उपहार परेको भन्दै सामाजिक सञ्जालबाट ठगी
चितवन — उपहार परेको भन्दै विभिन्न व्यक्तिलाई सामाजिक सञ्जालबाट ठगी गर्ने तीन जनालाई चितवन प्रहरीले पक्राउ गरी मुद्दा चलाएको छ । इलाका प्रहरी कार्यालय खैरहनीले साउन २० गते एक शंकास्पद व्यक्तिलाई पक्राउ गरेपछि उनीहरूको ठगी धन्दा बाहिर आएको हो ।
राप्ती नगरपालिका–८ खुरखुरेको एउटा मनी ट्रान्सफरबाट प्रेमबहादुर राना नामका व्यक्तिले शंकास्पद तबरले पटक–पटक ठूलो परिमाणमा रकम निकालेको गोप्य सूचनाका आधारमा प्रहरीले उनलाई नियन्त्रणमा लिएको थियो ।
जिल्ला प्रहरी कार्यालयका प्रहरी नायब उपरीक्षक सूर्य थापाका अनुसार समातिएका व्यक्तिविरुद्ध भरतपुर महानगरपालिका–२० शारदानगर बस्ने आरती राना र मोरङको लेटाङ–९ की विष्णुकुमारी राईका भतिजा नाता पर्ने भरतपुर–११ का केशव पाल्पाली कुमालले जाहेरी दिएका छन् । यी दुई जनाबाट मात्रै उपहार पठाउने बहानामा उक्त गिरोहले ५ लाख २८ हजार ८८५ रुपैयाँ ठगी गरेको डीएसपी थापाले बताए ।
यसरी गर्थे ठगी
प्रहरीका अनुसार यी दुई महिलालाई सामाजिक सञ्जाल ह्वाट्सअप र फेसबुकबाट सम्पर्क गरेर उपहार पठाउने भन्दै पैसा मगाएको खुलेको छ । खुरखुरेमा पक्राउ परेका व्यक्तिबाट राजकुमार थापामगर नामको नागरिकताको प्रतिलिपि, सक्कलै सवारी लाइसेन्स र राजकुमारको फोटो रहेको तर प्रेमबहादुर रानाको नामको नक्कली लाइसेन्सको प्रतिलिपि भेटियो । पक्राउ परेका व्यक्ति प्रेम नभएर राजकुमार थापामगर रहेछन् ।
उनले आरतीलाई ह्वाट्सअपबाट सम्पर्क गरेका थिए । उपहार परेको भनी त्यसबापत विभिन्न प्रक्रिया पूरा गर्न २ लाख ५३ हजार २ सय ४० रुपैयाँ जम्मा गर्न लगाएका थिए । त्यसै गरी विष्णुकुमारीलाई फेसबुकबाट सम्पर्क गरी २ लाख ७५ हजार ६ सय ४५ रुपैयाँ जम्मा गर्न लगाएको खुलेको छ ।
रानाले आफ्नो र सञ्जना पाठकका नाममा मनी ट्रान्सफरमार्फत पैसा जम्मा गर्न लगाउने गरेको प्रहरी अनुसन्धानले देखाएको छ । रानालाई दिल्ली बसेर उनका भाइ सोमराजले सघाउने गर्थे । ‘विदेशीको फोटो राखेर सामाजिक सञ्जालमा नक्कली खाता खोल्ने, विशेष गरी महिलाहरूलाई साथी बनाउने र इटली, अमेरिका, अस्ट्रेलिया, सिंगापुर र फ्रान्सजस्ता देशबाट बोलेको भनी कुराकानी गर्ने र घनिष्ठ हुने गरेको पाइयो,’ डीएसपी थापाले भने ।
त्यसपछि आइफोन, ब्रान्डेड ब्यागहरू, ब्रासलेट र गहना उपहार परेको भन्दै विभिन्न व्यक्तिको नाम र ठेगानामा सामान कुरियर गरेको बिल र फोटो नै पठाएर विश्वास दिलाउने गरेको भेटिएको छ । उनीहरू कुरियरको शुल्क र करबापत भन्दै पाँच सयदेखि आठ सय डलरसम्म माग्ने र मनी ट्रान्सफरमा रकम हाल्न लगाउँथे । त्यसपछि भारतसम्म सामान आएको र अनेक खालका शुल्क लागेको भन्दै नक्कली कुरियर कम्पनीको नाममा इमेल पठाएर फेरि पैसा मग्ने गरेको डीएसपी थापाले बताए ।
उनीहरूले उजुरी परेका दुई महिलाबाहेक अन्यबाट ६ लाख ५७ हजार ९७५ रुपैयाँ ठगेको प्रहरी अनुसन्धानमा खुलेको छ । पक्राउ पर्नेमा तनहुँ, भिमादका ४० वर्षीय राजकुमारसहित चितवन, खैरहनी–१२ सिसहनीका शिवराज पाठक र धादिङ घर भई हेटौंडा–४ बस्ने सत्कार लुइँटेल छन् ।
प्रहरीले यो गिरोहका अन्य ६ जना फरार रहेको बताएको छ । फरार हुनेमा राजकुमारका भाइ सोमराज, धादिङ घर भई काठमाडौं महानगर–१५ चागल बस्ने राजकुमार तामाङ, स्याङ्जा घर भई पाल्पा, रामपुर बस्ने निशाकुसुम भट्टराई, नवलपरासी देवचुली–१२ का लोकप्रसाद भुर्तेल, अर्घाखाँचीका तेजबहादुर केसी र मञ्जु केसी छन् । मनी ट्रान्सफरमा आएको पैसा झिकेर यी व्यक्तिहरूको बैंक खातामा राख्ने गरिएको थियो । पक्राउ परेका व्यक्तिविरुद्ध चितवन जिल्ला अदालतमा मुद्दा दायर भएको डीएसपी थापाले जानकारी दिए ।
प्रकाशित : भाद्र १२, २०७७ १०:०४