संक्रमित राख्ने शय्या भरिए- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

संक्रमित राख्ने शय्या भरिए

कान्तिपुर संवाददाता

काभ्रे — कोरोना संक्रमित ७२ वर्षीय वृद्धालाई श्वासप्रश्वासमा समस्या आएपछि शुक्रबार बिहान ५ बजे धुलिखेल अस्पताल ल्याइयो । तर शय्या खाली नहुँदा साँझसम्म पनि उनको भर्ना हुन सकेको थिएन ।


‘सास फेर्न गाह्रो भएपछि अस्पताल ल्याएको १२ घण्टासम्म पनि भर्ना गर्न पाइएको छैन,’ अस्पताल परिसरमा वृद्धाकी आफन्तले भनिन्, ‘इमर्जेन्सीमा नै राखेर उपचार भइरहेको छ, शय्या पाउने ठेगान छैन ।’ अक्सिजन लेभल घटेपछि जिल्लाका ठूला अस्पताल धुलिखेल र शिर मेमोरियल अस्पतालमा सम्पर्क गरेका बनेपा–४ नालाकी ३२ वर्षीया संक्रमित महिलाका आफन्तले भर्ना गर्न नसकिने जवाफ पाए । त्यसपछि बिरामीलाई घरमै राखेका छन् ।

संक्रमितको उपचारका लागि जिल्लाका अस्पतालहरूमा शय्या अभाव हुन थालेको छ । शय्या अभाव भएपछि धुलिखेल अस्पतालले आकस्मिक कक्षलाई नै विस्तार गरेर सेवा दिन थालेको छ ।

अहिले अस्पताल आउने ८० प्रतिशत बिरामीलाई अक्सिजनसहितको सेवा चाहिन्छ, सबैखाले सुविधा जुटाउन समय लागेको हो,’ अस्पतालका प्रशासकीय निर्देशक डा. रमेश मकाजूले भने । शिर मेमोरियलमा १७ जना र धुलिखेल अस्पतालमा ६५ संक्रमितको उपचार भइरहेको छ ।

प्रकाशित : वैशाख २६, २०७८ १०:५४
प्रतिक्रिया
पठाउनुहोस्

अर्घाखाँची र गुल्मीमा गरी थप ६ संक्रमितको मृत्यु

वीरेन्द्र केसी

अर्घाखाँची — कोरोना संक्रमणबाट अर्घाखाँची र गुल्मीमा गरी थप ६ जनाको मृत्यु भएको छ । मृत्यु हुनेमा अर्घाखाँचीका दुई र गुल्मीका चार जना छन् ।

सास फेर्न गाह्रो भएपछि गुल्मीको मुसीकोट नगरपालिका–५ का ४५ वर्षीय पुरुषलाई आफन्तले शुक्रबार लुम्बिनी मेडिकल कलेज पाल्पा पुर्‍याएका थिए । अस्पतालमा पीसीआर परीक्षण गराएर फर्किएका उनको शनिबार साँझ गुल्मीको रिडीमा निधन भएको ५ नम्बर वडाध्यक्ष भागीरथ खरेलले बताए । खरेलका अनुसार रिपोर्ट आउँदासम्म उनी अस्पताल भर्ना नभई सिधै घरमा आएका थिए ।

त्यस्तै कोरोना संक्रमित भएपछि तम्घास अस्पतालमा उपचाररत सत्यवती गाउँपालिका–२ का ७५ वर्षीय पुरुष, वडा नम्बर ४ का ८३ वर्षीय पुरुष र छत्रकोट गाउँपालिका–३ का ४६ वर्षीय पुरुषको आइतबार बिहान अस्पतालमा ज्यान गएको स्वास्थ्य कार्यालय गुल्मीका सूचना अधिकारी गोपाल कार्कीले बताए । उनका अनुसार जिल्लामा कोरोनाले ज्यान गुमाउनेको संख्या २१ पुगेको छ ।

त्यसै गरी तीन दिनदेखि अर्घाखाँची अस्पतालमा उपचाररत दुई जना संक्रमितको आइतबार बिहान मृत्यु भएको छ । शीतगंगा नगरपालिका–४ की २३ वर्षीया महिला र सन्धिखर्क नगरपालिका–७ का ४० वर्षीय पुरुषको ज्यान गएको जनस्वास्थ्य सूचना अधिकारी विजय विकले बताए ।

प्रकाशित : वैशाख २६, २०७८ १०:४१
पूरा पढ्नुहोस्
प्रतिक्रिया
पठाउनुहोस्
×