भरतपुर अस्पतालमा थप एक संक्रमितको मृत्यु

अस्पतालका सूचना अधिकारी लीलाधर पौडेलका अनुसार मृत्यु हुनेमा पुर्वी चितवनको रत्ननगर नगरपालिका–१३ का ८५ वर्षीय पुरुष छन् । ज्वरो र खोकीको समस्या भएपछि उनी मंगलबार अस्पताल भर्ना भएका थिए । बुधबार उनमा संक्रमण पुष्टि भएको थियो ।

स्वास्थ्यस्थिति जटिल हुँदै गएपछि बुधबारदेखि अस्पतालले उनलाई एचडीयूमा राखेर अक्सिजनको सहयोगमा उपचार गराइरहेको थियो । कोभिड–१९ निमोनियाका कारणले उनको बिहीबार बिहान ८ बजेतिर निधन भएको सूचना अधिकारी पौडेलले जानकारी दिए । यसअघि बिहीबार बिहान सवा ६ बजे हेटौंडा बस्ने ३३ वर्षीया गर्भवतीको कोरोनाका कारणले मृत्यु भएको थियो ।

कोरोनाका कारण चितवनका मात्रै अहिलेसम्म ४६ जनाको निधन भएको छ । चितवन स्वास्थ्य कार्यालयका अनुसार बुधबार दिउँसोसम्म चितवनमा संक्रमितको संख्या ३ हजार ४ सय ९५ पुगेको छ । निको हुन बाँकी एक हजार ४ सय १५ जना छन् ।