कान्तिपुर वेबसाईट
AdvertisementAdvertisement
२०.१२°C काठमाडौं
काठमाडौंमा वायुको गुणस्तर: १५७

गर्मी छल्न सोलाभन्ज्याङ

राजकुमार कार्की

सिन्धुली — सिन्धुली बहुमुखी क्याम्पसका प्राध्यापक ईश्वर बस्नेत साताको एक पटक सोलाभन्ज्याङ पुग्छन् । सदरमुकाम सिन्धुलीमाडीको उखरमाउलो गर्मी छल्न उनी २० किमि र उत्तरमा रहेको सोलाभन्ज्याङमा पुगेर आनन्द लिन्छन् ।

गर्मी छल्न सोलाभन्ज्याङ

‘गर्मी भुल्नका लागि म प्रायजसो सोलाभन्ज्याङ आउँछु, यहाँ बेग्लै आनन्द छ,’ उनी भन्छन्,‘ यो ठाऊँमा १२ महिना नै जाडो हुन्छ ।’ सदरमुकामबाट उत्तरतर्फ र खुर्कोटबाट उकालो लागेपछि उस्तै दूरीमा पुगिने सोलाभन्ज्याङ सिन्धुलीगढी क्षेत्रको प्रवेशद्वार पनि हो ।

फिक्कल गाउँपालिकाका अध्यक्ष धनबहादुर कार्कीले सदरमुकाम आवतजावत गर्दा गढी नजिकको सोलाभन्ज्याङमा केही समय बिताउने गर्छन् । सदरमुकाम र आफ्नो गाउँपालिकाको कार्यालय रहेको गढतीर क्षेत्रमा उखरमाउलो गर्मी हुन्छ । गढी क्षेत्र आएपछि गर्मीको समयमा समेत हुने जाडोले आनन्द पाइने अध्यक्ष कार्कीको अनुभव छ ।

कामको चटारो त्यहीमाथि गर्मीले गर्दा धेरै नै थाकिएको हुन्छ, अध्यक्ष कार्कीले भने, ‘सोला आउना साथ बेग्लै आनन्द हुन्छ, फुर्सद छ भने गढी नै उक्लिएर आनन्द लिइन्छ, चटारो छ भने पनि एक, आधा घण्टा यहाँ बिताइन्छ ।’ फिक्कलका अध्यक्ष कार्की मात्र होइन्, गोलन्जोर गाउँपालिकाका अध्यक्ष पुष्प कार्कीको पनि अनुभव उस्तै छ ।

‘तनाव र थकान मेटाउने थलो गढी क्षेत्र हो,’ उनले भने, ‘१२ महिना यहाँ हुस्सु लागेर जाडो भइरहन्छ, झन गर्मीमा स्वर्गीय आनन्द नै प्राप्त हुन्छ ।’ गढी क्षेत्रको बृहत्तर विकास गर्न सके पर्यटकको ओइरो लाग्ने उनको भनाइ छ । गोलन्जोर कै वडा नं ५ रातनचुराले गढी क्षेत्रलाई छोएको र त्यसलाई साइकल जोनको रूपमा विकास गर्न गाउँपालिका लागि परेको अध्यक्ष कार्कीले बताए ।

यी जनप्रतिनिधिहरू मात्रै हैन, संघ तथा प्रदेश सांसद, मन्त्रीहरू तथा उच्चपदस्थ अधिकारीदेखि लिएर बीपी राजमार्ग हुँदै सवार गर्ने जो कोही पनि सोलाभन्ज्याङ क्षेत्रमा शीतल लिन रोकिन्छन् । गढी क्षेत्रमा बसोबासको राम्रो व्यवस्था हुने हो भने केही दिन बिताउनसमेत पर्यटक आउने सिन्धुलीगढीका अन्वेषणकर्ता सागरकुमार ढकालको भनाइ छ ।

सदरमुकामबाट २० किमि उत्तरतर्फ गएपछि उक्त क्षेत्र पुगिन्छ । गर्मी मौसममा समेत सिन्धुलीगढी क्षेत्रमा जाडो हुने गरेको छ । गर्मी भुलाउन र प्राकृतिक सौन्दर्यको मज्जा लिन तराई क्षेत्रको हब सिन्धुलीगढी क्षेत्र बन्दै गएको छ ।

प्रकाशित : वैशाख ३, २०७८ १२:०३
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?