बाढीले दोलखामा एकको मृत्यु, २० घरमा क्षति- वाग्मती - कान्तिपुर समाचार

बाढीले दोलखामा एकको मृत्यु, २० घरमा क्षति

राजेन्द्र मानन्धर

दोलखा — गौरीशंकर गाउँपालिकामा बिहीबार राति अविरल वर्षासँगै आएको बाढीले एक जनाको मृत्यु हुनुका साथै २० वटाभन्दा बढी घरमा क्षति पुगेको छ । बाढीले सडक बगाउँदा यातायात अवरुद्ध भएको छ ।

बाढीले घर भत्काउँदा ३१ वर्षीय सुरेश शिवाकोटीले ज्यान गुमाएको प्रहरी नायब उपरीक्षक रेवतीरमण पोखरेलले जानकारी दिए । उनका अनुसार कालिन्चोक गाउँपालिकाका शिवाकोटी ग्रिलसम्बन्धी काम गर्न उक्त क्षेत्रमा पुगेका थिए ।

बाढी–पहिरोले बस्तीसँगै जलविद्युत् आयोजनाहरूमा समेत क्षति पुर्‍याएको गाउँपालिका अध्यक्ष स्वयमबहादुर खड्काले जानकारी दिए । उनका अनुसार सुरीखोला र खारेखोलाको बाढी बस्तीमा पसेको हो । गौरीशंकर–६ वडुमा ६, बोछुमा २ र वडा नं. ८ का १२ घरमा क्षति पुगेको छ ।

तामाकोसी नदीको सतहले खतराको संकेत छोएपछि बिहीबार राति साढे १० बजे जल तथा मौसम विज्ञान विभागले एसएमएसमार्फत जानकारी गराउँदै स्थानीयलाई सचेत रहन आग्रह गरेको थियो । उक्त सूचनापछि सिप्रिङ खोला किनारका बासिन्दा घर छाडेर स्थानीय गौरीशंकर माविमा बसेका थिए । अन्यत्र पनि खोला किनारका बासिन्दा सुरक्षित स्थानमा गएको स्थानीयले जनाए ।

गौरीशंकर गाउँपालिका प्रवेश गर्ने तामाकोसी–भोर्ले पुल पनि जोखिममा परेको अध्यक्ष खड्काले बताए । पालिकाको करिब ७० मिटर मुख्य सडक बाढीले बगाएपछि सुरी, खारे, चंखु र मार्बु जाने यातायात अवरुद्ध भएकाले उद्धारमा कठिनाइ परेको पनि उनले जानकारी दिए ।

तीन जलविद्युत् आयोजनामा क्षति

बाढीले तीनवटा जलविद्युत् आयोजनामा पनि क्षति पुर्‍याएको छ । ६ दशमलव ४ मेगावाटको सुरीखोला हाइड्रोपावर लिमिटेडको हेडवर्क्स, पाइपलाइन, प्रवेशमार्गमा क्षति पुगेको लिमिटेडका अध्यक्ष हिमाल गुरुङले बताए । उनका अनुसार आयोजना निर्माणको अन्तिम चरणमा थियो । ११ दशमलव ६ मेगावाटको युनिभर्सल र ५ मेगावाटको घट्टेखोलामा पनि क्षति पुगेको छ ।

प्रकाशित : श्रावण २३, २०७७ १०:२४
प्रतिक्रिया
पठाउनुहोस्

जसपा बैठक अझै एजेन्डाबाहिर

आगामी कार्यदिशाबारे अध्यक्ष यादवबाट साढे २ घण्टा र नेता भट्टराईबाट ३ घण्टा व्याख्या
कान्तिपुर संवाददाता

काठमाडौँ — जनता समाजवादी पार्टीको बिहीबारको बैठक पनि छलफलका लागि तय भएका एजेन्डामा प्रवेश गरेको छैन । पार्टी अध्यक्ष उपेन्द्र यादव र नेता बाबुराम भट्टराईले पार्टीको सैद्धान्तिक, वैचारिक र आगामी कार्यदिशाबारेमा लामो व्याख्या गरेका थिए ।

भट्टराईले पार्टीको समुन्नत संघीय समाजवादी, यसअन्तर्गतको आर्थिक, सामाजिक आयमहरूका विषयमा प्रशिक्षण दिएका थिए । उनले पार्टीले अगाल्ने समुन्नत संघीय समाजवादीको सार आधुनिक खालको लोकतान्त्रिक समाज नै रहेको बताएका थिए । उनले यसका लागि अहिले अभ्यासमा रहेका शासकीय र निर्वाचन प्रणालीले काम नगर्ने बताएका थिए ।

भट्टराईले प्रत्यक्ष निर्वाचित राष्ट्रपति र पूर्ण समानुपातिक निर्वाचन प्रणालीलाई अंगिकार गर्नुपर्ने दृष्टिकोण अघि सारेका थिए । नेकपा र कांग्रेसले मुलुकलाई अघि बढाउन नसक्ने निष्कर्ष पनि उनले सुनाएका थिए । उनको करिब तीन घण्टाको प्रशिक्षणपछि अध्यक्ष यादवले पनि सैद्धान्तिक विषयमै दृष्टिकोण अघि सारे । उनले राज्य एकीकरणदेखि सुगौली सन्धि, राणाशासन, पञ्चायती शासन, ०४८ सालको परिवर्तन र जनआन्दोलन ०६२/६३ पछिको अवस्थाबारे साढे २ घण्टा धारणा राखेका थिए ।

शब्दाबली फरक भए पनि यादव र भट्टराईको सैद्धान्तिक दृष्टिकोण उस्तै भएको बैठकमा सहभागी एक सदस्यले बताए । जन्मकालदेखि नै कांग्रेसले संवैधानिक राजतन्त्रको वकालत गर्दै आएको र गणतन्त्र आएपछि उसको एजेन्डा नै सकिएको यादवको भनाइ थियो । कम्युनिस्टहरू प्रगतिशील भए पनि व्यवहारमा दलाल पुँजीवादकै पक्षमा उभिने गरेको उनले बताए । ‘तत्कालीन माओवादी केन्द्रका अध्यक्ष हुँदासम्म प्रचण्डबाट केही आशा राखिएको थियो तर ओलीबादमा फसेपछि उहाँबाट पनि केही हुने देखिएन,’ उनले भनेका थिए ।

दुवै नेताले जनता समाजवादी पार्टीलाई नेकपा र कांग्रेसको विकल्प बनाउने उद्घोष गरेका थिए । प्रधानमन्त्री केपी शर्मा ओली पछिल्लोपटक सांस्कृतिक आक्रमणमा समेत उत्रन थालेको उनीहरूको भनाइ थियो । कार्यकारणी समितिका सदस्य केशव झाले बैठकमा प्रशिक्षण शैलीको अभ्यास नौलो भएको बताए । ‘यस्ता विचारको मन्थनले पार्टीलाई बलियो बनाउन सघाउ पुर्‍याउँछ,’ उनले बताए । अर्का अध्यक्ष महन्थ ठाकुर भने अस्वस्थताका कारण अनुपस्थित थिए ।

प्रकाशित : श्रावण २३, २०७७ १०:०१
पूरा पढ्नुहोस्
प्रतिक्रिया
पठाउनुहोस्
×