कालिञ्चोक घुम्न गएकी महिलाको मृत्यु- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

कालिञ्चोक घुम्न गएकी महिलाको मृत्यु

केदार शिवाकोटी

चरिकोट — कालिञ्चोक घुम्न पुगेकी एक महिलाको मृत्यु भएको छ ।

कालिञ्चोक घुम्न पुगेकी मकवानपुर फापरबारीकी ३३ वर्षीया सम्झना रोकामगरको मृत्यु भएको प्रहरीले जनाएको छ ।

उनी कालिञ्चोक कुरी पुगेपछि अचानक बिरामी भएकी थिइन् । उनलाई तत्कालै चरिकोट ल्याइएको थियो । उनको मृत्यु हाईअल्टिच्युट र चिसोका कारण भएको हुनसक्ने प्रहरीले जनाएको छ ।

मृत्युका विषयमा थप अनुसन्धान भइरहेको प्रहरीले जनाएको छ ।

प्रकाशित : पुस २५, २०७७ १४:०१
प्रतिक्रिया
पठाउनुहोस्

जनताले श्री ५ महाराजलाई त फाले, अब श्री ७ लाई पनि फाल्छन् : डा. केसी 

तस्बिर : केशव थापा

काठमाडौँ — चिकित्सक तथा अभियन्ता डा. गोविन्द केसीले संविधानले नदिएको अधिकार प्रयोग गरी संसद विघटन गर्ने प्रधानमन्त्री केपी शर्मा ओलीको शैली 'श्री ७' महाराजको जस्तो भएको बताएका छन् । प्रधानमन्त्रीको सिफारिसमा राष्ट्रपति विद्यादेवी भण्डारीले गरेको प्रतिनिधिसभा विघटनको विरुद्धमा माइतीघरमा शनिबार आयोजित विरोधसभामा डा. केसीले राजालाई फाल्ने जनताले ओलीलाई पनि फाल्ने बताए । 

'ओलीको व्यवहार श्री ७ महाराजको जस्तो भएको छ । जनताले श्री ५ महाराजलाई त फाले अब श्री ७ महाराजलाई पनि फाल्छन्,' डा. केसीले थपे, 'सत्ताको उन्मादमा रहेको ओली सरकारलाई दण्डित गर्नु, संविधानको रक्षा गर्नु जनताको कर्तव्य हो ।'

प्रधानमन्त्री ओलीको सिफारिसमा राष्ट्रपति भण्डारीले पुस ५ गते प्रतिनिधिसभा विघटन गरेका थिए । प्रधानमन्त्री, राष्ट्रपति, मन्त्री कोही पनि नभई संविधान सर्वोपरी भएकाले त्यसको पालना नभए जनता सडकमा आउनुपर्ने डा. केसीको भनाइ थियो । जनताको संघर्षबाट ल्याएको संविधानको रक्षा गर्नु मतदाताको कर्तव्य भएको उनले बताए ।

संसद् विघटनविरुद्ध जनताले ठाउँठाउँमा विरोध गरिरहेको डा. केसीको भनाइ थियो ।

संसद् विघटनको मुद्दा सर्वोच्चमा रहेको र त्यहाँबाट ओलीको कदमलाई रोक्ने आश रहेको डा. केसीले बताए । 'अदालतले संविधानको रक्षा गर्छ भन्ने आस गरेका छौं,' उनले भने । संसद् विघटनको निर्णयविरुद्ध न्यायालयले फैसला नदिने हो भने ओलीको कदम विरुद्ध आएका जनता सर्वोच्च विरुद्ध लाग्ने खतरा हुने र न्यायालयमाथिको विश्वासमा कमी आउने केसीको भनाइ थियो ।

वरिष्ठ अधिवक्ता दिनेश त्रिपाठीले प्रधानमन्त्री ओलीको कदम असंवैधानिक भएको बताए । उनले आगामी दिनमा प्रदेश सरकारहरू पनि विघटन गर्ने सम्भावना रहेको बताए । उनले वैशाखमा निर्वाचन गराउनका लागि घोषणा नगरिएको बताए ।

प्रदर्शन गर्न माइतीघर गएकाहरूलाई सुरक्षाकर्मीले केहीबेर अवरोध गरेका थिए ।

प्रकाशित : पुस २५, २०७७ १३:३९
पूरा पढ्नुहोस्
प्रतिक्रिया
पठाउनुहोस्
×