चितवनमा ४२ सशस्त्र प्रहरीसहित थप ४६ संक्रमित- वाग्मती - कान्तिपुर समाचार

चितवनमा ४२ सशस्त्र प्रहरीसहित थप ४६ संक्रमित

रमेशकुमार पौडेल

चितवन — सशस्त्र प्रहरीको चितवन भण्डारास्थित गणका ४२ प्रहरीसहित जिल्लामा एकै दिन ४६ जनामा कोरोना संक्रमण देखिएको छ । भरतपुरमा रहेको कोभिड–१९ परीक्षण प्रयोगशालाले सोमबार राति थप संक्रमितको संख्या सार्वजनिक गरेको हो । 

प्रयोगशालाका अनुसार ३ सय ५५ वटा नमुना परीक्षण गर्दा ५० वटामा संक्रमण भेटिएको थियो । तीमध्ये राप्ती नगरपालिका–६ को प्रहरी क्वारेन्टाइनका दुई महिलासहित ४२ र भरतपुर महानगरपालिकाका चार महिला छन् । बाँकी मकवानपुरकी एक महिला, बाराका एक महिला र पुरुष तथा गोरखाकी एक महिला हुन् । उनीहरू भरतपुरकै अस्पतालहरूमा उपचार गराउन आएका बिरामी हुन् ।

चितवनमा एकै दिन थपिएका बिरामीको यो संख्या अहिलेसम्मकै बढी हो । सशस्त्र प्रहरीको भण्डारास्थित गणमा मात्र ५० जना संक्रमित भइसकेका छन् । ‘पहिले आठ जनामा संक्रमण भेटिएपछि ६० जनाको स्वाब संकलन गरेर पठाएकोमा थप ४२ जनामा संक्रमण भेटियो,’ गणका प्रमुख डीआईजी मन्दिप श्रेष्ठले भने ।

अहिलेसम्म चितवनमा संक्रमितको संख्या २५५ पुगेको छ । भरतपुरको सरकारी अस्पतालमका बेडहरू भरिइसकेको अस्पतालका सूचना अधिकारी लीलाधर पौडेलले बताएका छन् । उनका अनुसार सोमबारसम्म मात्रै अस्पतालबाहिर ३० संक्रमित ‘होम आइसोलेसन’मा छन् ।

प्रकाशित : भाद्र २, २०७७ ०७:०३
प्रतिक्रिया
पठाउनुहोस्

लागूऔषध सेवनकर्ताद्वारा प्रहरीमाथि खुकुरी प्रहार

सुवास विडारी

हेटौंडा — हेटौंडा–६, गौरीटारमा लागूऔषध सेवनकर्ता र प्रहरीबीच झडप हुँदा प्रहरी सहायक निरीक्षक र प्रहरी हवल्दार घाइते भएका छन् ।

प्रहरी चौकी चौघडाका इञ्चार्ज प्रहरी सहायक निरीक्षक डम्बरबहादुर केसीको लागूऔषध प्रहयोगकर्ताहरु पक्राउ गर्ने क्रममा उनीहरुले प्रहार गरेको खुकुरी लागेर दायाँ हातमा गम्भीर चोट लागेको स्थानीय प्रत्यक्षदर्शी केदार चौलागाईंले जानकारी दिए । उनका अनुसार प्रहरी हवल्दार विकेश राय पनि घाइते भएका छन् । करिब दश बजेको समयमा स्थानीय युवाहरु लागूऔषध सेवन गरिरहेको समयमा प्रहरीले उनीहरुलाई पक्राउ गर्न खोज्दा युवाहरुले प्रहरीलाई खुकुरी प्रहार गरेका थिए ।

प्रहरीले लागूऔषध सेवन गरेर प्रहरीसँग झगडा गरेर खुकुरी प्रहार गर्ने तीन जनालाई पक्राउ गरेको । पक्राउ पर्नेाहरुमा हेटौंडा–६, २६ वर्षीय भक्तराम राउत, १६ वर्षीय उत्सवा गौतम, ५० वर्षीय नकुल विक रहेका छन् । राउतले प्रहरीमाथि खुकुरी प्रहार गरेका थिए । घाइते भएका प्रहरी सहायक निरीक्षक र हवल्दारको हेटौंडामा सामान्य उपचारपश्चात् थप उपचारका लागि चितवन रेफर गरिएको छ । झगडा भएको स्थान हेटौंडाबाट करिब सात किलोमिटर पूर्वस्थित हेटौंडा–६ र १६ नम्बरको गौरीटार रंगशाला नजिकै हो ।

‘दैनिक त्यसक्षेत्रमा युवाहरु रातको समयमा लागूऔषध सेवन गरेर ढुंगा हान्दै होहल्ला गरेको खबर आएपछि हाम्रो प्रहरी टोली त्यहाँ पुगेको हो । हाम्रो टोलीले उनीहरुलाई देखेपछि रोक्न खोज्दा खुकुरी प्रहार भयो,’ जिल्ला प्रहरी कार्यालय मकवानपुरका प्रहरी प्रमुख उपरीक्षक सुशीलसिंह राठौरले जानकारी दिए ।

प्रकाशित : भाद्र २, २०७७ ०६:५५
पूरा पढ्नुहोस्
प्रतिक्रिया
पठाउनुहोस्
×