अविश्‍वासको प्रस्ताव फेल हुन्छ : मुख्यमन्त्री पौडेल- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

अविश्‍वासको प्रस्ताव फेल हुन्छ : मुख्यमन्त्री पौडेल

सुवास विडारी

हेटौंडा — वाग्मती प्रदेशका मुख्यमन्त्री डोरमणि पौडेलले आफूविरुद्ध प्रदेशसभामा दर्ता भएको अविश्वासको प्रस्तावलाई फेल हुने दाबी गरेका छन् ।

उद्योग संघ मकवानपुरको १९औं साधारणसभाको उद्घाटन गर्दै मुख्यमन्त्री पौडेलले आफ्नै पार्टीका सांसदहरुले आफूविरुद्ध दर्ता गराएको अविश्वासको प्रस्तावलाई परास्त गर्ने गरी आफूले तयारी गरिरहेको दाबी गर्दै उक्त प्रस्ताव फेल हुने बताएका हुन् । मुख्यमन्त्री पौडेलविरुद्ध नेकपाको दाहाल–नेपाल समूहले पुस १० गते ४५ प्रदेशसभा सदस्यको हस्ताक्षरसहित अविश्वासको प्रस्ताव दर्ता गराएको थियो ।

‘अब बस्ने प्रदेशसभाको बैठकबाट अविश्वासको प्रस्तावको विषयलाई प्रक्रियागत ढंगबाट टुंगो लगाउनेछ,’ पौडेलले आफूविरुद्ध आफ्नै जिल्लाका सांसदहरुले समेत हस्ताक्षर गरेकोप्रति रोष प्रकट गर्दै भने, ‘आफ्नै जिल्लाका सांसदहरुले समेत मेरो विरुद्धमा हस्ताक्षर अभियान सञ्चालन गरे । अब विकास विरोधीहरु को रहेछन् भनेर जनताले चिन्ने दिन आएको छ ।’ पौडेलविरुद्ध मकवानपुरका नेकपाका सांसद् मुनु सिग्देल, कुमारी मोक्तान, प्रेमबहादुर पुलामी, ओमबहादुर ग्लानले हस्ताक्षर गरेका छन् ।

प्रदेशसभाको बैठक माघ ७ गतेका लागि डाकिएको छ । कुल एक सय १० प्रदेशसभा सदस्य रहेको वाग्मती प्रदेशमा मुख्यमन्त्रीको पक्षमा ३४ मत मात्रै रहेको छ । मुख्यमन्त्री पौडेलले अविश्वासको प्रस्तावलाई परास्त गर्न आफूले विभिन्न दलहरुसँग आन्तरिक छलफल गरिरहेको समेत बताएका छन् ।

प्रकाशित : पुस २५, २०७७ १३:१०
प्रतिक्रिया
पठाउनुहोस्

प्रदेश १ का औद्योगिक समस्याबारे मन्त्रालयका अधिकारीको ध्यानाकर्षण

कान्तिपुर संवाददाता

विराटनगर — प्रदेश १ का उद्योगी व्यवसायीले उद्योग–व्यापर क्षेत्रका समस्याबारे उद्योग मन्त्रालयका उच्च पदाधिकारीको ध्यानाकर्षण गराएका छन् । उनीहरुले समस्या समाधानका लागि पहल गरिदिन आग्रह समेत गरेका छन्।

नेपाल उद्योग वाणिज्य महासंघ प्रदेश १ का पदाधिकारीले उद्योग सचिव चन्द्रकुमार घिमिरेसमक्ष उद्योग क्षेत्रमा देखिएको समस्याबारे जानकारी गराउँदै समाधानका लागि पहल गरिदिन आग्रह गरेका हुन् ।

महासंघका अध्यक्ष टीकाराज ढकालले श्रमिक विदेशिने क्रम र कोभिड–१९ महामारीका कारण विदेशी श्रमिकसमेत काममा लगाउन नपाएकाले औद्योगिक क्षेत्र समस्यामा परेको बताए ।

नेपालभित्र आत्मनिर्भर हुने उद्योगलाई प्रोत्साहन गर्न जोड दिए । विदेशी कामदार ल्याउन नसक्दा इँट्टाभट्टा उद्योग, प्लाइउडलगायत उद्योगहरु बन्द हुने अवस्थामा पुगेको ढकालले बताएका थिए । भन्सारमा जाँचपास भइसकेका मालबाहक सवारी साधन बीचमा पर्ने बाटोमा फेरि जाँच गर्ने प्रवृत्ति रोक्न आग्रह पनि गरे ।

नेपाल उद्योग वाणिज्य महासंघका केन्द्रीय सदस्य अविनाश बोहराले ठूलो परिमाणको कार्गो भित्र्याउन रेलमार्गको सुविधा उपलब्ध हुने व्यवस्था गर्न माग गरे । त्यसो गरे लागत कम पर्ने उनको भनाइ थियो ।

जग्गाको मूल्य अत्यधिक बढेकाले उद्योग स्थापना गर्न समस्या भएको उनले बताए । उद्योग खोल्नका लागि लिजमा जग्गा उपलब्ध गराउनुपर्ने बोहोराले बताए ।

उद्योग सचिव घिमिरले रेमिट्यान्सबाट मुलुकको अर्थतन्त्रमा टेवा पुगेको बताउँदै रेमिट्यान्सबाट आयातकर्ता र जग्गा कारोबारीलाई फाइदा पुगेको उल्लेख गरे ।

उनले रेमिट्यान्ससँगै उत्पादनमूलक उद्योगलाई प्राथमिकता राखेर मुलुकको आर्थिक विकासमा टेवा पुराउनुपर्ने बताए । कार्यक्रमा झापा, मोरङ, सुनसरी, ताप्लेजुङ लगायत जिल्लामा रहेका महासंघका प्रतिनिधिहरुको सहभागिता थियो ।

प्रकाशित : पुस २५, २०७७ १३:०५
पूरा पढ्नुहोस्
प्रतिक्रिया
पठाउनुहोस्
×