स्वास्थ्यकर्मीमा कोरोना देखिएपछि गाउँपालिकाको कार्यालय र स्वास्थ्य केन्द्र सिल
दोलखा — एकजना स्वास्थ्यकर्मीसहित दुई जनामा कोरोना संक्रमण देखिएपछि गौरीशंकर गाउँपालिकाको कार्यालय, प्राथमिक स्वास्थ्य केन्द्र र वडा कार्यालय सिल गरिएको छ ।
सुरी प्राथमिक स्वास्थ्य केन्द्रमा कार्यरत एकजना स्वास्थ्यकर्मीमा कोरोना संक्रमण पुष्टि भएपछि स्वास्थ्य केन्द्र सिल गरेर अन्य कार्मचारी क्वारेन्टाइनमा बसेका छन् । हलेश्वर माविको क्वारेन्टाइनमा बसका अर्का एकजनामा पनि पोजिटिभ देखिएको छ ।
गौरीशंकर गाउँपालिका अध्यक्ष स्वयमबहादुर खड्काले कर्मचारी र विदेशबाट आएका गरी दुई जनामा कोरोना देखिएपछि अत्यावश्यक कामबाहेक गाउँपालिकाको कार्यालयको काम बन्द गरी सिल गरिएको हो । सुरी प्राथमिक स्वास्थ्य केन्द्र र वडा नं. ५ को वडा कार्यालय पनि सिल गरी आवतजावत बन्द गरिएको उनले बताए ।
साउन २५ गते स्वाब संकलन गरि पठाइएका स्वास्थ्यमकर्मी साउन २३ गते भक्तपुरबाट आएका थिए । विदेशबाट आएका एक जना हलेश्वर क्वारेन्टाइनमा एक्लै बसेका थिए । दुवै जनाको मंगलबार पोजिटिभ रिर्पोट आएपछि कन्ट्याकमा रहेकाहरुको स्वाब संकलन गर्न सदरमुकामबाट टोली पठाइने जिल्ला स्वास्थ्य प्रमुख विभु कुमार झाले जानकारी दिए ।
प्रकाशित : श्रावण २७, २०७७ १९:२२
