त्रिशूलीमा ट्रक खस्यो, चालकले हाम फालेर ज्यान जोगाए

जिल्ला प्रहरी कार्यालयका प्रवक्ता डीएसपी सूर्य थापाका अनुसार बिहान साढे आठ बजे विराटनगरबाट काठमाडौं जाँदै गरेको ना ३ ख ८९८७ नम्बरको भाटभटेनी सुपरमार्केटको सामान बोक्ने ट्रक र काठमाडौंबाट हेटौंडा जान मुग्लिनतर्फ आउँदै गरेको ना ६ ख ५६८७ नम्बरको ट्रक एकापसमा ठक्कर खाएका थिए । ठक्कर खाएपछि भाटभटेनीको ट्रक नदीमा खसेको हो ।

ट्रक नदीमा खसे पनि सिन्धुपाल्चोक बाह्रबिसे–३ घर भएका ट्रकका चालक ३५ वर्षीय राजेन्द्र बस्नेत हाम फालेर जोगिएका छन् । हामफाल्ने क्रममा उनलाई सामान्य चोट लागेको छ । उनको मुग्लिनमा रहेको मेडिकलमा उपचार भएको डीएसपी थापाले बताए । खसेको ट्रकमा अन्य कोही नभएको थापाले जानकारी दिए । ट्रक नदीमा बेपत्ता भएको प्रहरीको भनाइ छ ।