पृथ्वी र त्रिभुवन राजपथमा निषेधाज्ञा
धादिङ — कोरोना संक्रमण बढेसँगै धादिङबाट काठमाडौं उपत्यका भित्रिने नाकामा कडाइ गरिएको छ । धादिङ प्रशासनले पृथ्वी राजमार्ग र त्रिभुवन राजपथमा निधेषाज्ञा जारी गरेको छ ।
लकडाउन खुकुलो भएपछि सार्वजनिक यातायातले दैनिकजसो उपत्यका जाने यात्रु बोक्नुका साथै अन्य जिल्लाबाट पनि सवारी पास लिएर धमाधम आउन थालेपछि मुख्य राजमार्गमा आउजाउ रोकिएको निमित्त प्रजिअ रुद्र मल्लले बताए ।
जिल्ला सुरक्षा समिति धादिङले मालवाहक र एम्बुलेन्सबाहेक अन्य सवारी सञ्चालनमा रोक लगाएको हो । साउन २९ गते बिहान ६ बजेबाट काठमाडौं सिमाना पिप्लामोडदेखि चितवनको सिमाना मौवा खोलासम्म निषेधाज्ञा जारी गरिएको छ ।
अत्यावश्यकीय मालवाहक गाडी र एम्बुलेन्सबाहेक अन्य सवारी सञ्चालन चल्न नदिने निर्णय भएको निमित्त प्रजिअ मल्लले बताए ।
लकडाउन खुकुलो भएसँगै पृथ्वी राजमार्गका होटल रेस्टुरेन्ट सञ्चालनमा आउन थालेका थिए । निषेधाज्ञापछि प्रहरीले बिहीबारदेखि राजमार्गका सबै होटल–पसल बन्द गराएको छ । ‘चैतको शुरुआती चरणको लकडाउनभन्दा झनै कडा गरिएको छ र धेरै सवारीसाधनलाई बिहान आएकैतर्फ फर्काइएको छ,’ गजुरीस्थित इलाका प्रहरीका प्रहरी नायव उपरीक्षक विश्वराज खड्काले भने ।
धादिङ सदरमुकाम प्रवेशमा पनि कडाइ गर्दै मलेखु पुल, बुंगचुंग र पुछार बजारमा प्रहरी तैनाथ गरिएको छ ।
प्रकाशित : श्रावण २९, २०७७ १२:३९