नेकपाको विवादले प्रदेशसभा दैनिक प्रभावित

सुवास विडारी

मकवानपुर — वाग्मती प्रदेशको सत्तारुढ नेकपा संसदीय दलको बैठकमा विवाद हुँदा पछिल्लो समय दैनिकजसो प्रदेशसभाको बैठक प्रभावित भइरहेको छ ।

प्रदेशको राजधानी हेटौंडामा जारी सत्तारुढ नेकपा संसदीय दलको बैठकमा विवाद भएपछि तीनदिनदेखि प्रदेशसभा बैठक प्रभावित भइरहेको छ । नेकपा संसदीय दलको बैठकमा बजेटको बाँडफाँडको विषयलाई लिएर विवाद हुँदा बुधबार दिउँसो २ बजेका लागि बोलाइएको बैठक सूचना टाँसेर ५ बजेका लागि पुनः डाकिएको थियो । यसैगरी, मंगलबार र बिहीबार दिउँसो १ बजेका लागि बोलाइएको बैठक प्रदेशसभा सचिवालयले सूचना टाँसेर ३ बजेका लागि पुनः बोलाएको थियो ।

नेकपाभित्र बजेटको विषयमा विवाद बढिरहँदा दैनिकजसो सूचना टाँसेर बैठक स्थगित गर्न संसद सचिवालय बाध्य भइरहेको छ । ‘नेकपा संसदीय दलको बैठकका कारण लगातार प्रदेशसभा प्रभावित भइरहेको छ,’ प्रदेशसभा सचिवालय स्रोतका अनुसार पछिल्लो समयमा नेकपाको संसदीय दलको बैठक अनुसार प्रदेशसभाको समय मिलाउन सचिवालय बाध्य भइरहेको छ ।

पाँच दिनदेखि हेटौंडा–२ स्थित होटल एभोकाडोमा नेकपा संसदीय दलको बैठक बसिरहेको छ । हेटौंडा–१० स्थित प्रदेशसभा भवनमा बस्‍ने प्रदेशसभा बैठकमा आगामी आर्थिक वर्ष २०७७/०७८ को विनियोजन विधेयकमाथिको छलफल जारी रहेको छ । बजेटको विषयमा सत्तापक्षकै सांसद्‍बाट असन्तुष्टि व्यक्त हुन थालेपछि नेकपा संसदीय दलको बैठकबाट सहमतिको प्रयास भइरहेको छ ।

आगामी आर्थिक वर्षको बजेट बाँडफाँड गर्दा प्रत्यक्ष र समानुपातिक सांसद्लाई वेवास्ता गरेको, मुख्यमन्त्री र आर्थिक मामिला तथा योजना मन्त्री कैलाशप्रसाद ढुंगेलले योजना आयोगलाई बाइपास गरेर आफूखुशी बजेट निर्माण गरेको भन्दै सांसद्हरुले विरोध गरिरहेका छन् । विशेष गरी पूर्वएमाओवादी र तत्कालीन एमालेभित्र माधव नेपाल पक्षधरका सांसदहरुले प्रदेश सरकारको विरोध गरिरहेका छन् ।

प्रदेशसभामा आर्थिक मामिला तथा योजना मन्त्री कैलाशप्रसाद ढुंगेलले पेश गरेको विनियोजन विधेयकको क्षेत्रगत बाँडफाँड (रातो किताब) माथि छलफल सदनमा जारी रहेको छ ।

प्रकाशित : असार १८, २०७७ १६:५३
प्रतिक्रिया
पठाउनुहोस्

जनकपुरमा दलित संघर्ष समितिको प्रदर्शनमा प्रहरीको हवाई फायर

सन्तोष सिंह

धनुषा — जनकपुरमा दलित संघर्ष समितिले न्याय माग गर्दै निकालेको प्रदर्शनमा प्रहरीले हवाई फायर गरेको छ । धनुषामा आइसोलेसनमा उपचार अभावमा मृत्यु भएका किशोर राजु सदा र प्रहरी हिरासतमा मृत्यु भएका शम्भु सदाको लागि न्याय माग्दै जनकपुरमा भएको प्रदर्शनमा प्रहरीले हवाई फायर गरेको हो ।

दलित संघर्ष समितिले मृतक परिवारलाई रोजगारी, आइसोलेसनमा र प्रहरी हिरासतमा मृत्यु भएको घटनामा दोषिलाई कारबाहीको माग गर्दै प्रदर्शन गरेका थिए ।

पिडारी चोकबाट सुरु भएको प्रदर्शन मधेस भवन अगाडि पुगेपछि प्रहरीले भीड तितरबितर पार्न केही राउन्ड हवाइ फायर र अश्रुग्यास प्रहार गरेको हो । मधेस भवनमा रहेको मुख्यमन्त्री कार्यालय अगाडि हुँदै जिल्ला प्रशान अगाडि प्रदर्शन गर्दै जनक चोकमा आएर कोण सभा गर्ने कार्यक्रम दलित संघर्ष समितिले सार्वजनक गरेको थियो । प्रदर्शनकारी मुख्यमन्त्री कार्यालयम प्रवेश गर्न खोज्दा अश्रुग्यास प्रहार र हवाई फायर गरेको प्रहरीले जनाएको छ ।

प्रदर्शनकारीहरु मुख्यमन्त्री कार्यालयमा प्रवेश गरी तोडफोड गर्न खोजेका थिए । आरडीटी रिपोर्ट पोजेटिभ आएपछि जेठ २९ गते प्रादेशिक अस्पताल जनकपुरको आइसोलेसनमा भर्ना भएका धनुषाको हंशपुर नगरपालिका–७ प्रसाहीका १६ वर्षीय किशोर राजु सदाको असार ९ गते प्रादेशिक अस्पताल जनकपुरको आइसोलसनमा मृत्यु भएको थियो । पछि राजुलाई झाडापखालासमेत लागेपछि कोरोना भन्दै चिकित्सकहरु उनको उपचारमा खटिएनन् । मृत्युपछि उनमा कोरोना नरहेको पुष्टि भएको थियो ।

यसअघि सवारी दुर्घटना मुद्दामा इलाका प्रहरी कार्यालय सबैलाको हिरासतमा रहेका शम्भु सदाको र भारतबाट फर्केर आएका मलार सदाको सिमामा भोकले मृत्यु भएको थियो ।

प्रहरीले प्रदर्शनबाट क्षेत्रबाट एक जना पत्रकारलाईसमेत नियन्त्रणमा लिएको छ ।

प्रकाशित : असार १८, २०७७ १६:५०
पूरा पढ्नुहोस्
प्रतिक्रिया
पठाउनुहोस्
×