चितवनको भरतपुर महानगरमा एक हप्ता लकडाउन- वाग्मती - कान्तिपुर समाचार

चितवनको भरतपुर महानगरमा एक हप्ता लकडाउन

रमेशकुमार पौडेल

चितवन — भरतपुर महानगरपालिकाभित्र शुक्रबार मध्यरातबाट एक हप्ता लकडाउन हुने भएको छ । 

चितवनमा पछिल्ला दिनहरुमा कोरोना भाइरसको संक्रमण तीव्र हुन थालेसँगै महानगरपालिकाले यस्तो निर्णय लिएको हो । शुक्रबार महानगरपालिकामा प्रहरी र प्रशासनको पनि संयुक्त बैठक बसेर लकडाउन गर्ने निर्णय भएको भरतपुर–१० का वडाध्यक्ष तथा महानगरपालिकाका प्रवक्ता अरुणपीडित भण्डारीले जानकारी दिए ।

‘संक्रमण तीव्र भएसँगै यस्तो निर्णय लिएको हो । लकडाउन पहिला पनि भएको हो । तर पहिलाको भन्दा पनि पालनाका हिसाबले कडिकडाउ गर्ने गरेर यो हप्ता भरतपुरमा लकडाउन हुने भएको छ’ प्रवक्ता भण्डारीले भने ।

चितवनमा साउन २१ यता कोरोना भाइरसको संक्रमण बढ्न थालेको छ । भरतपुर अस्पतालका सूचना अधिकारी लिलाधर पौडेलका अनुसार बिहीबारसम्म जिल्लाभर संक्रमितको संख्या १६४ पुगेको छ । यीमध्ये ४८ जना साउन २१ यता मात्रै संक्रमित भएका हुन् । बजार, बैंक, अस्पताल, प्रहरी जताततै संक्रमण पुगेको छ । जिल्लाको आधा क्षेत्रफल र जनसंख्या रहेको भरतपुर महानगरपालिकामा सबैभन्दा धेरै संक्रमितहरु रहेका छन् ।

प्रकाशित : श्रावण ३०, २०७७ १५:५९
प्रतिक्रिया
पठाउनुहोस्

माडी नदीमा बेपत्ता २ बालक अझै भेटिएनन्

गिरुप्रसाद भण्डारी

प्यूठान — गत शनिबार साइकलसँगै माडी नदीमा खसेर बेपत्ता भएका २ बालक अझै फेला परेका छैनन् । स्वर्गद्वारी नगरपालिका–७ सोत्रेका ११ वर्षीय सञ्जोक पार्धे र १० वर्षीय विपीन गौतम अझै बेपत्ता छन् ।


माडी नदीमा बाढी बढेका कारण शव फेला पार्न नसकेको प्रहरीले जनाएको छ । खोजी कार्यलाई निरन्तरता दिएको जिल्ला प्रहरी कार्यालय प्यूठानका प्रहरी प्रमुख डीएसपी नरेन्द्रकुमार कार्कीले बताए ।

घर नजिकैको मोटरबाटोमा साइकल चलाउँदै गर्दा खसेका बालकहरुलाई चौतर्फी खोजी गर्दा पनि भेटाउन नसकिएको भन्दै आफन्तहरूले दु:ख व्यक्त गरेका छन् । ५ दिनसम्म खोजी कार्य गर्दा शव नभेटिएपछि मृत्यु भएको निश्चित गरि आफन्तले हिन्दु परम्परा अनुसार शुक्रबार(आज) कुशको शव बनाएर अन्त्येष्टि गरेको वडाध्यक्ष पदम भट्टराइले जानकारी दिए ।

प्रकाशित : श्रावण ३०, २०७७ १५:५६
पूरा पढ्नुहोस्
प्रतिक्रिया
पठाउनुहोस्
×