मकवानपुरमा एकैदिन ५ प्रहरीसहित २३ जनामा कोरोना पुष्टि- वाग्मती - कान्तिपुर समाचार

मकवानपुरमा एकैदिन ५ प्रहरीसहित २३ जनामा कोरोना पुष्टि

सुवास विडारी

मकवानपुर — मकवानपुरमा एकैदिन पाँच प्रहरीसहित २३ जनामा कोरोना संक्रमण पुष्टि भएको छ । हेटौंडा–१० स्थित किटजन्य रोग अनुसन्धान तथा तालिम केन्द्रस्थित प्रादेशिक प्रयोगशालामा गरिएको पीसीआर परीक्षणबाट आइतबार २३ जनामा कोरोना संक्रमण पुष्टि भएको हो ।

संक्रमितमध्ये ६ महिला र १७ जना पुरुष रहेका छन् ।

हेटौंडा–४ स्थित आइसोलेसन वार्डका इन्चार्ज भोला चौलागाईंका अनुसार हेटौंडाका विभिन्न प्रहरी चौकीमा कार्यरत ५ जना प्रहरी, हेटौंडा उपमहमानगभित्रका १६ जना स्थायी बासिन्दा, विराटनगर घर भएर हेटौंडा बस्दै आएका एक जना र बकैया गाउँपालिका–४, स्थायी घर भएर हाल हेटौंडाको एक सहकारीमा कार्यरत महिलामा कोरोना संक्रमण पुष्टि भएको हो । उनका अनुसार संक्रमित सबै जनालाई आइसोलेसनमा राख्ने तयारी भइरहेको छ ।

१२९ जनाको स्वाब परीक्षण गरिएकोमा २३ जनामा संक्रमण पुष्टि भएको हो । यो सँगै मकवानपुरमा संक्रमितको संख्या ७७ पुगेको छ जसमध्ये २९ जना डिस्चार्ज भइसकेका छन् ।

प्रकाशित : श्रावण २५, २०७७ १७:२६
प्रतिक्रिया
पठाउनुहोस्

मुगुमा १ महिनामा ३५ बालबालिकामा कुपोषण

राजबहादुर शाही

मुगु — जिल्लामा १ महिनाको अवधिमा ३५ बालबालिकामा कुपोषणको समस्या देखिएको छ । स्वास्थ्य सेवा कार्यालयका अनुसार बालविवाह, गरिबी, स्तनपानको कमीलगायत कारण बालबालिकामा कुपोषणको समस्या बढ्दै गएको हो ।

कुपोषणको लक्षण देखिएपछि साउन महिनामा ३५ बालबालिकालाई जिल्ला अस्पतालमा ल्याइएको थियो । तीमध्ये ३१ जनालाई सर्वोत्तम पिठो उपलब्ध गराइएको छ भने ४ जनालाई अस्पतालमा भर्ना गरिएको छ । ग्रामीण क्षेत्रका बालबालिकामा कुपोषणको समस्या बढ्दै गएको स्वास्थ्य सेवा कार्यालयका सूचना अधिकारी परशुराम नेपालीले बताए । उनका अनुसार अभिभावकले बालबालिकाको खानपिनमा बेवास्ता गर्दा कुपोषण बढिरहेको हो । उनले भर्ना गरिएका बालबालिकामा जटिल अवस्थाको कुपोषण देखिएको बताए ।

कार्यालयका अनुसार छायानाथरारा नगरपालिकासहित सोरु र कार्मारोङ गाउँपालिकामा झण्डै २० प्रतिशत बालबालिकामा कुपोषणको समस्या छ । विपन्‍न दलित बस्तीमा यो समस्या बढिरहेको नेपालीले बताए ।

‘१ महिनामै ३५ बालबालिकामा कुपोषण देखिएपछि जिल्ला नै उच्च जोखिममा रहेको पाइयो,’ उनले भने, ‘जथाभावी बच्चा जम्माउँदा पनि कुपोषणको दर बढिरहेको छ ।’ उनका अनुसार ४ वटै स्थानीय तहमा कुपोषण न्यूनिकरणका लागि बहुक्षेत्रीय पोषण परियोजना लागू गरिएको छ । कुपोषण घटाउन ८ स्वास्थ्य चौकीबाट सर्वोत्तम पिठो वितरण गर्न थालिएको उनले जानकारी दिए ।

प्रकाशित : श्रावण २५, २०७७ १७:१५
पूरा पढ्नुहोस्
प्रतिक्रिया
पठाउनुहोस्
×