हेटौंडा–कुलेखानी–फर्पिङ सडक २ महिनालाई बन्द- वाग्मती - कान्तिपुर समाचार

हेटौंडा–कुलेखानी–फर्पिङ सडक २ महिनालाई बन्द

प्रताप विष्ट

हेटौंडा — हेटौंडाबाट काठमाडाैं प्रवेश गर्ने वैकल्पिक छोटो मार्ग २ महिना बन्द हुने भएको छ ।

हेटौंडा—भीमफेदी—कुलेखानी, फाखेल, सिस्नेरी—दक्षिणकाली फर्पिङ सडकको भीमफेदी—कुलेखानी सडक खण्डमा ढलान र कालोपत्रे गर्न लागेकाले माघ १० गतेदेखि चैत १० गतेसम्म सवारी साधन सञ्चालनमा रोग लगाएको हो ।

उक्त सडकको खण्डको भीमफेदीदेखि देउरालीसम्मको विभिन्न भागमा ढलान र देउरालीदेखि कुलेखानीसम्म कालोपत्रे गर्न लागेकाले २ महिना सवारीसाधन आवतजावत गर्न रोक लगाएको वाग्मती प्रदेश यातायात पूर्वाधार निर्देशनालयका निम्ति निर्देशक डा. सहदेव भण्डारीले बताए । 'साँघुरो र घुमाउरो उक्त सडक खण्डमा ढलान र कालोपत्रे गर्न सवारीसाधन बन्दै गर्नुपर्ने भएकाले आवतजावत गर्न रोक लगाएका हौं ।', उनले भने ।

वाग्मती प्रदेश यातायात पूर्वाधार निर्देशनालयले भीमफेदी—कुलेखानी सडक खण्डको स्तरोन्नति गरिरहेको छ । उक्त सडक खण्ड अत्यन्त जोखिमयुक्त भएकाले नालासहितको फराकिलो बनाउने कार्य प्रदेश सरकारले गर्दै आएको छ । उक्त छोटो मार्ग भएर हेटौंडा—काठमाडाैं दैनिक ८ सय भन्दाबढी हलुका सवारीसाधनहरु आवतजावत गर्नें गरेका छन् ।

वैकल्पिक मार्ग भएर आवतजावत गर्ने सवारी साधनहरुलाई त्रिभुवन राजपथ वा चितवन—मुग्लिन नौबिसे सडक प्रयोग गर्न प्रहरीले अनुरोध गरेको छ । कान्तिलोकपथ ललितपुरतर्फ अत्यन्त जोखिमयुक्त भएकाले प्रयोग नगर्नसमेत प्रहरीले आग्रह गरेको छ । कान्तिलोकपथमा सवारीसाधन सञ्चालन गर्न सवारी साधनहरुलाई परमिट पनि दिएको छैन ।

प्रकाशित : माघ ९, २०७७ २०:०२
प्रतिक्रिया
पठाउनुहोस्

मकवानपुरमा ३ जना फरार अभियुक्त पक्राउ

सुवास विडारी

मकवानपुर — जिल्ला प्रहरी कार्यालय मकवानपुरले जिल्ला अदालतको फैसलालाई अटेर गरी फरार रहेका तीनजनालाई प्रहरीले पक्राउ गरेको छ ।

जिल्ला अदालत मकवानपुरबाट भएको फैसला अनुसार कैद भुक्तान नगरी फरार रहेका तीजनालाई हेटौंडा उपमहानगरको विभिन्न स्थानबाट पक्राउ गरिएको जिल्ला प्रहरी कार्यालय मकवानपुरका प्रहरी नायब उपरीक्षक इन्द्रबहादुर रानाले जानकारी दिए । २०७२ माघ २८ गते लागूऔषध मुद्दामा ६ वर्ष कैद र दस हजार रुपैयाँ जरिवानाको फैसला गरेको हेटौंडा–१५ का ३३ वर्षीय राजकुमार वाइलाई प्रहरीले पक्राउ गरेको छ ।

बहुविवाह मुद्दामा जिल्ला अदालतबाट २०७५ पुस ६ गतेको फैसला अनुसार एक वर्ष कैद र पाँच हजार रुपैयाँ जरिवाना तोकी फरार रहेका हेटौंडा–१५, शिखरपानीका ३३ वर्षीय हरि गोङ्वालाई पक्राउ गरिएको जिल्ला प्रहरी कार्यालय मकवानपुरले जनाएको छ ।

लागूऔषध मुद्दामा एकमहिना ६ दिनको कैद र दुई हजार रुपैयाँको अदालतको फैसला अटेर गरी फरार रहेका हेटौंडा–१४ का २६ वर्षीया विजय रुम्बालाई पनि प्रहरीले पक्राउ गरेको छ । जिल्ला अदालतले उनीविरुद्ध २०५७ असार १३ गते फैसला गरेको थियो । उनीहरुलाई कैद भुक्तानका लागि भीमफेदी गाउँपालिकास्थित क्षेत्रीय कारागारमा पठाइएको प्रहरीले जनाएको छ ।

प्रकाशित : माघ ९, २०७७ २०:०१
पूरा पढ्नुहोस्
प्रतिक्रिया
पठाउनुहोस्
×