पहिरोले लामोसाँघु–जिरी सडक अवरुद्ध
दोलखा — अविरल वर्षापछि जिरी बजारमा पहिरो जाँदा दुई वटा पसल भएको घर पुरिएको छ । १० वटा पसलघर बस्न नहुने अवस्थामा पुगेको छ ।
जिरी कलङस्थित ट्राउट माछाका १७ वटा पोखरी पुरिएको र लामोसाँघु जिरी सडक ठाउँठाउँमा अवरुद्ध भएकोले यातायात सम्पर्क विच्छेद भएको जिरी नगरका मेयर टंक जिरेलले बताए । अवरुद्ध सडक खुलाउने, उद्धार र राहत कार्यमा बिहानदेखि नै जुटेको उनले बताए ।
जिरी लिङ्कनस्थित बसपार्कबाट रामेछाप ठोसेतर्फ जाने मुख्य सडकसमेत पहिरोले अवरुद्ध भएको छ । बसपार्क नजिकै शुक्रबार बिहान ४ बजे पहिरो गएको स्थानीय व्यवसायी बाबुराजा श्रेष्ठले बताए ।