कान्तिपुर वेबसाईट
AdvertisementAdvertisement

रामेछापको कठजोरमा छुरा प्रहारबाट १ को मृत्यु, २ घाइते

टीकाप्रसाद भट्ट

रामेछाप — रामेछापको मन्थली नगरपालिका–२, कठजोरमा सोमबार राति छुरा प्रहार गरी १ जनाको हत्या गरिएको छ । छुरा प्रहारबाट २ जना घाइते भएका छन् । गाउँमा झारफुक गराएर घर फर्कंदै गरेका ६२ वर्षीय विनोदकुमार श्रेष्ठलाई बाटो ढुकेर बसेका स्थानीय ५० वर्षीय दिलबहादुर श्रेष्ठले छुरा प्रहार गरेको प्रहरीले बताएको छ ।

कोखमा छुरा लागेर गम्भीर घाइते भएका श्रेष्ठलाई उपचारका लागि मन्थलीको तामाकोसी अस्पताल पुऱ्याइए पनि उनको उपचारका क्रममा मृत्यु भएको हो ।

यसैगरी छुरा प्रहारबाट गम्भीर घाइते भएका ३५ वर्षीय नारायण श्रेष्ठलाई थप उपचारका लागि काठमाडौंको ट्रमा सेन्टर लगिएको छ । घटनामा २५ वर्षीय प्रेमबहादुर श्रेष्ठ सामान्य घाइते भएका छन् ।

जिल्ला प्रहरी कार्यालय रामेछापका प्रमुख बसन्त पाठकले अपराधमा संलग्न दिलबहादुर श्रेष्ठलाई प्रहरीले रातिनै नियन्त्रणमा लिई जिल्ला प्रहरी कार्यालयको हिरासतमा राखेको बताए । प्रहरीले घटनाको अनुसन्धान सुरु गरिसकेको पाठकले बताएका छन् ।

प्रकाशित : असार ३०, २०७७ ०६:३५
प्रतिक्रिया
पठाउनुहोस्

यादवलाई मैथिली अनुसन्धान पुरस्कार

कान्तिपुर संवाददाता

काठमाडौँ — विद्यापति पुरस्कार कोषले यस वर्षको ‘मैथिली अनुसन्धान पुरस्कार–२०७६’ कान्तिपुरकर्मी दिनेश यादवलाई प्रदान गरेको छ । अनुसन्धानमुलक लेखेर मैथिली भाषा र साहित्य क्षेत्रमा योगदान पुर्‍याएको भन्दै उनलाई एक लाख रुपैयाँको उक्त पुरस्कार प्रदान गरिएको कोषले जनाएको छ । 

पत्रकार यादवले नेपाली, मैथिली र हिन्दी साहित्यमा कलम चलाउँदै आएका छन् । नेपाल प्रज्ञा प्रतिष्ठानको मैथिली पत्रिका ‘आङन’ र बहुभाषिक पत्रिका ‘सयपत्री’ तथा जनकपुरबाट प्रकाशित हुने ‘आंजूर’, विराटनगरको ‘मिथिला टाइम्स’ र काठमाडौंबाट प्रकाशन हुने ‘अपन मिथिला’ मा यादवको अनुसन्धानमुलक लेख प्रकाशित छन् ।

विद्यापति पुरस्कार कोषद्वारा यो वर्षको चार अन्य विधामा पुरस्कृत र सम्मानित भएका स्रष्टाहरुमा धनुषाका चन्द्रशेखर उपाध्यायलाई नेपाल विद्यापति मैथिली भाषा साहित्य पुरस्कार २०७६, धनुषाकै लक्ष्मण मण्डललाई विद्यापति कलासंस्कृति पुरस्कार, धनुषाकै उपेन्द्र भगत नागवंशीलाई पाण्डुलिपी पुरस्कार र मोरङका शिवनारायण पण्डितलाई विद्यापति अनुवाद पुरस्कार रहेको छ ।

जनकपुरमा आयोजित कार्यक्रममा प्रदेश २ का प्रदेश प्रमुख तिलक परियारले साहित्यकार उपाध्यायलाई दुई लाख र अन्य सबै श्रष्टालाई एक–एक लाख रकम र सम्मानपत्रसहित पुरस्कृत गरेका हुन् । नेपाल सरकारद्वारा २०६८ सालमा एक करोडको विद्यापति पुुरस्कार कोष खडा गरी मैथिली भाषा, साहित्य, कला, संस्कृति र अनुसन्धान क्षेत्रमा महत्वपूर्ण योगदान पुर्याउने पाँच स्रष्टालाई वार्षिक रुपमा पुरस्कृत गर्दै आएको छ ।

प्राविधिक कारणले ०७५ मा बाहेक यो वर्षसहित हालसम्म ३३ व्यक्तित्व र २ संस्थाले विद्यापति पुरस्कार पाइसकेका छन् ।

प्रकाशित : असार २९, २०७७ २२:०५
पूरा पढ्नुहोस्
प्रतिक्रिया
पठाउनुहोस्
×