बगैंचामा रमाएका निजामती कर्मचारी- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

बगैंचामा रमाएका निजामती कर्मचारी

टीकाप्रसाद भट्ट

रामेछाप — लक्ष्मण भुजेल पेसाले निजामती कर्मचारी हुन् । सधैं व्यस्त हुने जिल्ला प्रशासन कार्यालय रामेछापमा कार्यरत भूजेलको चिनारी त्यत्तिले मात्र पुग्दैन । उनी उदाउँदो किसान पनि हुन् ।  

भुजेलको घर मन्थली नगरपालिका वडा नम्बर १ मा पुग्ने जो कोहीले उनको कृषिकर्मको खुलेर प्रसंशा गर्छन् । छिमेकीको सुख्खा जग्गाको वरिपरि उनले आफ्नो जग्गालाई हरियाली बनाएका छन् । उनले कृषिका विभिन्न सिप सिकेका छन् र उत्पादनमा रमाएका छन् । कृषि प्राविधिकका साथै इन्टरनेटको प्रयोग गरेर आफ्नो कृषि जमिनको खेती सुधार गर्दै आएका भूजेल घरमा पुग्ने सबैलाई आफ्नो खेतिका बारेमा बेलीविस्तार लगाउँछन् ।

अविवाहित भूजेल प्राय: एक्लै कृषिमा जुट्छन् । भान्सामा वृद्धा आमालाई छोडेर उनी बिहान-बेलुका कृषिलाई अझ निखार ल्याउन बारी कान्लामै खट्छन् । बारबेर, सिँचाई, गोडमेल र नयाँ फलफूल थप्ने उनको दैनिक कार्य जस्तै हो । रोग, किरा र छाँटकाँटको हेरचाह गरिरहेका हुन्छन् ।

भूजेलले आफ्नो सबै जग्गामा फलफूल उमारेका छन् । उनको पाखो जग्गामा मकै रोप्नका लागि गोरु नहुलेको केही वर्ष भयो । बरु कहिलेकाहीं कामदारले गोडमेल गरिरहेका हुन्छन् ।

पाखो जग्गामा रोपेका हरेक फलफूलको फेदमा प्लाष्टिकको ठूलो जर्किन राखिएको छ । जर्किनमा पानी भरेर थोपा सिँचाईको प्रयोग गर्दै आएका उनले उक्त सीप अन्यलाई पनि सिकाएका छन् । ‘मन्थलीस्थित मन्थली माविमा गएको वर्षायाममा आँप लगायतका धेरै फलफूलका बिरुवा रोपियो’, भुजेल भन्छन् – 'जर्किन र थोपा प्रविधिको बारेमा मैले सुझाइदिए, उनीहरुले त्यसैगरी बिरुवा हुर्काउँदै छन् ।' उनले प्रयोग गरेका २० लिटर क्षमताका जर्किनले थोपा सिँचाई कार्यलाई प्रभावकारी बनाएका छन् ।

मन्थली सुख्खा क्षेत्र हो । बिरुवा रोप्ने अभियान हरेक वर्ष भए पनि तिनको आयु छोटो हुन्छ । विगत १० वर्षदेखि पर्याप्त वर्षा नहुँदा मन्थली वरिपरी सुख्खा पाखो छ । बिरुवा लगाएको एक वर्ष नपुग्दै अधिकांश मर्ने गर्छन् ।

भुजेलले आफ्नो सबै जग्गालाई दीगो रुपमा बारबेर गरेका छन् । लाखौं खर्चेर तारजालीले जग्गा घेरेकाले छाडा पशुले खान पाएका छैनन् । घरभन्दा अलि माथिको लिसिमपानीको पानी ल्याएर ट्यांकीमा जमाएका छन् । त्यही माथि पाईपमार्फत बिरुवाको भेदको जर्किनमा भर्छन् । भन्छन्– 'बिरुवा हुर्काउन बारबेर र सिँचाई नै महत्वपूर्ण कुरा हो ।'

उनको मेहनतले केही वर्षअघिदेखि उपलब्धि दिन थालेका छन् । सयभन्दा बढी विभिन्न जातका आँपका रुखमा रहरलाग्दो फल लाग्न थालेका छन् । त्यसका अतिरिक्त रुख र भुइँ कटहर, कागती, एवोगाडो, अम्बा, निबुवा, रुद्राक्ष र केरा उनको बगैंचाका अन्य फलफूल हुन् । तिनको संख्यासमेत उल्लेख्य छ ।

फलफूल बगैंचाभित्र सिजन बमोजिमको तरकारी लगाउँछन् र त्यसैबाट घरको आवश्यकता धान्छन् । 'चार/पाँच वर्ष भयो मैले यो काम गर्न थालेको', भुजेल भन्छन्– 'अझै व्यवस्थित बनाउने प्रयासमा जुट्दै छु ।'


प्रकाशित : कार्तिक २६, २०७७ १५:४१
प्रतिक्रिया
पठाउनुहोस्

जथाभाबी पोल ढालिँदा बिग्रिए बागलुङ बजारका सीसी क्यामेरा

प्रकाश बराल

बागलुङ — सदरमुकाम बागलुङ बजारमा पाँच वर्षअघि जडान गरिएका सीसी क्यामेरा मर्मत–सम्भार अभावमा काम नलाग्ने भएका छन् । कतिपय क्यामेरा फुटिसकेका छन् भने कतिपयमा धुलो जमेर केही नदेखिने भएको छ  ।

बजारको सुरक्षामा प्रहरीलाई साथ दिने भन्दै उद्योग वाणिज्य संघले ४० वटा सीसी क्यामेरा जडान गरेको थियो । तिनको फुटेज जिल्ला प्रहरीमा रहने व्यवस्था थियो । तर, झन्डै एक वर्षदेखि प्रहरीमा फुटेज हेर्ने व्यवस्था छैन । ‘हामीले लाखौं खर्चेर जडान गर्‍यौं, नगरपालिकाले पनि हेरेन, प्रहरीले पनि वास्ता गर्न छाडेको छ,’ संघका पूर्वअध्यक्ष वसन्तकुमार श्रेष्ठले भने, ‘बजार क्षेत्रमा हुने जुनसुकै अपराधमा सीसी क्यामेरा नभएपछि प्रहरीले अनुसन्धान गर्न सक्दैन, रेकर्ड पनि भेटिँदैन ।’ नगरपालिकाले बजारका अव्यवस्थित पोल हटाउँदा फालिएका क्यामेरा पनि जडान नभएको श्रेष्ठले बताए ।

जडान गर्दाको समयताका सीसी क्यामेराको सहायताले चोरीका धेरै घटना सार्वजनिक भएका थिए । सबै क्यामेरा बिग्रेपछि कन्ट्रोल रुम सञ्चालनमा नआएको जिल्ला प्रहरी कार्यालयका डीएसपी राजेन्द्र रेग्मीले बताए । ‘पहिला थियो, अहिले कन्ट्रोल रुम पनि छैन, बजारका पोल व्यवस्थापन गर्ने बेलामा सबै तार चुँडिएपछि जडानै हुन सकेन,’ उनले भने । अपराध नियन्त्रणमा समेत प्रहरीलाई बाधा पर्न थालेको रेग्मीले बताए । नगरपालिकासहित विद्युत्, टेलिकम र निजी केबुल टेलिभिजन कम्पनीहरूले तार हटाउने बेलामा सीसी क्यामेरा क्षतविक्षत बनाएको रेग्मीले टिप्पणी गरे । ‘उनीहरूले प्रहरी र उद्योग वाणिज्य संघलाई वास्तै नगरी पोल ढालेछन्,’ उनले भने, ‘सुरक्षा चासो बढी भएकाले व्यवसायीले फेरि सहयोग गर्ने भन्नुभएको छ ।’

प्रहरीलाई बजारभित्र गस्ती गर्नका लागि सुनचाँदी व्यवसायी संघले ५ वर्षअघि ७ वटा साइकल दिएको थियो । केही महिनापछिबाटै ती साइकल प्रयोगमा आउन छाडेका थिए । गत वर्ष बैंकर्स एसोसिएसनले पनि ७ वटा साइकल दिएको थियो । ती साइकल पनि दुई महिनापछि देखिन छाडेको एसोसिएसनका अध्यक्ष दीपक शर्माले बताए ।

‘हामीले दिएका साइकल त अब भेटिँदैन होला, बैंकर्सले दिएका पनि कता पुगेका छन्,’ सुनचाँदी व्यवसायी अनिश खातीले भने, ‘सुरक्षाको व्यवस्थापनमा सजिलो भएका सामग्री नै अलपत्र भएपछि प्रहरीको अनुसन्धान फितलो हुन्छ ।’ बागलुङ नगरपालिकाले चोक सुधार तथा सडक चौडा पार्ने कार्यक्रमअन्तर्गत पुराना पोल ढालेको छ । गुजुल्टा तार हटाउँदा सीसी क्यामेरामा पनि क्षति पुगेको हो । वाणिज्य संघले केही समयभित्रै नयाँ क्यामेरा जडान गर्ने योजना बनाएको अध्यक्ष युवराज राजभण्डारीले बताए । ‘हामीले जोडिरहने, नगरपालिका र प्रहरीले संरक्षण नगर्ने भयो भने अपराध नियन्त्रण हुँदैन,’ उनले भने, ‘पाएका सामाग्री चुस्त रूपमा सञ्चालन गर्न इच्छाशक्ति चाहिन्छ ।’ अपराध नियन्त्रणमा गरिएको प्रयासमा प्रहरी र नगरपालिकाकै असहयोग भइरहेको उनले टिप्पणी गरे ।

प्रकाशित : कार्तिक २६, २०७७ १५:१५
पूरा पढ्नुहोस्
प्रतिक्रिया
पठाउनुहोस्
×