बँदेलले ज्यानै जोखिममा- वाग्मती - कान्तिपुर समाचार

बँदेलले ज्यानै जोखिममा

रमेशकुमार पौडेल

चितवन — जंगली बँदेलले बाली नोक्सान गर्ने मात्र होइन, स्थानीयलाई आक्रमण गरी ज्यानै जानेसम्मका घटना हुन थालेका छन् । गत शुक्रबार माडी नगरपालिका–८ तल्लो कान्तिपुर गाउँका ४२ वर्षीय नवराज ढकालको बँदेलको आक्रमणबाट मृत्यु भयो ।

ढकाल बारीमा घाँस काट्दै थिए । उनी कुकुरले लखेट्दै गरेको बँदेलका सामुन्ने परे । बँदेलले झम्टिएपछि गम्भीर घाइते भएका उनको केही बेरमै प्राण गयो ।

चितवन राष्ट्रिय निकुञ्ज आसपासको मध्यवर्ती क्षेत्रका बस्तीमा ठूला जंगली जनावरहरू हात्ती, बाघ, गैंडा, भालुले दिने दुःख नौलो होइन । पछिल्ला वर्षहरूमा बँदेलको सास्ती पनि थपिएको छ । निकुञ्जका सूचना अधिकारी रहेका सहायक संरक्षण अधिकृत लोकेन्द्र अधिकारी भन्छन्, ‘निकुञ्जको मध्यवर्ती क्षेत्रमा गत साउनयता वन्यजन्तु आक्रमणमा परेर ६ जनाको मृत्यु र २३ जना घाइते भएका छन् । त्यसमध्ये बँदेलका कारण एकको मृत्यु र पाँच जना घाइते भएका छन् ।’

चित्तल, मृगजस्तै बँदेलले पनि मुख्य रूपमा खेतीबालीमा नै नोक्सान पुर्‍याउँदै आएको छ । तर आक्रामक स्वभाव हुने भएका कारण बँदेलले मानिसलाई पनि हानि पुर्‍याउने गरेको छ । ‘बँदेलका कारण मान्छेको मृत्यु नै भएको तीन वर्षयता यो पहिलो घटना हो । तर तीन वर्षको बीचमा बँदेलले आक्रमण गर्दा घाइते हुनेहरू २२ जना छन् । अघिल्लो वर्ष बँदेलले आक्रमण गर्दा १३ जना घाइते भएका थिए,’ अधिकारीले भने । मुखमा तिखा दाह्रा, गँठिलो शरीर र तीव्र गतिमा दौडने भएका कारण यसको प्रहार घातक हुन्छ ।

‘घाँस काट्दै गरेका बेला दौडेर आएको बँदेलले ढकाललाई निसाना बनाएछ । रगत धेरै बगेपछि बचाउन सकिएन,’ घटना भएको क्षेत्र निकुञ्जको अयोध्यापुरी मध्यवर्ती उपभोक्ता समितिका अध्यक्ष शिवजी गायकले भने । बँदेलको यस्तो भयानक आक्रमण उनले यसअघि नदेखेको र नसुनेको बताए ।

बँदेलले आलु, मकै, धान, गहुँजस्ता मुख्य बालीमा नोक्सान पुर्‍याउँछ । गैंडापछि बँदेलले गर्ने नोक्सानी धेरै रहेको गायक बताउँछन् । ‘निकुञ्जको हरेक क्षेत्रमा बँदेलको समस्या छ । खास गरेर माडी र नवलपुरको अमलटारीमा अझै बढी समस्या छ,’ निकुञ्जका प्रमुख संरक्षण अधिकृत अणनाथ बरालले भने ।

गाउँघरको सुँगुर, बंगुरको जंगली रूप हो बँदेल । यसले बच्चाहरू पनि प्रशस्तै जन्माउँछ । १०/१२ वटासम्म बच्चा जन्माउने बराल बताउँछन् । बँदेललाई जंगलमा बाघ र चितुवाको डरबाहेक अरू ठूलो खतरा छैन । बाघको पनि मुख्य आहारा बँदेल होइन । ‘बच्चा धेरै जन्माउने तर मारिने खतरा कम भएका कारण यसको संख्या बढ्दै गएको जस्तो छ,’ बरालले भने । कृषि क्षेत्रमा नोक्सान पुर्‍याए आर्थिक वर्ष २०७५/७६ मा बँदेल मार्न पाउने व्यवस्था पनि भएको थियो । तर त्यो व्यवस्था त्यही वर्षका लागि मात्रै रहेको अधिकारीले जानकारी दिए ।

उनका अनुसार यसअघि बँदेलले गरेको क्षतिको राहत र क्षतिपूर्तिसमेत नपाउने अवस्था थियो । वन्यजन्तु क्षतिपूर्ति राहत निर्देशिका २०७५ मा संशोधन भएपछि बँदेलले पुर्‍याएको नोक्सानीमा राहत दिने व्यवस्था भएको उनले बताए । वन्यजन्तु आक्रमणका कारण मध्यवर्ती क्षेत्रमा स्थानीयको ज्यान गए मृतकका परिवारले १० लाख रुपैयाँ राहत पाउने कानुनी व्यवस्था छ । घाइतेले उपचार खर्च र बालीको क्षतिपूर्ति पनि पाउँछन् ।

प्रकाशित : वैशाख २१, २०७८ ११:४८
प्रतिक्रिया
पठाउनुहोस्

बाँकेमा ६ जना कोरोना संक्रमितको मृत्यु

रूपा गहतराज

नेपालगन्ज — बाँकेको भेरी अस्पताल र कोहलपुर मेडिकल कलेजमा सोमबार राति र मंगलबार बिहान गरी ६ जना कोरोना संक्रमितको मृत्यु भएको छ । मृत्यु हुनेमा ४ जना बाँके र २ जना कैलालीका हुन् ।

बाँके बैजनाथ गाउँपालिका–५ की ६२ वर्षीया महिलाको मंगलबार बिहान साढे ६ बजे मृत्यु भएको हो । वैशाख १९ गते पीसीआर गरेकी उनलाई २० गते भर्ना गरिएको थियो ।

यस्तै, कैलाली धनगढीका ५५ वर्षीय पुरुषको मृत्यु भएको छ । वैशाख १९ गते पीसीआर गरेका उनलाई २० गते भर्ना गरिएको थियो । उनको मंगलबार बिहान साढे ४ बजे मृत्यु भएको हो ।

नेपालगन्ज उपमहानगरपालिका–१० का ५२ वर्षीय पुरुषको भेरी अस्पतालमा बिहान ९ बजे मृत्यु भएको छ । १७ गते अस्पताल भर्ना भएका उनको १८ गते पीसीआर रिपोर्ट पोजिटिभ आएको थियो ।

खजुरा गाउँपालिका–२ बाँकेको होम आइसोलेसनमा बसेका ६९ वर्षीय पुरुषको आइसोलेसनबाट अस्पताल लैजाँदै गर्दा राति साढे ११ बजे मृत्यु भएको हो । वैशाख १९ गते पीसीआर रिपोर्ट पोजेटिभ देखिएदेखि नै होम आइसोलेसन बस्दै आएका थिए ।

वैशाख १४ गते पीसीआर गरेका कैलाली बर्दगोरियाका ८० वर्षीय पुरुषको सोमबार राति ११ बजेर ५० मिनेटमा मृत्यु भएको हो । उनलाई १५ गते अस्पताल भर्ना गरिएको थियो ।

नेपालगन्ज उपमहानगरपालिका–१० का ७० वर्षीय पुरुषको ११ बजेर ४० मिनेटमा मृत्यु भएको छ । वैशाख १७ गते पीसीआर गरेका उनलाई १८ गते भर्ना गरिएको थियो ।

योसँगै बाँकेमा कोरोनाबाट १४३ जनाको मृत्यु भएको छ । बाहिरी जिल्लाबाट उपचार गराउन आएका १२५ जनाको मृत्यु भइसकेको छ ।

प्रकाशित : वैशाख २१, २०७८ ११:३०
पूरा पढ्नुहोस्
प्रतिक्रिया
पठाउनुहोस्
×