समयमै उपचार नपाउँदा काभ्रेमा किशोरीको मृत्यु- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

समयमै उपचार नपाउँदा काभ्रेमा किशोरीको मृत्यु

नगेन्द्र अधिकारी

काभ्रे — ‘उपयुक्त उपचार’ नपाउँदा जिल्लाको विकट खानीखोला गाउँपालिकामा एक किशोरीले ज्यान गुमाएकी छन् । ३ दिनदेखि ज्वरो आउने, टाउको दुख्ने, झाडापखाला लागेकी १६ वर्षीया रञ्जिता थोकरलाई स्वासप्रश्वासको समस्या पनि देखिएपछि घरमा नै उपचारको क्रममा मृत्यु भएको हो । 

वर्षाको कारण स्थानीय स्वास्थ्य चौकीमा समेत पुर्‍याउने अवस्था नभएपछि घरमा नै उपचारको क्रममा उनको मृत्यु भएको साल्धारा स्वास्थ्यचौकी इन्‍चार्ज अहेव श्रीरामकुमार रामले जानकारी दिए ।

‘टाउको दुखेको र ज्वरो आएको गुनासोसहित मृतकको आमा आइतबार स्वास्थ्यचौकी आउनुभएको थियो, औषधी दिएर पठाएको थिए,’ उपचारमा संलग्न रामले भने, ‘सोमबारबाट झाडापखाला पनि सुरु भएर मंगलबार बिहानदेखि अचेत भएको खबर आएपछि घरमा नै गएर उपचार गरें, स्वासप्रश्वासको समस्या पनि रहेछ, अक्सिजन लगायौं, बत्ती गएर अक्सिजन नचलेपछि २ मिनेटमा नै उहाँको मृत्यु भयो ।’ परिवारका सदस्यले गाउँपालिकाको समन्वयमा जिल्ला प्रशासन कार्यलयमार्फत हेलिकप्टर मगाए पनि बिरामीको मृत्यु भएपछि रित्तै फर्किएको छ ।

उपचारमा संलग्न अहेव रामले मृत्युको कारणबारे यकिन गर्न नसकिने बताए । स्वास्थ्य कार्यलय काभ्रेका वरिष्ठ स्वास्थ्य प्रशासक डा. नरेन्द्रकुमार झाले मृतकको 'ट्राभल हिस्ट्री' नभएको कारण कोरोना संक्रमणको आशंका नभएको बताए ।

गाउँपालिकाका प्रवक्ता समेत रहेका सो वडाका अध्यक्ष मानबहादुर गोलले वर्षाका कारण यातायातका साधन ठप्प भएका कारण समस्या भएको बताए । ‘वर्षाको कारण यातायातका साधन चलेको छैन, गाउँपालिका केन्द्र जोड्ने सबै बाटो अवरुद्ध छन्,’ गोलेले भने, ‘बिरामी भएको जानकारी परिवारबाट ढिला भयो, समन्वय गरेर हेलिकप्टर पनि ल्यायौं तर उनलाई बचाउन सकिएन ।’

प्रकाशित : श्रावण १३, २०७७ १८:२७
प्रतिक्रिया
पठाउनुहोस्

चिनियाँ राजदूत होउ र नेता पौडेलबीच भेट

कान्तिपुर संवाददाता

काठमाडौँ — नेपालका लागि चिनियाँ राजदूत होउ यान्छीले मंगलबार कांग्रेसका वरिष्ठ नेता रामचन्द्र पौडेलसँग भेटेघाट गरेकी छन् । भेटका लागि राजदूत होउ पौडेलको निजी निवास बोहराटार पुगेकी थिइन् ।

सयौं वर्षदेखि नेपाल–चीन बीचको सुमधुर सम्बन्ध र औपचारिक सम्बन्ध स्थापना भएको ६३ औं वर्ष गाँठको अवसरमा नेता पौडेल र होउ बीच भेट भएको पौडेलका निजी सचिव चिरन्जिवी अधिकारीले जानकारी दिए ।

भेटमा बीपी कोइराला र माओ त्सेतुङका पालादेखि नेपाली कांग्रेस र चिनियाँ कम्युनिस्ट पार्टीको बीचको सम्बन्धको चर्चा भएको पौडेलले आफ्नो फेसबुक पेजमा लेखेका छन् । ‘चीन सरकारले कोभिड–१९ नियन्त्रणमा प्राप्त गरेको सफलता र नेपाललाई कोभिड–१९ नियन्त्रणका लागि यथेष्ट सहयोग गर्ने बारे चर्चा भयो,’ पौडेलले पेजमा लेखेका छन् ।

यसअघि चिनियाँ राजदूत होउले नेकपा भित्रको अन्तर संघर्ष चलिरहेको बेलामा नेकपाका शीर्ष नेताहरुसँग भेटवार्ता गर्दा आलोचना भएको थियो ।

प्रकाशित : श्रावण १३, २०७७ १८:२४
पूरा पढ्नुहोस्
प्रतिक्रिया
पठाउनुहोस्
×