पीसीआर रिपोर्ट नआउँदै शव आफन्तलाई बुझाएपछि शिर मेमोरियल अस्पताललाई स्पष्टीकरण

भदौ २५ गते मृत्यु भएकी भुम्लु गाउँपालिकाकी ७४ वर्षीया महिलाको शव सद्गत गरिएपछि रिपोर्ट आउँदा कोरोना पुष्टि भएको थियो ।

संक्रमितको शव व्यवस्थापनमा लापरबाही गरेको र समुदायमा कोरोना संक्रमणको जोखिम बढाएको भन्दै अस्पताललाई स्पष्टीकरण सोधिएको जिल्ला कमान्ड पोस्टका सदस्य डा. नरेन्द्रकुमार झाले जानकारी दिए । २४ गते अस्पताल भर्ना भएकी ती महिलाको उपचारका क्रममा मृत्यु भएको थियो । लगत्तै स्वाब संकलन गरी पीसीआर परीक्षणका लागि पठाइएकोमा २८ गते साँझ रिपोर्ट आएको थियो ।

अस्पतालले परिवारले नमानेका कारण रिपोर्ट आउनुअघि नै घर पठाइएको जनाएको छ । ‘दमकी रोगी भएकाले सोही कारण मृत्यु भएको हुन सक्ने भन्दै परीक्षण गराए पनि रिपोर्ट आउन्जेल परिवारले कुर्नुभएन, मान्दै नमानेपछि सद्गत गर्न थोरै व्यक्ति जानु, मास्क प्रयोग गर्नु, सामाजिक दूरी कायम गर्नु भनेर सम्झाएका थियौं,’ अस्पतालका प्रवक्ता डा. अरुण गुप्ताले भने ।

स्वास्थ्य कार्यालय काभ्रेका प्रमुख डा. नरेन्द्रकुमार झाले मृतकबारे अस्पतालले कुनै जानकारी र समन्वय नगरेको बताए । ‘परीक्षणको नतिजा आएपछि मात्रै अन्तिम संस्कार गरेको भए कम जोखिम हुन सक्थ्यो तर शंकास्पदको स्वाब लिएको, मृत्यु भएकोलगायत कुनै पनि घटनाबारे अस्पतालले जानकारी र समन्वय गरेन,’ उनले भने, ‘कन्ट्याक्ट ट्रेसिङ टिमले काम थाल्दा सबै कुरा पत्ता लाग्यो, प्रत्यक्ष सम्पर्कमा आएकाको स्वाब संकलन गर्छौं ।’

मृतक परिवारका सदस्यले भने सामाजिक दूरी कायम गरी अन्तिम संस्कार गरिएको बताए । गाउँपालिका अध्यक्ष गुमानध्वज कुँवरले अस्पतालको लापरबाहीका कारण जोखिम बढेको बताए । हालसम्म कोरोनाले जिल्लाका दुई र अन्य जिल्लाका तीन जनाको धुलिखेल अस्पतालमा मृत्यु भएको थियो । उनीहरूको शव व्यवस्थापन नेपाली सेनाले गरेको थियो ।