नेप्से २ हजार ९ सय ४६.५८ अंकमा बन्द भएको छ । 

मंगलबारको तुलनामा नेप्से ०.४६ प्रतिशतले कम हो । बढी रहेको बजारमा लगानीकर्ताले नाफा सुरक्षण गर्न लागेपछि समग्र नेप्सेमा दबाब परेको हो ।

नेप्से परिसूचक घटेपनि अघिल्लो दिनको तुलनामा कारोबार रकम भने बढेको छ । करिब १ लाख ५५ हजार वटा कारोबारबाट २ सय २१ कम्पनीका ३ करोड १३ लाख ३५ हजार २२ कित्ता सेयर किनबेच भए । ती किनबेचबाट १६ अर्ब ९९ करोड रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम करिब ४ करोड रुपैयाँ बढी हो । मंगलबार १६ अर्ब ९५ करोड रुपैयाा बराबरको सेयर कारोबार भएको थियो ।

नेप्से परिसूचकसँगै सेयर बजारको आकार कुल बजार पुँजीकरण पनि केही घटेको छ । बुधबार सेयर बजारमा ४० खर्ब ९० अर्ब रुपैयाँ कूल बजार पुँजीकरण कायम भएको छ । अघिल्लो दिन यो सूचक ४१ खर्ब ९ अर्ब रुपैयाँ थियो । यस्तै, सो दिन सेन्सेटिभ परिसूचक ०.५४ प्रतिशत र फ्लोट परिसूचक ०.५ प्रतिशतले घटेको छ ।

उत्पादन तथा प्रशोधन उपसमूहको परिसूचक बुधबार सबैभन्दा बढी ३.९८ प्रतिशतले बढेको छ । यसैगरी, वित्त कम्पनी उपसमूहको परिसूचक २.०४, व्यापारिकको १.९२, निर्जीवन बीमाको ०.२६, जीवन बीमाको ०.१५ र सामूहिक लगानी कोष उपसमूहको ०.०३ प्रतिशतले उकालो लागे । तर, विकास बैंक उपसमूहको परिसूचक सबैभन्दा बढी ४.४१ प्रतिशतले घट्यो । सो दिन बैकिङ उपसमूहको परिसूचक ०.५८, होटल्स तथा पर्यटनको ०.०६, जलविद्युतको ०.५३, अन्यको १.३६, लघुवित्तको ०.३४ र लगानी उपसमूहको परिसूचक ०.९८ प्रतिशत परिसूचक घटे ।

प्रकाशित : जेष्ठ २६, २०७८ १६:३९
पूरा पढ्नुहोस्
प्रतिक्रिया
पठाउनुहोस्
×