प्रदेशसभाको बैठक नराख्‍नु संघीयतामाथिको प्रहार : दाहाल–नेपाल समूह- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

प्रदेशसभाको बैठक नराख्‍नु संघीयतामाथिको प्रहार : दाहाल–नेपाल समूह

सुवास विडारी

मकवानपुर — वाग्मती प्रदेशमा मुख्यमन्त्री डोरमणि पौडेलविरुद्ध अविश्वासको प्रस्ताव दर्ता गराएको दाहाल–नेपाल समूहले प्रदेशसभाको बैठक पटक/पटक सूचना टाँसेर स्थगित गर्नुलाई संघीयताको मर्ममाथिको प्रहारको रुपमा टिप्पणी गरेको छ ।


सभामुख सानुकुमार श्रेष्ठले बुधबार दिउँसो २ बजेका लागि बोलाइएको प्रदेशसभाको बैठक बिहान ६:३५ बजे सूचना टाँसेर स्थगित गरेको विषयमा दाहाल–नेपाल समूहले प्रदेशसभा सचिवालयमा पत्रकार सम्मेलन गरेर विरोध जनाएको हो । 'अल्पमतमा रहेको सरकारको दबाबमा आएर सभामुखले प्रदेशसभाको बैठक पटक/पटक स्थगित गर्नु संघीयता मर्ममाथिको प्रहार हो । तत्काल अर्को बैठक बोलाएर अविश्वासको प्रस्तावको टुंग्याउन जरुरी रहेको छ, ' नेतृ अष्टलक्ष्मी शाक्यले भनिन्,' अविश्वासको प्रस्ताव नटुंगिएसम्म अन्य विधेयकहरु सदनमा ल्याउन नमिल्ने भएका कारण सदन अवरुद्ध गरे जस्तो देखिएको छ ।' उनले लामो समयसम्म प्रदेशसभा सञ्चालन नहुँदा सांसदहरुले विजनेशविहीन हुनुपरेको टिप्पणी गरे ।

उनले अल्पमतमा रहेको सरकारको संरक्षण नगर्न र दबाबमा नपरी तत्काल बैठक बोलाउन समेत सभामुख श्रेष्ठलाई आग्रह गरिन् । मंगलबार दाहाल–नेपाल समूहको दबाब र सर्वदलीय बैठकपश्चात् प्रदेशसभा सञ्चालन गर्ने प्रतिबद्धता जनाएका सभामुख श्रेष्ठले सत्तापक्षको दबाबका कारण पुन: बैठक स्थगित गरेको उनको टिप्पणी छ ।

यसअघि माघ १९ गतेका लागि तय भएको बैठक मुख्यमन्त्रीको दबाबमा अघिल्लो राति सूचना जारी गर्दै सभामुख श्रेष्ठले फागुन ५ गतेसम्मका लागि स्थगित गरेका थिए । पुस १० गते प्रदेशसभामा दर्ता भएको अविश्वासको प्रस्ताव माघ ९ गते प्रदेशसभामा टेबुल भएको थियो ।

प्रकाशित : फाल्गुन ५, २०७७ १४:३२
प्रतिक्रिया
पठाउनुहोस्

नेपाल टेलिकमको ‘एनटी च्याटबोट’ सेवा सुरु

कान्तिपुर संवाददाता

काठमाडौँ — नेपाल टेलिकमले विभिन्न सेवाको जानकारी दिन ‘एनटी च्याटबोट’ सेवा सुरु गरेको छ ।

टेलिकमका सह–प्रवक्ता एवं उप–प्रबन्धक रन्जित लोहियाले टेलिकमका विभिन्न सेवाहरु तथा सेवा प्रदान गर्ने विधिहरुको बारेमा कम्पनीको वेबसाइटबाटै च्याटमार्फत स्वचालित रुपमा जानकारी प्राप्त गर्न सकिने गरी ‘एनटी च्याटबोट’ सेवा सुरु गरिएको बताए ।

कम्पनीको वेबसाइट खोल्नासाथ एनटी च्याटबोटको सानो स्क्रिन देखा पर्ने र त्यहीँबाटै च्याट गरी आफूलाई चाहिएको जानकारी लिन र गुनासो राख्न सकिने पनि सह–प्रवक्ता लोहियाले बताए । च्याटबोटमा कम्पनीका विभिन्न सेवाहरुको बारेमा जानकारी लिनका लागि उपलब्ध विकल्पको छनौट गर्न तथा नेपाली वा अंग्रेजी भाषा छनौट गरी प्रश्न लेखेर जिज्ञासा राख्न सकिनेछ । कम्पनीका विभिन्न सेवाहरु फोरजी, एफटीटीएच, जीएसएम प्रिपेड, जीएसएम पोस्टपेड, ल्यान्डलाइन, एनटी एप, अनलाइन रिचार्ज, अफर, प्याकेज आदिको बारेमा च्याट गरेर सजिलै जानकारी प्राप्त गर्न सकिन्छ ।

एनटी च्याटबोटको माध्यमबाट विभिन्न सेवाहरुका बारेमा फिडब्याक दिन र सिकायत/गुनासो गर्न समेत सकिने व्यवस्था समेत गरिएको छ । सिकायत वा गुनासोको सम्बोधन च्याटबोटमार्फत स्वचालित रुपमा हुन नसकेमा कम्पनीको सम्बन्धित विभागका पदाधिकारीले अध्ययन गरी गुनासो व्यवस्थापन गर्ने व्यवस्था समेत टेलिकमले गरेको छ ।

प्रकाशित : फाल्गुन ५, २०७७ १३:४४
पूरा पढ्नुहोस्
प्रतिक्रिया
पठाउनुहोस्
×