सिन्धुलीमा थपिए १३ जना कोरोना संक्रमित

स्वास्थ्य प्रमुख जितेन्द्र साहका अनुसार कोरोना पुष्टि भएकाहरुमध्ये विदेशबाट आएर कमलामाई नगरपालिका–६ मझिटारस्थित क्वारेन्टाइनमा बस्दै आएका २१ देखि ३६ वर्षभित्रका ७ जना पुरुष हुन् । तीमध्ये ४ जना कमलामाई नगरपालिकाका र ३ जना तीनपाटन गाउँपालिकाका रहेका छन् ।

बाँकी संक्रमितमध्ये नेपाली सेनाको पर्यावरण गण रानीबास र सदरमुकामस्थित ब्यारेकमा कार्यरत ३५ र ३६ वर्ष उमेरका दुई जना सैनिक रहेका छन् । त्यस्तै कमलामाई नगरपालिका–७ का १८ वर्षीय एक पुरुष, सिन्धुली अस्पतालमा कार्यरत कर्मचारी कमलामाई नगरपालिका –५ का ३५ वर्षीया महिला रहेको उनले जानकारी दिए । त्यस्तै कन्ट्याक ट्रेसिङबाट निगरानीमा परेका महोत्तरीका दुईजना पुरुष कोरोना भाइरस संक्रमित रहेका छन् । योसहित सिन्धुली जिल्लामा कोरोना संक्रमित बिरामीको सङख्या ३३ पुगेको कार्यालयले जनाएको छ ।

संक्रमितलाई उपचार गर्न सिन्धुली अस्पतालमा आइसोलेसन बेड आठवटा मात्रै रहेको र बाँकी बेड कमलामाई–६ को राम्माडीस्थित एपोलो हस्पिटलमा बनाउन सुरु गरिएको अस्पतालका व्यवस्थापक विमल श्रेष्ठले जानकारी दिए । राम्माडीमा २५ बेडको आइसोलेसन बनाउन सुरु गरिएको उनले बताए ।