नुवाकोट जिल्ला अस्पतालमा पीसीआर ल्याब

संघीय सांसद नारायणप्रसाद खतिवडाको स्थानीय पूर्वाधार विकास साझेदारी कार्यक्रममार्फत ल्याब स्थापना गरिएको अस्पताल विकास समितिले जनाएको छ ।

पीसीआर मेसिन वाग्मती प्रदेशकै उच्चस्तरीय भएको प्रादेशिक प्रयोगशालाका निर्देशक नारायणकाजी कार्कीले दाबी गरे । प्रदेश उपसभामुख राधिका तामाङले सबैको पहलमा ल्याब स्थापना भएकाले नि:शुल्क स्वाब परीक्षण हुने बताइन् । उक्त पीसीआर मेसिनले एक पटकमा ९६ जनाको स्वाब परीक्षण गर्न सक्छ । रिपोर्ट पनि २४ घण्टामै दिन सकिने त्रिशूली अस्पताल विकास समितिका अध्यक्ष अर्जुन न्यौपानेले बताए ।

विदुर नगरपालिकाले असोज १५ मा पीसीआर मेसिन खरिद गरी त्रिशूली अस्पताललाई दिएको थियो । नगरपालिकाका प्रमुख प्रशासकीय अधिकृत सुदेव पोखरेलका अनुसार मेसिनको मूल्य भ्याटसहित ८६ लाख रुपैयाँ परेको छ ।