सिन्धुलीमा कोरोना परीक्षण सुरु- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

सिन्धुलीमा कोरोना परीक्षण सुरु

राजकुमार कार्की

सिन्धुली — सिन्धुलीमा आइतबारदेखि पीसीआर विधिबाट कोभिड–१९ को परीक्षण सुरु गरिएको छ ।

यसअघि कोरोनाको शंकास्पद बिरामीको स्वाब संकलन गरि पीसीआर परिक्षण गर्न हेटौंडा र धुलिखेल पुठाउनुपर्थ्यो ।

वाग्मती प्रदेशको सामाजिक विकास मन्त्रालयले सिन्धुली अस्पताललाई पीसीआर मेसिन दुई महिनाअघि सहयोग गरेसँगै जडान गरी परिक्षण सुरु गरिएको हो ।

सिन्धुली अस्पतालको मातहतमा रहने गरि कमलामाई नगरपालिका-६ शिवनगरमा मेसिन जडान गरि ल्याब सञ्चालनमा ल्याइएको हो । वाग्मती प्रदेश सरकारको एक करोड २५ लाखको लागत र सिन्धुली अस्पतालको १५ लाख बराबरको व्यवस्थापन खर्चमा उक्त ल्या‍ब सञ्चालनमा ल्याइएको अस्पताल विकास समितिका अध्यक्ष प्रल्हादकुमार पोखरेलले जानकारी दिए । प्रयोगशाला सञ्चालनका लागि ९ जना स्वास्थ्यकर्मीको व्यवस्था गरिएको छ ।

सामाजिक विकास मन्त्री युवराज दुलालले कोभिड–१९ पीसीआर ल्याबको सदरमुकाम सिन्धुलीमाढीमा उद्घाटन गरेका छन् । १५ हजार प्रतिव्यक्ति लिएर सुरु भएको स्वाब परीक्षण एकहजार पाँचसयमा झरेको र आगमी दिनमा नि:शुल्क सेवा दिने प्रदेश रकारको योजना रहेको बताए ।

कोरोना भाइरस संक्रमणको जोखिम बढेसँगै वाग्मती प्रदेश सरकारले हेटौडा, काभ्रे, भक्तपुर, त्रिशुली र सिन्धुलीमा पीसीआर मेसिन जडान गरि सेवा दिएको उनले बताए ।

प्रकाशित : मंसिर ७, २०७७ १८:५१
प्रतिक्रिया
पठाउनुहोस्

यलम्बर संगीत प्रतियोगिताका उत्कृष्ट १० छानिए

कान्तिपुर संवाददाता

काठमाडौँ — यलम्बर संगीत प्रतियोगिताको छैटौं संस्करणमा १० उत्कृष्ट प्रतियोगी छानिएका छन् । किरात राई सांस्कृतिक कलाकार संघ केन्द्रीय समितिले प्रतियोगिताको आयोजना गरेको हो ।

छनोटको चौथो चरणमा आइपुग्दा अन्तिम प्रतिस्पर्धाका निम्ति उत्कृष्ट १० जना छानिएका छन् । जसमा खोटाङका लकेश राई, प्रबृत्ति राई र मञ्जु राई, ओखलढुंगाका चाँदनी वाम्बुले राई र मनोजकुमार राई, सुनसरीका बिनु राई र सरिता राई, उदयपुरका पम्फा चाम्लिङ राई, धनकुटाका साङ्गेन राई र इजरायलबाट निलिमा साम्पाङ राई चयन भएका छन् ।

कोभिड–१९ का कारण यो वर्ष अनलाइनबाट प्रतियोगिताको आयोजना गरिएको संघले जनाएको छ । विश्वव्यापी प्रतियोगिताको प्रारम्भिक चरणमा १० देशका २ सय १३ जना कलाकार सहभागी थिए ।

संघका अध्यक्ष रामकर राईका अनुसार गीतसंगीतका माध्यमबाट सामाजिक, सांस्कृतिक जागरण अभियानका रूपमा हरेक वर्ष प्रतियोगिता आयोजना गरिँदै आएको छ । ‘पहिलो किरात राजा यलम्बरको नाममा किराती इतिहास, मौलिकता, भाषा, संस्कार–संस्कृतिको संरक्षण, प्रवर्द्धन तथा उत्थान अभियान अघि बढाएका हौं,’ उनले भने ।

अन्तिम छनोट तीन सातापछि हुने प्रतियोगिताका प्रचार–प्रसार विभाग संयोजक पदम थुलुङ राईले जनाएका छन् । पहिलो, दोस्रो, तेस्रो र दर्शकले रुचाएका उत्कृष्ट एकजनालाई क्रमश: नगद ३० हजार, १५ हजार, १० हजार र पाँच हजार रुपैयाँ तथा प्रमाणपत्र प्रदान गरिने छ ।

पहिलो पुरस्कारप्राप्त कलाकारले हङकङस्थित किरात राई यायोक्खाले आयोजना गर्ने यलम्बर सााझमा सहभागी हुन पाउने छ । दोस्रो विजेताले एउटा गीत रेकर्ड गर्ने मौका दिइने छ । संघले यसअघि आयोजना गरेको यलम्बर संगीत प्रतियोगितामा सागर संसार राई, निश्चल राई, नम्रता राई, सोनाम राई र अम्बिका राई प्रथम भएका थिए ।

प्रकाशित : मंसिर ७, २०७७ १८:४२
पूरा पढ्नुहोस्
प्रतिक्रिया
पठाउनुहोस्
×