यस वर्ष गोसाइँकुण्ड मेला नहुने
रसुवा — गोसाइँकुण्डमा यस वर्ष मेला सञ्चालन नहुने भएको छ । गोसाइँकुण्ड क्षेत्र विकास समिति रसुवाले शुक्रबार पत्रकार सम्मेलन गरी मेला नलाग्ने जानकारी दिएको हो ।
गोसाइँकुण्डमा हरेक वर्ष नागपञ्चमीदेखि जनैपूर्णिमासम्म मेला लाग्दै आएको थियो । कोरोना भाइरस संक्रमणका कारण जमघट तथा भिडभाड गर्न नहुने भएकाले यस वर्ष मेला सञ्चालन नगर्ने निर्णय गरिएको समिति अध्यक्ष सञ्जीव डीएमले बताए ।
यस वर्ष जनैपूर्णिमा साउन १९ गते परेको छ । ‘लकडाउन हटे पनि भदौ १ गतेबाट मात्र लामो रुटका सार्वजनिक सवारी सञ्चालन हुने भएकाले तीर्थयात्रीलाई आउन पनि समस्या छ,’ उनले भने । मेला भर्न बर्सेनि देशैभरबाट विशेष गरी हिन्दू तथा बौद्ध धर्मावलम्बी आउने गर्छन् ।