ट्रक जुध्दा चालकको मृत्यु- वाग्मती - कान्तिपुर समाचार

ट्रक जुध्दा चालकको मृत्यु

रमेशकुमार पौडेल

चितवन — नारायणगढ–मुग्लिन सडकमा सोमबार बिहान दुई ट्रक ठक्कर खाँदा गम्भीर घाइते भएका एक चालकको उपचारका क्रममा मृत्यु भएको छ । चितवन जिल्ला प्रहरी कार्यालयका प्रवक्ता डीएसपी सूर्य थापाका अनुसार ना४प ८०११ नम्बर ट्रकका चालक बारा, परवानीपुरका २८ वर्षीय अजय साहको मृत्यु भएको हो ।

उनको भरतपुरमा रहेको पुरानो मेडिकल कलेजको शिक्षण अस्पतालमा उपचारका क्रममा मृत्यु भएको हो ।

इच्छाकामना गाउँपालिका-५ मुग्लिननजिक खहरे पुलमा बिहान साढे ८ बजे उनको ट्रक काठमाडौंबाट नारायणगढ आउँदै गरेको ना६ख २४२३ नम्बरको ट्रकसँग ठोक्किएको थियो । अर्को ट्रकका चालक दोलखा, जिरी-२ का ४० वर्गीय दाङ्गिमा शेर्पा पनि घाइते भएको डीएसपी थापाले बताए ।

त्यसै गरी ट्रकमा रहेका सिराहाका लालगुलाबी अन्सारी र चितवन इच्छाकामना गाउँपालिका-६ का भावी गुरुङ, बिमा गुरुङ र सुभद्रा गुरुङ पनि घाइते छन् । उनीहरूको अवस्था सामान्य रहेको चिकित्सकलाई उद्धृत गर्दै प्रहरीले जनाएको छ । दुर्घटनापछि केही बेर बाटो पनि अवरुद्ध भएको थियो ।


प्रकाशित : भाद्र २९, २०७७ १३:०५
प्रतिक्रिया
पठाउनुहोस्

योशिहिडे सुगा जापानको नयाँ प्रधानमन्त्री बन्‍ने निश्‍चित

एजेन्सी

टोक्यो — जापानी मन्त्रिपरिषद्मा प्रमुख सचिव योशिहिडे सुगा जापानको नयाँ प्रधानमन्त्री बन्ने भएका छन् । सोमबार सत्तारुढ दल लिबरल डेमोक्रेटिक पार्टी(एलडीपी) ले सुगालाई संसदीय दलको नेतामा चयन गरेसँगै उनी जापानको नयाँ प्रधानमन्त्री बन्ने निश्चित भएको जापानी समाचार संस्था क्योदोले जनाएको छ ।

सत्तारुढ दलका सांसदहरुबीच भएको मतदानमा सुगा स्पष्ट मतसहित संसदीय दलको नेतामा निर्वाचित भएका हुन् । उनका प्रतिद्वन्द्वीमा पूर्वरक्षामन्त्री शिगेरु इशिबा र पूर्वविदेशमन्त्री फुमियो किशिदा रहेका थिए । सुगाले ३७७ मत प्राप्त गर्दा किशिदाले ८९ र इशिबाले ६८ मत प्राप्त गरे । संसदीय दलको नेता छान्नका लागि एलडीपीका ३९४ सांसद, स्थानीय च्याप्टरका १४१ डेलिगेट्स र पार्टीका वरिष्ठ नेताहरुले मतदान गरेका थिए ।

गत अगस्ट २८ मा शिन्जो आबेले स्वास्थ्य अवस्थाका कारण राजीनामा दिएपछि जापानका नयाँ प्रधानमन्त्री चुन्नका लागि सत्तारुढ दलमा निर्वाचन भएको हो । आबेको राजीनामापछि उनीनिकट नेता मानिने सुगा नै संसदीय दलको नेतामा निर्वाचित हुने अपेक्षा गरिएको थियो । बुधबार प्रधानमन्त्रीका लागि संसदमा चुनाव हुनेछ । तर जापानी संसद्मा एलडीपीको बहुमत भएकाले त्यो चुनाव औपचाकिता मात्रै हुनेछ ।

आबेको कार्यकाल सन् २०२१ को सेप्टेम्बरमा सकिँदै थियो । सन् २०२१ को अक्टोबर २१ भन्दा अघि नै जापानमा आम चुनाव सम्पन्न गरिसक्नुपर्छ । त्यसैले सुगा कम्तीमा पनि आउँदो चुनावसम्म जापानको प्रधानमन्त्री बन्ने लगभग निश्चित भएको अन्तर्राष्ट्रिय सञ्चारमाध्यमले जनाएका छन् ।

सम्बन्धित समाचार

प्रकाशित : भाद्र २९, २०७७ १३:०२
पूरा पढ्नुहोस्
प्रतिक्रिया
पठाउनुहोस्
×