आउँदैनन् अन्य बिरामी- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

आउँदैनन् अन्य बिरामी

टीकाप्रसाद भट्ट

रामेछाप — कोरोनाको दोस्रो लहरअघि दीर्घरोगी, मौसमी रुघाखोकी, स्त्री रोगलगायतका स्वास्थ्य समस्या लिएर आउने बिरामीले अस्पताल भरिभराउ हुन्थ्यो । तर पछिल्लो समय त्यस्ता समस्या लिएर आउने बिरामी विरलै छन् ।

रामेछाप जिल्ला अस्पतालमा शुक्रबार साँझसम्म १८ जना बिरामी भर्ना छन् । उनीहरू सबै कोरोना संक्रमित हुन् । ‘अन्य बिरामी आक्कलझुक्कल आउँछन्,’ स्वास्थ्य कार्यालय प्रमुख जितेन्द्र कर्ण भन्छन्, ‘कोरोनाका बिरामी छन् भनेरै अरू सामान्य प्रकृतिका बिरामी डराएर अस्पताल आउन छोडेको हुनुपर्छ ।’

मन्थलीस्थित तामाकोसी अस्पतालमा कोरोना महामारीअघि दिनमा सरदर सय जना बिरामी स्वास्थ्य परीक्षणका लागि आउँथे । अस्पताल निर्देशक डा. सुमन कर्माचार्यले हिजोआज उक्त संख्या २०–२५ मा झरेको बताए । कोरोनासँग मिल्दोजुल्दो लक्षण भएका र संक्रमण पुष्टि भएर भर्ना हुन आउनेको संख्या भने उल्लेख्य रहेको उनले बताए । ‘एक त निषेधज्ञाको कारण यातायात असुविधा भएर बिरामी आउन नसकेका होलान्,’ उनले भने, ‘अर्को संक्रमणको डर पनि अलिअलि होला ।’ उनका अनुसार गर्भवती महिलाहरू गर्भ परीक्षण र सुत्केरी हुने समय नाघिसक्दा पनि अस्पताल जाने गरेका छैनन् ।

रामेछापमा हुने दुर्घटनाजन्य घटनामा घाइते भएका र शल्यक्रिया गर्नुपर्ने समस्याका बिरामीलाई काठमाडौं लैजानुपर्ने बाध्यता छ । जिल्लामा हालसम्म शल्यक्रियाको सुविधा छैन । मन्थलीस्थित प्राथमिक स्वास्थ्य केन्द्रमा शल्यक्रियामार्फत सुत्केरी गराउने सेवा पनि चिकित्सक नहुँदा बन्द भएको महिनौं भइसकेको छ ।

प्रकाशित : जेष्ठ २२, २०७८ १२:३९
प्रतिक्रिया
पठाउनुहोस्

अक्सिजन अभाव हुन नदिन सिलिण्डर सहयोग

टीकाप्रसाद भट्ट

रामेछाप — अक्सिजनको अभाव भोगिरहेको रामेछापका लागि एमाले नेता एवं निर्माण व्यवसायी रत्नप्रसाद गौतमले ठूलो आकारको ६० सिलिण्डर अक्सिजन सिलिण्डर उपलब्ध गराएका छन् ।

गौतमले उपलब्ध गराएको अक्सिजन मध्ये जिल्ला अस्पताललाई ५० र अन्य स्वास्थ्य संस्थालाई १० सिलिण्डर उपलब्ध गराइएको छ ।

त्यसैगरी गौतमले एन्टिजेन किट, पिपीई, मास्क, अक्सिमिटर समेत उपलब्ध गराएका छन् । उक्त सामाग्री हरेक पालिकामा वितरण गरिएका छन् । उमाकुण्ड पालिकाका लागि केहि शैय्या समेत गौतमले उपलब्ध गराएका छन् ।

केहि दिन अघि गौतमले जिल्ला प्रशासन कार्यालयलाई हस्तारन्तरण गरेका १ हजार थान एन्टिजिन किटको गुणस्तरको विषयमा प्रश्न उठेपछि उनले नेपाल सरकारले तोकेको गुणस्तरयुक्त एन्टिजेन किट प्रमुख जिल्ला अधिकारी गौलोचन सैजुलाई हस्तान्तरण गरेका छन् । यस अघि उपलव्ध गराइएका १ हजार किट प्रयोगमा आइसकेको थिएन ।

नेपाल सरकारले २० प्रकारका एन्टिजेन किटलाई मात्र मान्यता दिएको थियो । मन्त्री स्तरिय निर्णयमा भने अन्तराष्ट्रिय बजारमा मान्यता पाएको किट प्रयोग गर्न मिल्ने निर्णय गरेकोले उपलब्ध भएका किट प्रयोग गर्ने या नगर्ने भन्ने विषयमा छानबिन पछि निर्णय गरीने प्रजिअ सैजुले बताएका छन् ।


प्रकाशित : जेष्ठ १९, २०७८ २१:२४
पूरा पढ्नुहोस्
प्रतिक्रिया
पठाउनुहोस्
×