गैंडा गणनामा परिचालित हात्तीलाई 'ध्रुबे' ले लखेट्यो, भागदौडमा केही गणक र माहुते घाइते - वाग्मती - कान्तिपुर समाचार
कान्तिपुर वेबसाईट
AdvertisementAdvertisement

गैंडा गणनामा परिचालित हात्तीलाई 'ध्रुबे' ले लखेट्यो, भागदौडमा केही गणक र माहुते घाइते 

रमेशकुमार पौडेल

चितवन — गैंडा गणनामा परिचालन गरिएका हात्तीहरुलाई जंगली हात्तीले लखेट्दा भएको भागदौडमा एक जना गणक गम्भीर घाइते भएका छन् । चितवन राष्ट्रिय निकुञ्जभित्र पश्‍चिम क्षेत्रको गैंडा खासा इलाकामा गणना भइरहँदा शुक्रबार दिउँसो तीन बजेतिर जंगली हात्ती ध्रुबेले गणनामा परिचालन भएका हात्तीलाई लखेटेको चितवन राष्ट्रिय निकुञ्जका प्रमुख संरक्षण अधिकृत अणनाथ बरालले जानकारी दिए ।

‘हात्ती लहरै जाँदा ध्रुबेसँग जम्काभेट भएछ । त्यसपछि त्यसले लखेट्दा हात्तीहरु दौडने क्रममा एकजना गणक राष्ट्रिय प्रकृति संरक्षण कोष सौराहामा कार्यरत संरक्षण अधिकृत विनोद श्रेष्ठ घाइते हुनु भएको छ । उहाँलाई हेलिकप्टरमा राखेर थप उपचारका लागि काठमाडौं पठाइ सकिएको छ’ प्रमुख संरक्षण अधिकृत बरालले भने । श्रेष्ठको हात, खुट्टा, कम्मर र गर्धनमा चोट देखिएका कारण काठमाडौं पठाएको उनले बताए ।

दुईजना माहुते पनि घाइते भएका छन् । उनीहरुको कावासोतीको मध्यविन्दु अस्पतालमा उपचार भइरहेको बरालले बताए । अन्य चार पाँचजना गणक र माहुतेलाई पनि चोट पटक लागेको र उनीहरुको अवस्था त्यस्तो गम्भीर नभएको बरालले जानकारी दिए । चितवनमा निकुञ्जको पूर्वी सिमानाबाट चैत्र ९ गतेदेखि गैंडा गणना सुरु भएको थियो । हात्तीमाथि बसेर गणकहरु निकुञ्जको जंगलभित्र पस्दा अन्य वन्यजन्तु र जंगली हात्तीले आक्रमण गर्ने खतरा सधैं रहने गर्दछ ।

घटनापछि गणनामा परिचालन भएका अन्य तीनवटा हात्ती सम्पर्कमा आइनसकेको बरालले बताए । घटनापछि गणना स्थगित भएको थियो । ‘यस्तो दुखद् घटनापछि गणना जारी राख्ने सम्भावना भएन । शुक्रबारलाई रोकेका छौं । भोलि शनिबारदेखि सुरु गर्ने या नगर्ने बारेमा निर्णय भइसकेको छैन । ध्रुबे कता छ हेरेर निर्णय लिन्छौं’ बरालले भने । ध्रुबेको घाँटीमा रेडियोकलर भएका कारण कहाँ छ जानकारी लिन सकिन्छ ।

प्रकाशित : चैत्र २०, २०७७ १९:३२
प्रतिक्रिया
पठाउनुहोस्

कोरोना खोप निर्यातमा रोक लगाएको छैन : भारत

सुरेशराज न्यौपाने

नयाँदिल्ली — भारतले कोरोना खोपको निर्यातमा रोक नलगाए पनि आन्तरिक मागलाई प्राथमिकतामा राखिएको जनाएको छ ।

भारतको विदेश मन्त्रालयद्वारा शुक्रबार आयोजित नियमित पत्रकार सम्मेलनमा प्रवक्ता अरिन्दम बाग्छीले नेपालले पाउनु पर्ने खोपको आपूर्तिमा भइरहेको ढिलाईका सम्बन्धमा कान्तिपुरले सोधको प्रश्नमा त्यस्तो धारणा राखेका हुन् । ‘भारतले निर्यातमा कुनै रोक लगाएको छैन । तर, हामीले आन्तरिक मागलाई ध्यानमा राख्दै निर्यात गर्ने हो’ बाग्छीले भने । उनले खोप प्राथमिक रुपमा आन्तरिक खपतका लागि भएको समेत उल्लेख गरेका छन् ।

भारतको सेरम इन्स्टिट्युटले अग्रिम भुक्तानी पाइसके पनि १० लाख डोज खोप अझै पठाएको छैन । सेरमले पछिल्लो पटक २० चैतसम्म १० लाख डोज खोप दिने प्रतिबद्धता जनाएको थियो । स्वास्थ्य मन्त्रालयका अधिकारीहरुका अनुसार कम्पनीले शुक्रबार साँझसम्म पनि खोप पठाउने सम्बन्धमा केही खबर गरेको छैन । ‘कुनै खबर आएको छैन, यदि पठाउन चाहेको भए त दुई/तीन दिन अगाडि नै पत्राचार हुन्थ्यो’ स्वास्थ्य एक अधिकारीले कान्तिपुरसँग टेलिफोनमा भने ।

नेपाल सरकारले बेलायतको अक्सफोर्ड विश्वविद्यालय र अष्ट्रेजेनेकाद्वारा विकसित र सेरमद्वारा उत्पादित २० लाख डोज कोभिशिल्ड खोपका लागि ८० प्रतिशत रकम अग्रिम भुक्तानी गरेको थियो । तर, सेरमले १० लाख डोजमात्र पठायो । बाँकी १० लाख डोज कहिले पठाउने भन्नेमा अन्योल कायमै रहेको छ ।

सेरमले बाँकी १० लाख डोज समयमै नपठाउँदा नेपालको खोप कार्यक्रम नै अवरुद्ध भएको छ ।

प्रकाशित : चैत्र २०, २०७७ १८:२६
पूरा पढ्नुहोस्
प्रतिक्रिया
पठाउनुहोस्
×