काभ्रेमा यातायात मजदुरका लागि क्‍वारेन्टाइन सञ्‍चालन- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

काभ्रेमा यातायात मजदुरका लागि क्‍वारेन्टाइन सञ्‍चालन

नगेन्द्र अधिकारी

काभ्रे — जिल्लामा यातायात मजदुरका लागि क्‍वारेन्टाइन सञ्‍चालनमा ल्याइएको छ । ४ महिना लामो लकडाउनपछि यातायात सञ्चालन गर्दा संक्रमणको जोखिम हुन सक्ने भन्दै सम्बन्धित संस्थाहरुले होटलमा ३० बेड क्षमताको क्वारेन्टाइन सञ्चालन गरेका हुन् । 

‘सुरक्षाका सम्पूर्ण उपायहरु अपनाउँछौं, यद्यपि संक्रमण भइहालेको अवस्थाको लागि क्‍वारेन्टाइन व्यवस्था गरेका हौं,’ यायातात व्यवसायी राष्ट्रिय महासंघको जिल्ला समन्वय समिति अध्यक्ष राजेशकुमार श्रेष्ठले भने, ‘संक्रमित भइहाले मजदुरलाई घर पठाउने कुरा पनि भएन, सोही कारण व्यवसायीले नै क्वारेन्टाइनको व्यवस्था गरेका हौं ।’

सरकारले सार्वजनिक यातायातका साधनमा लाग्दै आएको जोरबिजोर प्रणाली हटाउँदै साउन ७ देखि जिल्लाभित्र चलाउने अनुमति दिएको थियो । श्रेष्ठका अनुसार, काभ्रे बस, गणेश हिमाल तराई र काभ्रे पुण्यवती यातायात प्रालिका १६० का दरले, सिन्धु हेलम्बु यातायात प्रालिका १२३ र पूर्व अरनिको यातायात प्रालिका करिब ६ सय बस छन् । अरनिको यातायातले भने बनेपामा आफ्नो स्वामित्वमा रहेको पार्टी प्यालेसलाई नै क्वारेन्टाइन बनाउने तयारी रहेको बताएको छ । सरकारले भदौ १ गतेदेखि लामो दुरीमा पनि सार्वजनिक यातायातका साधन सञ्चालन गर्ने निर्णय गरेको छ ।

प्रमुख जिल्ला अधिकारी श्रवणकुमार तिमल्सिनाले मापदण्डअनुसार यातायात सञ्चालन गर्न सहजीकरण गर्ने बताए । जिल्ला प्रहरी प्रमुख एसपी रविकुमार पौडेलले मापदण्ड उल्लघंन गरे कारबाही गर्ने चेतावनी दिएका छन् ।

प्रकाशित : श्रावण ८, २०७७ १७:२३
प्रतिक्रिया
पठाउनुहोस्

विद्यालयबाट क्‍वारेन्टाइन हटाउन शिक्षक संघ काभ्रे‍को माग

नगेन्द्र अधिकारी

काभ्रे — नेपाल शिक्षक संघ काभ्रेले जिल्लाका सामुदायिक विद्यालयमा स्थानीय तहमा निर्माण गरेका क्‍वारेन्टाइन हटाउन माग गरेको छ । जिल्लाभर सबै स्थानीय तहमा ध्यानाकर्षण पत्र बुझाउँदै संघले स्वच्छ एवम् स्वस्थ वातावरण कायम गर्न माग गरेको हो । 

विद्यालय र विद्यार्थी उच्च जोखिममा रहेको भन्दै शिक्षक संघले जिल्लाका स्थानीय तहमा ज्ञापनपत्र बुझाउँदै संघले पालिकाभित्रका शिक्षक र विद्यार्थीहरुको पीसीआर परीक्षण गर्न र सम्पूर्ण शिक्षकको स्वास्थ्य बिमा गर्न र पीपीईको व्यवस्था गर्न पनि माग गरेको छ ।

शिक्षक संघले २०५७ साल अघि स्थायी नियुक्ति पाई प्राविधिक रुपमा २ ग्रेड खाँदै आएका शिक्षकहरुलाई निजामतीसरह २ ग्रेड उपलब्ध गराउने अदालतको फैसला, अर्थ मन्त्रालय र शिक्षा, विज्ञान तथा प्रविधि मन्त्रालयको परिपत्रलाई कार्यान्वयन गर्न पनि माग गरेको छ ।

१३ वटै पालिकामार्फत स्थानीय सरकारको ध्यानाकर्षण गराएको शिक्षक संघ काभ्रेका अध्यक्ष राजेशराज महतले जानकारी दिए ।

प्रकाशित : श्रावण २, २०७७ १५:३१
पूरा पढ्नुहोस्
प्रतिक्रिया
पठाउनुहोस्
×