वाग्मतीको बजेट बहुमतले पारित

सुवास विडारी

हेटौंडा — वाग्मती प्रदेशको प्रदेशसभा बैठकबाट आगामी आर्थिक वर्ष २०७७/०७८ को बजेट बहुमतले पारित भएको छ । शुक्रबार बसेको प्रदेशसभा बैठकबाट विनियोजन विधेयक र अर्थसम्बन्धी विधेयक बहुमतले पारित भएको हो ।

प्रमुख प्रतिपक्षी दल नेपाली कांग्रेससहितका दलहरुले दुवै विधेयकको विपक्षमा मत दिएपछि विधेयक बहुमतले पारित भएको थियो । बैठकमा विधेयकमाथि उठेका प्रश्नहरुको जवाफ मुख्यमन्त्री डोरमणि पौडेल, भौतिक पूर्वाधार मन्त्री रामेश्वर फुयाँल, सामाजिक विकास मन्त्री युवराज दुलाल, आन्तरिक मामिला तथा कानुन मन्त्री शालिकराम जम्कट्टेल, उद्योग, पर्यटन, वन तथा वातावरण मन्त्री अरुण नेपाल, भूमि, व्यवस्था कृषि तथा सहकारी मन्त्री दावादोर्जे लामा र आन्तरिक मामिला तथा योजना मन्त्री कैलाश ढुंगेलले जवाफ दिएका थिए । बैठकमा विभिन्न दलका सांसदहरुले दर्ता गराएका खर्च कटौतीको प्रस्ताव बहुमतले अस्वीकृत भएको सभामुख सानुकुमार श्रेष्ठले जानकारी दिए । बजेटको विषयमा नेकपाभित्र विवाद हुँदा बजेट पारित हुन ढिला भएको थियो ।

वाग्मती प्रदेश सरकारले आगामी आवका लागि ५१ अर्ब ४२ करोड ७४ लाख ९४ हजार रुपैयाँको बजेट पेस गरेको थियो । जुन चालु आर्थिक वर्षको भन्दा तीन अर्ब ८१ करोड ६९ लाख आठ हजार रुपैयाँ बढी हो । आगामी आवको चालुतर्फ कुल बजेटको ५१.१२ प्रतिशत अर्थात २६ अर्ब २८ करोड ७३ लाख ३५ हजार रुपैयाँ र पुँजीगततर्फ ४८.८८ प्रतिशत अर्थात २५ अर्ब १४ करोड एकलाख ५९ हजार रुपैयाँ विनियोजन भएको छ ।

आगामी आर्थिक वर्षमा २० अर्ब ८३ करोड ७९ लाख राजस्व उठाउने अनुमान प्रदेश सरकारको छ । जुन गत वर्षको भन्दा करिब दुई अर्ब रुपैयाँ कम हो । अनुदानतर्फ १७ अर्ब ६६ करोड ९८ लाख रुपैयाँ प्राप्त हुने अनुमान गरिएको छ । यस्तै अन्य राजस्वतर्फ ५ अर्ब १२ करोड ९७ लाख र राजस्व बचततर्फ सातअर्ब ५० करोड रुपैयाँ आम्दानीको लक्ष्य प्रदेश सरकारको रहेको छ ।

प्रकाशित : असार १९, २०७७ १५:४५
प्रतिक्रिया
पठाउनुहोस्

बम्जनविरुद्ध बाल यौन शोषणको आरोपमा मुद्दा

ओमप्रकाश ठाकुर

सर्लाही — लिटिल बुद्ध भनिने रामबहादुर बम्जनविरुद्ध सर्लाहीस्थित जिल्ला अदालतमा बाल यौन शोषणको आरोपमा मुद्दा दर्ता भएको छ । बिहीबार दायर गरिएको मुद्दामा कसुरदार बम्जनलाई १२ देखि १४ वर्षसम्म सजायको माग दाबी गरिएको छ । मतियारको रुपमा रहेका उनका दुई सहयोगीलाई पनि सजायको माग गरिएको छ । 

फाइल तस्बिर

सर्लाहीको पत्थरकोटस्थित बम्जनको आश्रमस्थलमा आनी बनेर बसेकी एक बालिकालाई जबर्जस्ती करणी गरेको आरोप लगाउँदै तपस्वी रामबहादुर बम्जनविरुद्ध बाल यौन शोषणको मुद्दा परेको हो । २०७३ साल साउन २० गते राति ९ बजेर २० मिनेटको समयमा आश्रमस्थलमै आनी बनेर बसेकी एक बालिकालाई विभिन्न किसिमको प्रलोभन देखाइ सुत्ने कोठामा जबर्जस्ती करणी गरेको र पीडितलाई डर धम्की देखाइएको भन्दै दायर गरिएको मुद्दामा उल्लेख छ । घटना घटेको बेला पीडित बालिका १५ वर्षकी मात्र थिइन् । उनी १८ वर्षकी भएपछि २०७६ माघ २३ गते जिल्ला प्रहरी कार्यालयमा उजुरी परेको थियो ।

प्रहरीले अदालतको अनुमति लिएर प्रतिवादी बम्जनसहित उनका दुई मतियारलाई पक्राउ गर्न भनिएपनि समयमा प्रहरीले प्रतिवादीलाई पक्राउ गर्न सकेनन् । पक्राउको अन्तिम म्याद भएपछि जिल्ला सरकारी वकिलको कार्यालयले बिहीबार बम्जनविरुद्ध यौन सन्तुष्टि प्राप्त गर्ने तथा बाल यौन शोषणको मुद्दा दायर गरिएको जिल्ला न्यायधिवक्ता केशवप्रसाद गौतमले बताए । उनले कसुरदार बम्जनविरुद्ध १२ देखि १४ वर्षसम्मको सजायको माग दाबी गरिएको जानकारी दिए ।

‘बालबालिका सम्बन्धी ऐन २०७५ को ६६ को ३ ले यौन सुखका लागि बालबालिकालाई प्रयोग गर्ने–गराउने, बाल यौन शोषण गर्ने गराउने कसुर गर्‍यो भने दफा ७२ को ३ को ६ ले प्रचलित कानुन बमोजिम जबर्जस्ती करणीको कसुरमा कसुरदारलाई सजाय हुनेछ, त्यही बमोजिम हामीले मौलिक अपराध संहिता २०७४ को दफा २१९ को उपदफा ३ को ग बमोजिम १४ वर्षभन्दा बढी र १६ वर्ष भन्दा कम उमेरको बालिका भए १२ देखि १४ वर्षसम्म कैदको माग दाबीसहित मुद्दा दायर गरेका हौं,’ न्यायधिवक्ता गौतमले भने ।

पीडितलाई क्षतिपूर्ति भराउने माग दाबीसहित अभियोग पत्र पनि दर्ता गराइएको जिल्ला सरकारी वकिलको कार्यालयले जनाएको छ । बम्जनलाई लुकाउने छिपाउने कार्यमा संलग्न उनका दुई मतियार ज्ञानकुमार बम्जन र जेवी गुरङ भनिने जीतबहादुर तामाङलाई पनि कसुरदारको आधा सजायको माग दाबी गरिएको छ । मुद्दा दायर भएपनि प्रतिवादी बम्जनसहित उनका दुई मतियार फरार छन् । उनीहरुविरुद्ध पक्राउ पुर्जी भने जारी नै छ ।

प्रकाशित : असार १९, २०७७ १५:४२
पूरा पढ्नुहोस्
प्रतिक्रिया
पठाउनुहोस्
×