झिरघारीमा पहिरो, त्रिभुवन राजपथ अवरुद्ध- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

झिरघारीमा पहिरो, त्रिभुवन राजपथ अवरुद्ध

सुवास विडारी

मकवानपुर — तराईबाट काठमाडौं प्रवेश गर्ने सबैभन्दा पुरानो राजमार्ग त्रिभुवन राजपथ पनि पहिरोका कारण अवरुद्ध भएको छ ।

बिहीबार बिहानबाट परेको अविरल वर्षासँगै त्रिभुवनराजपथ अन्तर्गत भीमफेदी गाउँपालिका–३, झिरघारीमा पहिरो जाँदा उक्त सडकखण्ड अवरुद्ध भएको हो । जिल्ला प्रहरी कार्यालय मकवानपुरका अनुसार दिउँसो करिब २ बजेको समयमा गएको पहिरो पन्छाउने काम भइरहेको छ । ‘पानी पर्न रोकिएको छैन । तर इलाका प्रहरी कार्यालय पालुङबाट खटेको टोलीले पहिरो पन्छाउने काम सुरु गरेको छ ।’, जिल्ला प्रहरी कार्यालय मकवानपुरका प्रहरी नायब उपरीक्षक इन्द्रबहादुर रानाले भने ।

इलाका प्रहरी कार्यालय पालुङका निरीक्षक विकासराज तामाङका अनुसार झिरघारीमा पहिरोसहित माटोको लेदो बगिरहेको छ । ‘पहिरो पनि छ । माटोको लेदो पनि बगिरहेको छ । पानीमै भएपनि पहिरो पन्छाउने काम जारी छ ।’, उनले भने ।

मकवानपुरमा भएर काठमाडौं प्रवेश गर्ने भीमफेदी–कुलेखानी तथा कान्तिराजपथमा पहिरो जाँदा हाल दुवै सडकमा यातायात आउजाउ बन्द अवस्थामा रहेको छ ।

प्रकाशित : आश्विन ८, २०७७ १५:०१
प्रतिक्रिया
पठाउनुहोस्

बझाङमा पीसीआर परीक्षण सुरु

दैनिक दुई सयको परीक्षण गरिने 
वसन्तप्रताप सिंह

बझाङ — जिल्लामा बिहीबारबाट पीसीआर परीक्षण सुरु गरिएको छ । प्रयोगशाला परीक्षण गरिएका १० वटा नुमनाको रिर्पोट पुनः पुष्टिका लागि डडेल्धुरा अस्पतालको प्रयोगशालामा परीक्षणमा गर्दा एउटै नतिजा दिएपछि प्रयोगशालाबाट परीक्षण सुरु गरिएको हो ।

आवश्यक पर्दा दैनिक एक हजार नमुनाको परीक्षण गर्न सकिने भए पनि हाललाई दैनिक २ सय स्वाब परीक्षण गरिने अस्पतालले जनाएको छ । जिल्ला अस्पतालका प्रमुख डा.सन्दिप ओखेडाले प्रयोगशाला स्थापनाका लागि सहयोग गर्ने सबैलाई धन्यवाद दिँदै यसले जिल्लामा महामारी रोकथाममा ठूलो भूमिका निर्वाह गर्ने बताएका छन् । ‘नमुनाहरु डडेल्धुरा र धनगढी पठाउनु पर्ने अवस्थाको अन्त्य भएको छ,’ उनले भने, ‘अब रिर्पोट आउन हप्तौं कुर्नु पर्ने छैन ।’ उनले संक्रमण फैलिएको क्षेत्रमा तत्काल द्रूत परीक्षण सेवा पनि सञ्चालन गर्न सकिने बताए ।

प्रयोगशाला सञ्चालनमा आए पछि समयमै परीक्षणको नतिजा आउने र क्‍वारेन्टाइनमा स्थानीय तहले गरिरहेको खर्चभार पनि कम हुने जिल्ला समन्वय समिति प्रमुख खड्गबहादुर खड्काले बताए ।

जिल्लाका सबै पालिकाहरुको लगानीमा प्रयोशालाका उपकरण र जडान गर्दा १ करोड २५ लाख रुपैयाँ खर्च भएको जिल्ला अस्पताल बझाङले जनाएको छ । प्रयोगशाला स्थापनाको लागि यहाँका १० वटा गाउँपालिकाले १०/१० लाख र जिल्ला समन्वय समिति र २ वटा नगरपालिकाले १५/१५ लाखका दरले रकम संकलन गरेका थिए ।

प्रकाशित : आश्विन ८, २०७७ १४:५३
पूरा पढ्नुहोस्
प्रतिक्रिया
पठाउनुहोस्
×