हेटौंडामा रोकियो कोभिड–१९ विरुद्धको खोप अभियान - वाग्मती - कान्तिपुर समाचार
कान्तिपुर वेबसाईट
AdvertisementAdvertisement

हेटौंडामा रोकियो कोभिड–१९ विरुद्धको खोप अभियान 

सुवास विडारी

हेटौंडा — हेटौंडा उपमहानगरपालिका क्षेत्रमा आज बुधबारबाट सञ्चालन गर्ने भनिएको कोभिड–१९ विरुद्धको खोप अभियान रोकिएको छ ।

हेटौंडा बजार । फाइल तस्बिर : कान्तिपुर

उपमहानगरभित्रका ६२ वर्षदेखि ६४ वर्ष उमेरका नागरिकलाई भेरोसेल खोप लगाउने कार्यक्रम देशभर सञ्चालन भइरहँदा हेटौंडामा रोकिएको हो । बिहान १० बजेबाट खोप लगाउन सम्पूर्ण तयारी पूरा भएको अवस्थामा मेयर हरिबोल महतले तत्काललाई खोप अभियान रोक्न निर्देशन दिएको कर्मचारीले बताएका छन् ।

हेटौंडाका १९ वटै वडामा खोपका लागि टोली परिचालन भइसकेको थियो । मेयर महतको आदेशमा खोप लगाउन रोकिएपछि स्वास्थ्यकर्मी, लक्षित वर्ग र वडाध्यक्षहरु पनि अन्योलमा परेका छन् ।

‘के कति कारणले रोकियो थाहा छैन । प्राविधिक कारण भनिएको छ । हामी छलफलमा जुट्दै छौँ,’ हेटौंडा–१ का वडाध्यक्ष सविन न्यौपानेले भने । खोप लगाउनका लागि ज्येष्ठ नागरिकहरु कागजपत्रसहित आएको अवस्थामा उनीहरूलाई जवाफ दिन सकस भइरहेको उनले बताए ।

हेटौंडा उपमहानगरका जनस्वास्थ्य निरीक्षक भोला चौलागाईंले अर्को व्यवस्था नभएसम्मका लागि खोप अभियान रोक्नु भन्ने जानकारी आएका बताए । हेटौंडा उपमहानगरमा ३ हजार १ सय खोप आवश्यक रहेको छ ।

उपमहानगर स्रोतका अनुसार ६२–६४ वर्ष उमेर समूहलाई पुग्ने खोप जिल्ला स्वास्थ्य कार्यालयबाट प्राप्त भएको छ । ‘सबै तोकिएको खोप केन्द्रमा भेरोसेल पुगिसकेको छ,’ चौलागाईंले भने ।

यस विषयमा मेयर महतसँग प्रतिक्रिया लिन खोज्दा सम्पर्क हुन सकेन । तर मेयरका प्रेस सल्लाहकार हरि हुमागाईंका अनुसार केही दिनमा सुरु गर्ने गरी खोप अभियान तत्काललाई रोकिएको हो । ‘सबै नागरिकले खोप लाउन पाउनुपर्छ । तत्काल ६० वर्षभन्दा माथिका नागरिकलाई लगाउनुपर्छ भनेर अभियान स्थगित गरिएको हुनसक्छ,’ हुमागाईंले भने ।

प्रकाशित : जेष्ठ २६, २०७८ १०:४६
प्रतिक्रिया
पठाउनुहोस्

फेरि छावा जन्माउँदै चित्रसेनकली

साढे ३ वर्षअघि हात्तीसारमै पहिलो सन्तानका रुपमा भीमाकलीलाई जन्म दिएकी चित्रसेनकली दोस्रोपटक गर्भिणी
कान्तिपुर संवाददाता

पर्सा — पर्सा राष्ट्रिय निकुञ्जको अमलेखगन्ज हात्तीसारमा यतिबेला खुसियाली छाएको हो । हात्तीसारकी ढोई चित्रसेनकली फेरि गर्भिणी भएको हात्तीसारका नायब सुब्बा जलेन्द्र चौधरीले जानकारी दिए ।

पर्सा राष्ट्रिय निकुञ्‍जको हात्तीसारमा रहेकी चित्रसेनकली साढे ३ वर्षअघि जन्मिएकी आफ्नो पहिलो सन्तान भिमाकलीसँग । फाइल तस्बिर : कान्तिपुर

साढे ३ वर्षअघि हात्तीसारमै पहिलो सन्तानका रूपमा भीमाकलीलाई जन्म दिएकी चित्रसेनकली दोस्रोपटक गर्भिणी भएकी हुन् ।

‘हामी परिवारमा नयाँ सदस्यको आगमनको खबरले खुसी छौं, चित्रसेनकलीले साढे ३ वर्ष नबित्दै हामीलाई खुसीको खबर दिन लागेकी हुन्,’ उनले भने, ‘हाल उनको गर्भ करिब १ महिनाको छ ।’

निकुञ्जअन्तर्गत प्रतापपुर रमौली पोस्टमा रहँदा वैशाखको १५ देखि २० गतेको बीचमा चित्रसेनकलीको संसर्ग निकुञ्जको जंगली हात्तीसँग भएको चौधरी बताउँछन् । ‘त्यस अवधिमा २ पटक चित्रसेनकली र उक्त मत्ता हात्तीको संसर्ग भएको थियो, त्यसै क्रममा गर्भ रहन गएको हो,’ उनले भने, ‘सामान्यतः ढोईको गर्भ रहेपछि मत्ताले ऊसँग संसर्ग गर्दैन, त्यसपछि उक्त मत्ता चित्रसेनकलीको नजिक पनि परेको छैन ।’

२०६२ सालमा हात्ती प्रजनन केन्द्र खोरसोर चितवनमा जन्मिएकी चित्रसेनकलीलाई २०७० सालमा पर्सा राष्ट्रिय निकुञ्जको हात्तीसारमा ल्याइएको हो । उनलाई निकुञ्ज गस्ती प्रयोजनका लागि रमौली प्रतापपुर पोस्टमा लगिएको थियो । निकुञ्जका ढोइहरू प्रायः यसरी नै जंगली मत्तासँग संसर्ग गरेर गर्भिणी हुन्छन् । खोरसोरमा पनि प्रायः यसै हुने गरेको चौधरी बताउँछन् । हात्तीमा विद्यावारिधि गरिरहेका तथा हाल कोसी टप्पु आरक्षका प्रमुख संरक्षण अधिकृत अशोक राम चित्रसेनकलीले २०७४ माघ १३ गते पहिलो सन्तानका रूपमा भीमाकलीलाई जन्म दिएको सम्झिन्छन् । उनी त्यतिबेला पर्सा निकुञ्जकै सहायक संरक्षण अधिकृत थिए ।

‘एउटा मत्ताले सामान्यतः आफ्नो जीवनकालमा आधा दर्जनसम्म छावा जन्माउँछन्, उनीहरूको गर्भ अवधि २० देखि २२ महिनासम्मको हुन्छ,’ उनले भने, ‘ढोई गर्भिणी भएको यकिन गर्ने विधि हुन्छ, तर सामान्यतः ढोइको फाँचो र ज्यान ठूलो हुँदै गएपछि उसको गर्भको यकिन हुन्छ ।’ अमलेखगन्ज हात्तीसारमा हाल ५ हात्ती छन् । तिनमा एक मत्ता र सबै ढोई छन् । प्रत्येक हात्तीलाई ३ वटा कर्मचारीको दरबन्दी छ । त्यसअनुसार हात्तीसारमा अहिले ५ माहुत, ५ पछुवा र ५ फनैत कार्यरत छन् ।

प्रकाशित : जेष्ठ २६, २०७८ १०:४६
पूरा पढ्नुहोस्
प्रतिक्रिया
पठाउनुहोस्
×